ကုလအတွင်းရေးမှူးချုပ် မြန်မာနိုင်ငံရောက်

ကုလသမဂ္ဂအတွင်းရေးမှူးချုပ် ဘန်ကီမွန်းဟာ ဒီကနေ့ နေ့လည်ပိုင်းက မြန်မာနိုင်ငံကို ရောက်ရှိသွားပြီ ဖြစ်ပါတယ်။ အတွင်းရေးမှူးချုပ် ဘန်ကီမွန်းဟာ သူ့ရဲ့ ၃ ရက်ကြာ မြန်မာနိုင်ငံ ခရီးစဉ်အတွင်း လွှတ်တော် ၂ ရပ်ပေါင်းရှေ့မှောက်မှာ မိန့်ခွန်း ပြောကြားမယ့်အပြင် သမ္မတ ဦးသိန်းစိန်နဲ့ မြန်မာ့ ဒီမိုကရေစီအရေး ခေါင်းဆောင် ဒေါ်အောင်ဆန်းစုကြည် တို့နဲ့လည်း တွေ့ဆုံမှာ ဖြစ်ပါတယ်။ ကိုဇော်ဝင်းလှိုင်က အပြည့်အစုံကို တင်ပြပေးထားပါတယ်။ သမ္မတ ဦးသိန်းစိန် ဦးဆောင်တဲ့ မြန်မာအစိုးရက အကောင်အထည်ဖော် ပြုပြင်ပြောင်းလဲရေးလုပ်ငန်းတွေကို ထောက်ခံ အားပေးတဲ့အနေနဲ့ မြန်မာနိုင်ငံကို လာရောက်တဲ့ ကုလသမဂ္ဂ အတွင်းရေးမှူးချုပ် ဘန်ကီမွန်းဟာ သူ့ရဲ့၃ ရက်ကြာခရီးစဉ်ကို ဒီကနေ့ စတင်ပါတယ်။ အတွင်းရေးမှူးချုပ် ဘန်ကီမွန်းဟာ ဒီကနေ့ ခရီးရောက်မဆိုက် ဆိုသလိုပဲ ကုလသမဂ္ဂအတွင်းရေးမှူး ချုပ်ဟောင်း ဦးသန့်ရဲ့ အုတ်ဂူကိုသွားပြီး ဂါရ၀ပြုခဲ့တာပါ။ "ဒီကနေ့ ၁၂ နာရီ ၄၅ မှာ ရန်ကုန် အပြည်ပြည်ဆိုင်ရာ လေဆိပ်ကိုရောက်တယ်။ ၁ နာရီ ၁၅ မှာ ဆီဒိုနား ဟိုတယ်ကို ရောက်တယ်။ ၂ နာရီ မိနစ်မှာ ရန်ကုန်မှာရှိတဲ့ ကုလသမဂ္ဂရုံးက ၀န်ထမ်းတွေနဲ့ နေ့လည်စာ စားမယ်။ ၄ နာရီ ၁၀ မိနစ်မှာတော့ ဦးသန့်ဂူဗိမ္မာန်ကိုသွားပြီး ဂါရ၀ပြုတယ်။ ဦးသန့် ဂူဗိမ္မာန်က ရန်ကုန် လေဆိပ်ကို သွားပြီး ကုလသမဂ္ဂ အထူးလေယာဉ်နဲ့ နေပြည်တော်ကို သွားမယ်။ နေပြည်က မြတော်ဝင် ဟိုတယ်မှာ သူနဲ့အတူလိုက်လာတဲ့ နိုင်ငံခြားသတင်းထောက်တွေနဲ့ ညစာ စားမယ်။" အတွင်းရေးမှူးချုပ် ဒီကနေ့ ဘန်ကီမွန်း ရောက်လာတဲ့အခြေအနေကို ရန်ကုန်မြို့မှာရှိတဲ့ သတင်းထောက် တဦးက ဗွီအိုအေကို ပြောပြခဲ့တာပါ။ ဒါဟာ အတွင်းရေးမှူးချုပ် ဘန်ကီမွန်းအနေနဲ့ တတိယအကြိမ်မြောက် မြန်မာနိုင်ငံကို လာရောက် လည်ပတ်ခြင်းလည်း ဖြစ်ပါတယ်။ အတွင်းရေးမှူးချုပ် ဘန်ကီမွန်းဟာ ဒီကနေ့ ညနေမှာပဲ နေပြည်တော်ကို ခရီးဆက်မှာဖြစ်ပြီး အဲဒီမှာ မြန်မာနိုင်ငံမှာ ရောက်နေတဲ့ အီးယူ ဥရောပသမဂ္ဂရဲ့ နိုင်ငံခြား မူဝါဒရေးရာ အကြီးအကဲ Catherine Ashton နဲ့ တွေ့ဆုံဖို့ စီစဉ်ထားတာပါ။ "ည ၈ နာရီ ၁၅ မှာ ဥရောပသမဂ္ဂ လုံခြုံရေးနဲ့ နိုင်ငံခြားရေးဆိုင်ရာ အဆင့်မြင့်ကိုယ်စားလှယ် Catherine Ashton နဲ့ တွေ့မယ်။" မနက်ဖြန်မှာ အတွင်းရေးမှူးချုပ် ဘန်ကီမွန်းရော၊ အီးယူနိုင်ငံခြားရေး မူဝဒါဆိုင်ရာအကြီးအကဲ Catherine Ashton ပါ သမ္မတ ဦးသိန်းစိန်နဲ့ တွေ့ဆုံကြဖို့ရှိနေပေမယ့် သူတို့ ၂ ဦးစလုံး အပြိုင်ထဲ အတူတူ တွေ့ကြမလားဆိုတာတော့ အတိအကျ မသိရသေးပါဘူး။ အတွင်းရေးမှူးချုပ် ဘန်ကီမွန်းဟာ တနင်္လာနေ့မနက်ပိုင်းမှာပဲ သမ္မတ ဦးသိန်းစိန်နဲ့ တွေ့ဆုံပြီးတော့ လွှတ်တော် ၂ ရပ်ပေါင်း ပြည်ထောင်စု လွှတ်တော်မှာ မိန့်ခွန်းပြောကြားမှာ ဖြစ်ပါတယ်။ "မနက်ဖြန်ကျရင်တော့ မနက် ၉ နာရီမှာ သမ္မတကြီးနဲ့ တွေ့မယ်။ ၁၀ နာရီမှာ ပြည်သူ့လွှတ်တော်ဥက္က သူရ ဦးရွှေမန်းနဲ့ တွေ့မယ်။ ၁၀ နာရီ ၄၀ မှာ အမျိုးသားလွှတ်တော် ဥက္ကဌ ဦးခင်အောင်မြင့်နဲ့ တွေ့မယ်။ ၁၁ နာရီ ၂၀ မှာ ပြည်ထောင်စုလွှတ်တော်မှာ မိန့်ခွန်းပြောမယ်။" အတွင်းရေးမှူး ဘန်ကီမွန်းဟာ မြန်မာနိုင်ငံလွှတ်တော်အတွင်း မိန့်ခွန်းပြောကြားမယ့် ပထမဆုံးသော နိုင်ငံတကာ ခေါင်းဆောင်တဦးလည်း ဖြစ်ပါတယ်။ ပြည်ထောင်စုလွှတ်တော်မှာ မိန့်ခွန်းပြောကြားပြီး နေ့လည် ၁ နာရီခွဲလောက်မှာတော့ နေပြည်တော်ကနေ ရှမ်းပြည်တောင်ပိုင်း ဟဲဟိုးမြို့နဲ့ UNODC ကုလသမဂ္ဂမူးယစ်ဆေးဝါးနဲ့ ရာဇ၀တ်မှုဆိုင်ရာရုံးက မူးယစ်ဆေးဝါး တိုက်ဖျက်ရေး လုပ်ငန်းတွေ အကောင်အထည်ဖော်နေတဲ့ ဟိုပုန်းမြို့တို့ကို သွားရောက် လေ့လာပြီး ညနေပိုင်းမှာ နေပြည်တော်ကို ပြန်လာမှာ ဖြစ်ပါတယ်။ အတွင်းရေးမှူးချုပ် ဘန်ကီမွန်းဟာ အင်္ဂါနေ့ မေလ ၁ ရက်နေ့မှာတော့ ရန်ကုန်မြို့ကို ပြန်လာမှာပြီး အဲဒီမှာ မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်နဲ့ တွေ့ဆုံဖို့ ရှိနေပါတယ်။ ဒါပေမယ့် ဘယ်အချိန် ဘယ်နေရာမှာ တွေ့ကြမယ်ဆိုတာနဲ့ ပတ်သက်လို့တော့ ကုလသမဂ္ဂဖက်ကရော NLD ဖက်ကပါ အတည်ပြုချက် ထုတ်ပြန်ခြင်း မရှိသေးပါဘူး။ "ဒေါ်စုနဲ့တွေ့မယ့်အချိန်ကျတော့ ရေးမထားတော့ သူတို့ UN ကနေ ဘယ်အချိန်ပေးမလဲ မသိဘူး။ မေလ ၁ ရက်နေ့တော့ တွေ့မယ်ထင်တယ်။ ၁ ရက်နေ့မှာတော့ သူတို့ UN အဖွဲ့တွေနဲ့တွေ့ပြီး ဒေါ်စုနဲ့ တွေ့မှာပါ။ ဒီကနေ့ကတော့ မတွေ့ဘူး။" ကုလသမဂ္ဂအတွင်းရေးမှူးချုပ် ဘန်ကီမွန်းဟာ ဒီကနေ့ ရန်ကုန်မြို့ကိုရောက်မလာခင် အိန္ဒိယနိုင်ငံမှာ ခရီးတထောက် ၀င်ရောက်ခဲ့စဉ်အတွင်း မြန်မာ့ ဒီမိုကရေစီရေးအတွက် နိုင်ငံတကာအသိုင်းအ၀ိုင်းအနေနဲ့ ဘယ်လို ၀ိုင်းဝန်း ကူညီသွားကြမလဲ ဆိုတာနဲ့ ပတ်သက်ပြီး အိန္ဒိယ၀န်ကြီးချုပ် မန်မိုဟန်ဆင်းဂ်နဲ့ ဆွေးနွေး တိုင်ပင်ခဲ့တယ်လို့ သိရပါတယ်။ voa