အာဏာသိမ်း စစ်ခေါင်းဆောင် ထိုင်းဝန်ကြီးချုပ် မြန်မာပြည် လာမည်

ထိုင်းနိုင်ငံ လက်ရှိ ၀န်ကြီးချုပ် ဗိုလ်ချုပ်ကြီး ပရာယု ချန်အိုချာသည် လာမည့်အောက်တိုဘာလတွင် မြန်မာနိုင်ငံသို့ တရားဝင် ခရီးစဉ်သွားရောက်ရန် ရှိပြီး ထိုင်း-မြန်မာ စီးပွားရေး အနီးကပ် ပူးပေါင်းဆောင်ရွက်မှု ပိုမိုခိုင်မာစေရေး လုပ်ဆောင်မည်ဟု သတင်း ရရှိသည်။ အထူးသဖြင့် ဗိုလ်ချုပ်ကြီး ပရာယု ချန်အိုချာ၏ မြန်မာနိုင်ငံခရီးစဉ်အတွင်း နေပြည်တော်၌ သမ္မတ ဦးသိန်းစိန်နှင့် တွေ့ ဆုံချိန် တွင် ထိုင်းနှင့် မြန်မာ ၅၀ ရာခိုင်နှုန်းစီ ရင်းနှီးမြှုပ်နှံမှုပြုလုပ်ရန် ရှိသည့် ထားဝယ် အထူးစီးပွားရေးဇုန် စီမံကိန်းနှင့်ပတ်သက်ပြီး ပြန် လည် စတင်၍ အရှိန်မြှင့်လုပ်ဆောင်နိုင်ရေး မျှော်လင့်ထားသည်ဟု ဘန်ကောက်ပို့စ် သတင်းက ဆိုသည်။ ၀န်ကြီးချုပ် ဗိုလ်ချုပ်ကြီး ပရာယု ချန်အိုချာသည် အမျိုးသား ငြိမ်းချမ်းရေးနှင့် တရားဥပဒေ စိုးမိုးရေး ကောင်စီ(NCPO) အစည်း အဝေးကို ဥက္ကဋ္ဌအဖြစ် တက်ရောက်ပြီးနောက် မြန်မာနိုင်ငံသို့ လာမည့် အောက်တိုဘာ ၇ ရက်နေ့တွင် သွားရောက်မည်ဟု ထိုင်းစစ်တပ် သတင်းရင်းမြစ်တခုကို ကိုးကားပြီး ယမန်နေ့က ဘန်ကောက်ပို့စ် သတင်းတွင် ဖော်ပြထားသည်။ မြန်မာနိုင်ငံမှ ရရှိသော သတင်းအချက်အလက်အရ ဗိုလ်ချုပ်ကြီး ပရာယု ချန်အိုချာသည် အောက်တိုဘာ ၁ ရက် မှ ၃ ရက်နေ့အတွင်း မြန်မာနိုင်ငံသို့ လာရောက်မည်ဟု သိရသည်။ သို့သော် မြန်မာနိုင်ငံဆိုင်ရာ ထိုင်းနိုင်ငံ သံအမတ်ကြီး Pisanu Suvanajata ကမူ ဗိုလ်ချုပ်ကြီး ပရာယု၏ မြန်မာနိုင်ငံ ခရီးစဉ်ကို ရက်အတိအကျ သတ်မှတ်မှု မရှိသေးဘဲ အောက်တိုဘာလဆန်း ဖြစ်နိုင်ကြောင်း ပြောဆိုသည်။ ဗိုလ်ချုပ်ကြီး ပရာယု ချန်အိုချာ၏ ပထမဆုံး နိုင်ငံခြား ခရီးစဉ်အဖြစ် အာဆီယံ အလှည့်ကျ ဥက္ကဋ္ဌ ဖြစ်သည့် မြန်မာနိုင်ငံကို ရွေးချယ်ခဲ့ခြင်း ဖြစ်ပြီး သမ္မတ ဦးသိန်းစိန်နှင့် နေပြည်တော်၌ တွေ့ဆုံမည်ဟု ဘန်ကောက် ပို့စ်က သတင်းက ဆိုသည်။ ထိုင်းဗိုလ်ချုပ်ကြီး ပရာယု ချန်အိုချာ၏ မြန်မာနိုင်ငံ ခရီးစဉ်အတွင်း အတိုက်အခံခေါင်းဆောင် ဒေါ်အောင်ဆန်းစုကြည် နှင့် တွေ့ဆုံရန် မရှိဟုလည်း သိရသည်။ သို့သော် ထိုင်းစစ်ဗိုလ်ချုပ်များ၊ ထိုင်းနိုင်ငံရေး လောကသားများအကြား သြဇာရှိသည့် မြန်မာအကြားအမြင်ဆရာမ အီးတီ ခေါ် ဒေါ်ဆွေဆွေဝင်းနှင့် တွေ့ဆုံမည်ဟု သတင်းများ ထွက်ပေါ်နေသော်လည်း ထိုင်းသံအမတ်ကြီးက ထိုကိစ္စအတွက် အချိန်ရမည် မထင်ကြောင်း၊ သို့သော် ခရီးစဉ် အချိန်ဇယားအပေါ် မူတည်ကြောင်း ဘန်ကောက်ပို့စ်ကို ပြောဆိုထားသည်။ ထို့အပြင် ၄င်းက မြန်မာနိုင်ငံသည် စီးပွားရေးပြုပြင်ပြောင်းလဲမှုများ လုပ်ဆောင်လာကာ နိုင်ငံတကာနှင့် ထိတွေ့ဆက်ဆံ လျက် ခေတ်မီသည့် နိုင်ငံဖြစ်ရေး လုပ်ဆောင်နေရာတွင် ထားဝယ် စီမံကိန်းများလည်း အပါအ၀င်ဖြစ်ကြောင်း ဆက်လက် ပြောဆို ထားသည်။ ဗိုလ်ချုပ်ကြီး ပရာယုသည် မြန်မာနိုင်ငံတွင် နေထိုင်နေသည့် ထိုင်းလူမျိုး ၂၀၀၀ ခန့်နှင့်လည်း ရန်ကုန်မြို့တွင် တွေ့ဆုံရန် စီစဉ် ထားကြောင်းလည်း သိရသည်။ မြန်မာဘက်က ထားဝယ် အထူးစီးပွားရေးဇုန် စီမံကိန်းကို နိုဝင်ဘာလတွင် ပြန်လည် စတင်လိုကြောင်း၊ ဗိုလ်ချုပ်မှူးကြီး မင်းအောင် လှိုင် နှင့် မြန်မာ စစ်ဘက်ခေါင်းဆောင်များ မကြာသေးခင်က ထိုင်းနိုင်ငံသို့ အလည်အပတ်လာခဲ့ပြီးနောက် စီမံကိန်း အတွက် စိုးရိမ်နေသည့် အေဂျင်စီများသို့လည်း ဗိုလ်ချုပ်ကြီး ပရာယုက စိတ်မပူရန် ပြောဆိုခဲ့ကြောင်း သတင်းရင်းမြစ် တခုကို ကိုးကားပြီး ဘန်ကောက်ပို့စ်က ဆိုသည်။ ထားဝယ် အထူးစီးပွားရေးဇုန် စီမံကိန်းနှင့်ပတ်သက်၍ လူမှုဘ၀ သက်ရောက်မှု(SIA) နှင့် သဘာဝ ပတ်ဝန်းကျင် သက်ရောက် မှု(EIA) စစ်တမ်းများအရ ဆိုးကျိုး သက်ရောက်မှုများရှိ၍ ကရင်အမျိုးသား အစည်းအရုံး(KNU) အပါအ၀င် စီမံကိန်းကို လေ့လာ စောင့်ကြည့်နေကြသည့် အဖွဲ့အစည်းများကလည်း ကန့်ကွက်ခြင်း၊ သတိပေးခြင်းများ လုပ်ဆောင်နေသည်။ “ဒီစီမံကိန်းကို အစက ရပ်တန့်ရေး တောင်းဆိုခဲ့တာ။ ဒါပေမယ့် အစိုးရချင်း လုပ်မယ့် ကိစ္စလည်းဖြစ်နေတော့ စီမံကိန်းကို လူမှု ဘ၀ ထိခိုက်မှု နဲ့ သဘာဝ ပတ်ဝန်းကျင် ဆိုးကျိုးတွေ မဖြစ်အောင်နဲ့ နစ်နာနေရတဲ့ ဒေသခံတွေနဲ့ ညှိညှိနှိုင်းနှိုင်း သေချာ လုပ် ဆောင် ပေးကြဖို့ တိုက်တွန်းထားတယ်”ဟု ထားဝယ် လူငယ်များ အစည်းအရုံးမှ ကိုကျော်မင်းထိုက် က ဧရာဝတီကို ရှင်းပြသည်။ ထိုင်းအစိုးရအဆက်ဆက်က ၄င်းတို့အကျိုးအမြတ်များစွာရမည့် ထားဝယ်စီမံကိန်းကို အဆင်ပြေပြေလုပ်ပိုင်ခွင့် ရရှိရေး နည်းမျိုးစုံဖြင့် ချည်းကပ်ကြိုးစား နေကြကြောင်းလည်း သူက ဆက်ပြောသည်။ “အရင်တုန်း အီတာလျံ-ထိုင်း ကုမ္ပဏီ ၀င်လုပ်တုန်းက ထိုင်းတွေနဲ့ ဒေသခံတွေကြား ဆက်ဆံရေး အဆင်မပြေတာတွေရှိတယ်။ အခုလို တန်ဆောင်တိုင်ပွဲ အကြီးအကျယ် ၀င်လုပ်ခြင်းအားဖြင့် လူထုအချင်းချင်း ပိုပြီးရင်းနှီးမှုရအောင် ပိုပြီးတော့ သူတို့ လုပ်ကွက်လုပ်ကွင်းတွေ ပိုရလာအောင် ၀င်လုပ်မယ်လို့ပဲ ကျနော်တို့ မြင်တယ်”ဟု ကိုကျော်မင်းထိုက်က ပြောဆိုသည်။ ဗိုလ်ချုပ်ကြီး ပရာယု ၏ မြန်မာနိုင်ငံခရီးစဉ်အတွင်း ထားဝယ် အထူးစီးပွားရေးဇုန် စီမံကိန်းကိစ္စကို အမြန်ဆုံး ပြန်လည် အကောင် အထည် ဖော်ရေး ကြိုးပမ်းမည်ဟု ယူဆကြောင်းနှင့် အမှန်တကယ် ထားဝယ်ဒေသခံများ၏ နစ်နာမှုများ အပေါ်လည်း စာနာ နားလည်ပြီး ထိုက်တန်သည့် လျော်ကြေးပေးမှုများ လုပ်ဆောင်ရန်လည်း သက်ဆိုင်ရာ တာဝန်ရှိသူများကို တိုက်တွန်းလိုကြောင်း ကိုကျော်မင်းထိုက် က ဧရာဝတီကို ပြောသည်။ ထားဝယ် ရေနက်ဆိပ်ကမ်း စီမံကိန်းသည် စတုရန်းမိုင် ၁၀၀ ခန့် (၂၅၀ စတုရန်းကီလိုမီတာ) အကျယ်အ၀န်း ရှိကြောင်း စီမံကိန်း ဆောက်လုပ်ခွင့်ရ ယခင် အီတာလျံ-ထိုင်း(ITD) ကုမ္ပဏီ၏မှတ်တမ်းများအရ သိရသည်။ သို့သော် ဒေသခံများ၏ ကန့်ကွက်မှု၊ မြေယာလျော်ကြေး တောင်းဆိုမှု၊ နေရာသစ်ပြန်လည်ချထားရေး အဆင်ပြေရန် တောင်း ဆို မှုများနှင့် စီမံကိန်းနှင့်ပတ်သက်၍ ဘေးထွက်ဆိုးကျိုးများရှိလာနေသည့်အပေါ် ကန့်ကွက်မှုများကြောင့် နောက်ပိုင်းတွင် စီမံကိန်း ဧရိယာကို လျှော့ချနေကြောင်းလည်း ကိုကျော်မင်းထိုက်က ဆိုသည်။ မြန်မာအစိုးရ သတင်းစာများတွင် ဖော်ပြထားချက်အရ ထားဝယ်ရေနက်ဆိပ်ကမ်းတွင်ကုန်တင် သင်္ဘောကြီး ၂၅ စင်း တပြိုင် တည်း ဆိုက်ကပ်နိုင်ပြီး တနှစ်လျှင်ကုန်ပစ္စည်း မက်ထရစ် တန်ချိန် သန်း ၁၀၀ နီးပါး အတင်အချ ပြုလုပ်နိုင်မည် ဖြစ်ပြီး ဆိပ် ကမ်း နှင့် အခြေခံ အဆောက်အအုံများ ပါဝင်သော အခြေခံပထမအဆင့်အတွက် ဒေါ်လာ ၈ ဒသမ ၅ ဘီလီယံ ကုန်ကျမည် ဖြစ်ကြောင်း သိရသည်။ ထို့နောက်ရေနံသန့်စင် ထုတ်လုပ်ရေးနှင့် သံမဏိစက်ရုံတို့ ပါဝင်သော စက်မှုဇုန်အကြီးစားထူထောင်ရေးအတွက် ဒေါ်လာ ၅၀ ဘီလီယံ အထိ ကုန်ကျမည်ဖြစ်သည်။ ထိုင်းနိုင်ငံတွင် နိုင်ငံရေး မတည်ငြိမ်မှုများကြောင့် မေလ ၂၂ ရက်က စစ်တပ်က အာဏာသိမ်းခဲ့အပြီး စစ်ခေါင်းဆောင် ဗိုလ်ချုပ်ကြီး ပရာယုသည် သြဂုတ်လ အတွင်းက ကျင်းပသည့် အမျိုးသား ဥပဒေပြုလွှတ်တော်မှတဆင့် ၀န်ကြီးချုပ် ဖြစ်လာသည်။

အပြည့်အစုံသို့...

ပြန်ခေါက်ထားပါ...

အစိုးရနှင့် ကရင်လက်နက်ကိုင်အဖွဲ့ မြ၀တီ၌ ပစ်ခတ်မှုဆက်ဖြစ်

စက်တင်ဘာ ၂၇ရက်၊ ၂၀၁၄ခုနှစ်။ ကေအိုင်စီ မြ၀တီမြို့ပြင်ရှိ အောင်မြေရွှေဘို ရပ်ကွက်တွင် ယနေ့ ၁၁နာရီခန့်က လက်နက်ကြီးဖြင့် ပစ်ခတ်မှုတစ်ခု အချိန်ပိုင်းဖြစ်ပွားခဲ့သည် ဟု မြို့ခံလူထု၏ ပြောပြချက်များအရ သိရသည်။ မြို့ခံ အမျိုးသမီးတစ်ဦးက “တိုက်ပွဲဖြစ်တာက အောင်မြေရွှေဘိုရပ်ကွက်နားက မချောလေးကုန်းမှာတဲ့။ အဲဒီမှာက စစ်တပ်ကော၊ ဘီဂျီအက်ဖ်ကော ရှိတယ်လေ။ အခုတော့ ငြိမ်သွားပြီ။ ဒါပေမဲ့ စစ်တပ်က မြို့ပြင်ထွက်မဲ့လမ်းကို နေ့လည်ပိုင်းက ခန ပိတ်ထားခဲ့ သေးတယ်”ဟု ကေအိုင်စီသို့ ပြောသည်။ မည်သည့်လက်နက်ကိုင်အဖွဲ့များ ပစ်ခတ်မှုဖြစ်ပွားသည်ကို အတိအကျ မသိရသေးသော်လည်း ယင်းသို့လုံခြုံရေး မကောင်း သည့်အတွက် မြ၀တီမြို့ခံလူထုမှာ ထိတ်လန့်နေကြပြီး ဈေးဆိုင်များပိတ်ကာ၊ ကျောင်းသူကျောင်းသားများကို ကျောင်းများမှ ပြန် လွှတ်ပေးလိုက်ပြီဖြစ်ကြောင်း ၎င်းမြို့ခံက ဆက်ပြောသည်။ အလားတူ ယနေ့မနက် ၅နာရီခန့်က ကေအဲန်ယူထိန်းချုပ်နယ်မြေ တပ်မဟာ(၆)ရှိ ဒီကေဘီအေ တပ်ဖွဲ့ဝင်အချို့ကို အစိုးရတပ်မှ စစ်ကြောင်း အလုံးအရင်းနှင့် ပိတ်ဆို့တိုက်ခိုက်မှု ဖြစ်ပွားခဲ့သည်ဟု ဒီကေဘီအေ သတင်းရပ်ကွက်အရ သိရသည်။ ယမန်နေ့က လည်း မွန်ပြည်နယ် ကျိုက်မရောမြို့နယ်အတွင်း ဒီကေဘီအေမှ ဗိုလ်ကြီးကော်ကြီး ဦးဆောင်သောတပ်ဖွဲ့သည် အစိုးရတပ် (တပ် အမှတ်မသိ)နှင့် ယမန်နေ့မနက် ၁၀နာရီမှ မွန်းလွဲ ၃နာရီအထိ တိုက်ပွဲဖြစ်ပွားခဲ့သည်။ ထိုတိုက်ပွဲကြောင့် အစိုးရဘက်က ၁၃ဦး ဒဏ်ရာရ၊ ၄ဦးကျဆုံးကာ အထမ်းသမား ၂ဦးကို ဒီကေဘီအေ ဖမ်းဆီးလိုက်ပြီး အစိုးရတပ်၏ လက်နက် ၁၅လက်ကိုပါ သိမ်း ဆည်းလိုက်ကြောင်း သိရသည်။ ထို့အပြင် မြ၀တီရှိ KNU/KNLA ငြိမ်းချမ်းရေးကောင်စီမှ ဗိုလ်မှူးကြီးတိုင်းဂါး၏ ရုံးကိုလည်း အစိုးရစစ်တပ်မှ ၀င်ရောက်သိမ်း ဆည်းလိုက်သည်ဟု ကြားသိရသော်လည်း အတည်ပြုရန်အတွက် ဆက်သွယ်မရသေးပေ။ မြ၀တီမြို့တွင် စက်တင်ဘာ ၁၈ရက် နေ့က အစိုးရတပ်၏ ပစ်ခတ်မှုကြောင့် ဒီကေဘီအေမှ ဗိုလ်လင်းနိုင် သေဆုံးသွားကာ တပ်သားတစ်ဦး ဒဏ်ရာရရှိခဲ့သည်။ ၎င်းနောက် အစိုးရတပ်နှင့် ဒီကေဘီအေ၊ ငြိမ်းချမ်းရေးကောင်စီအဖွဲ့များ သဘောထားတင်းမာမှုများ ဖြစ်ပွားခဲ့ပြီးနောက်ပိုင်း ယမန်နေ့က ကော့ကရိတ်မှ မြ၀တီသို့ အစိုးရစစ်ကား ၆စီးခန့်တက်လာသည်ကို လက်နက်ကြီးနှင့်လှမ်း၍ ပစ်ခတ်မှုများ ဖြစ်ပွားခဲ့ သေးသည်။ ယနေ့ မွန်းလွဲ ၂နာရီအချိန်တွင် ရရှိသည့်သတင်းအရ အစိုးရတပ်ကားနှစ်စီးမှာ မြ၀တီမြို့အထွက် Morning Star စားသောက် ဆိုင်ရှေ့ လမ်းမကိုပိတ်ဆို့ရပ်ထားပြီး မြို့တွင်းမှကားများကို မြို့ပြင်ထွက်ခွင့်မပေးဘဲ ခေတ္တ ပိတ်ပင်တားဆီးထားရာက ယခု ပြန် ဖွင့်ပေးလိုက်ပြီဖြစ်ကြောင်း မြို့ခံလူထုက ပြောသည်။

အပြည့်အစုံသို့...

ပြန်ခေါက်ထားပါ...

မဖြေရှင်းနိုင်သေးတဲ့ မြန်မာ့ငြိမ်းချမ်းရေး

ဦးကျော်ဇံသာ 03.09.2014 08:13 ပြန်လည်ထုတ်လွှင့် --- ဒီတပတ် မြန်မာ့မျက်မှောက်ရေးရာ သုံးသပ်ချက်အစီအစဉ်မှာ မကြာသေးမှီက ပြီးဆုံးသွားတဲ့ တိုင်းရင်းသားလက်နက်ကိုင်အင်အားစုတွေ၊ ပါတီစုံ ကိုယ်စားလှယ်တွေနဲ့ အစိုးရကိုယ်စားလှယ်တွေ တွေ့ဆုံတဲ့ ဆွေးနွေးပွဲမှာ ငြိမ်းချမ်းရေးအလားအလာနဲ့ ပတ်သက်ပြီး အားတက်သရော သဘောတူညီချက်တွေ ရရှိခဲ့တယ်လို့ သိရပါတယ်။ လက်တွေ့ဖြစ်နိုင်တဲ့ အားတက်စရာတွေလား။ မှားယွင်းတဲ့ မျှော်လင့်ချက်တွေလား ဆိုတာကို သိရှိနိုင်ဖို့ တိုင်းရင်းသားအင်အားစုတွေရဲ့ ခေါင်းဆောင်တစ်ဦးဖြစ်တဲ့ နိုင်ဟံသာနဲ့ ဦးကျော်ဇံသာ ဆွေးနွေးသုံးသပ် တင်ပြထားပါတယ်။ ဦးကျော်ဇံသာ ။ ။ ဆရာတို့ တိုင်းရင်းသားခေါင်းဆောင်တွေနဲ့ မြန်မာနိုင်ငံအစိုးရရဲ့  ကိုယ်စားလှယ်တွေ တွေ့ဆုံဆွေးနွေးတဲ့ပွဲဟာ ဒီတကြိမ်မှာ တော်တော်လေး မျှော်လင့်ချက်ထားတဲ့အသံတွေ ကြားရပါတယ်။ ဆရာတို့ဖက်က ဘယ်လောက်အထိ မျှော်လင့်ချက်ကောင်းတဲ့အချက်တွေ ရရှိခဲ့ပါသလဲ။ အတိအကျအားဖြင့် ဘာရရှိခဲ့ပါသလဲ။ နိုင်ဟံသာ ။ ။ အဓိကအားဖြင့်တော့ တဖက်ကလည်း ကျနော်တို့လည်း လိုက်လျောပါတယ်။ တဖက်ကလည်း ကျနော်တို့ လိုချင်တာ ရပါတယ်။ အဓိက အရေးကြီးတဲ့ ဆုံးဖြတ်ချက်ကတော့ အစိုးရဖက်က လိုလားတဲ့ ပြည်ထောင်စုမပြိုကွဲရေး၊ တိုင်းရင်းသားစည်းလုံးညီညွှတ်မှု မပြိုကွဲရေး၊ အချုပ်အခြာအာဏာ တည်တန့်ခိုင်မြဲရေးဆိုတဲ့ အရေး (၃) ပါး အပါအဝင်။ နောက် လွတ်လပ်ရေး၊ တန်တူရေး နဲ့ တရားမျှတရေးဆိုတဲ့ လောကပါလတရား - အဲဒါကတော့ အစိုးရဖက်က လိုလားတာ။ နောက် ကျနော်တို့ လိုလားတာကတော့ ဒီမိုကရေစီရေး၊ အမျိုးသားတန်တူရေး နဲ့ ကိုယ်ပိုင်ပြဌာန်းခွင့်ရှိသော ဖယ်ဒရယ်မူကို အခြေခံတဲ့ ပြည်ထောင်စုကို တည်ဆောက်ရေး - အဲဒါတွေကို လာမယ့် နိုင်ငံရေးဆွေးနွေးပွဲမှာ ရရှိတဲ့ နားလည်းမှုနဲ့ သဘောတူညီမှုနဲ့ အကောင်အထည်ဖော်သွားဖို့ ဆိုတဲ့ဟာ။ အဲဒီလို သဘောတူညီမှုကိုတော့ ရရှိခဲ့ပါတယ်။ အဲဒါက အရေးကြီးဆုံးပါပဲ။ ဦးကျော်ဇံသာ ။ ။ ဆရာတို့ဖက်က လိုလားတဲ့ ဒီမိုကရေစီနဲ့ အမျိုးသားတန်တူရေးနဲ့ ကိုယ်ပိုင်ပြဌာန်းခွင့် အပြည့်အဝရှိသော ဖယ်ဒရယ်ပြည်ထောင်စု ထူထောင်ရေး။ ဒီကိစ္စကို သူတို့ဖက်က လိုက်လျောမယ် ပြောတာလား။ ဒီကိစ္စကို ဆွေးနွေးမယ်လို့ ပြောတာလား၊ ဒီကိစ္စကို လက်ခံဆွေးနွေးဖို့လို့ ပြောတာလား။ နိုင်ဟံသာ ။ ။ ဒီလိုပါ အဲဒီမူကို လာမယ့် နိုင်ငံရေးဆွေးနွေးပွဲမှာ အသေးစိတ် ဆွေးနွေးမှာပါ။ ဒါကို ယေဘုယျအားဖြင့်တော့ ဒီမူကို ဦးတည်တဲ့ နိုင်ငံရေးဆွေးနွေးပွဲကို တက်မယ်။ သဘောကတော့ ဒီမူကိုလည်း လက်ခံတာပေါ့။ တဖက်ကတော့ ကျနော်တို့ကလည်း သူတို့ဖက်က အဆိုပြုတဲ့ အရေး (၃) ပါးနဲ့ လောကပါလတရား (၃) ပါးကို ကျနော်တို့လည်း လက်ခံလိုက်တယ်။ တဖက်က ကျနော်တို့ဖက်က အဆိုပြုတဲ့ ဒီမိုကရေစီရေး၊ အမျိုးသားတန်တူရေးနဲ့ ကိုယ်ပိုင်ပြဌာန်းခွင့်ရှိသော ဖယ်ဒရယ်ဟန်မူကို အခြေခံတဲ့ ပြည်ထောင်စုကို တည်ဆောက်ရေး၊ ဒါကိုလည်း သူတို့ လက်ခံလိုက်တယ်။ ဦးကျော်ဇံသာ ။ ။ ကျနော်က အဲဒါကို ရှင်းရှင်းလင်းလင်း သိချင်လို့ပါ။ အဲဒါကို အကောင်အထည်ဖော်ပေးမယ်လို့ လက်ခံတာလား။ သို့တည်းမဟုတ် အဲဒါကို လက်ခံဆွေးနွေးမယ်ဆိုတာလား ဆိုတာကို ကွဲကွဲပြားပြား။ နိုင်ဟံသာ ။ ။ ဒီလိုပါ အဲဒီမူကို ဦးတည်တဲ့ ဆွေးနွေးမှုအနေနဲ့ လုပ်မယ်။ ဒါကတော့ အသေးစိတ်ကတော့ လာမယ့် ဆွေးနွေးပွဲမှာ လာမယ်။ ဒါပေမဲ့ လာမယ့် ဆွေးနွေးပွဲမှာ အဲဒီကိစ္စတွေကို ဆွေးနွေးမယ်။ အဲဒါကို ဦးတည်တဲ့ ဆွေးနွေးမှုတွေကို ဆွေးနွေးမှာပေါ့။ ဦးကျော်ဇံသာ ။ ။ နောက်တခုက အဲဒီဖက်ကဆိုတဲ့နေရာမှာ အုပ်ချုပ်ရေးတာဝန်ရှိတဲ့ပုဂ္ဂိုလ် အစိုးရပိုင်းက ပြောသလား။ သို့တည်မဟုတ် တပ်မတော်ပိုင်းက သဘောထားကော ပါပါသလား။ အဲဒီအထဲမှာ။ နိုင်ဟံသာ ။ ။ အဲဒါ (၃) ဖွဲ့စလုံး ပါပါတယ်။ အစိုးရ၊ လွှတ်တော် နဲ့ တပ်မတော် ကိုယ်စားလှယ် ၉၃) ဖက်စလုံး ပါပါတယ်။ ဦးကျော်ဇံသာ ။ ။ ဆိုတော့ တချို့က ယူဆနေကြတယ်။ ဒီကိစ္စဟာ လက်တွေ့အကောင်အထည် တကယ်မပေါ်သေးဘဲနဲ့ ဒါဟာ တကယ်ဖြစ်လာတော့မယ် ပုံစံမျိုး false hope မှားယွင်းတဲ့မျှော်လင့်ချက်တွေ ပေးပြီးတော့ အစိုးရက နံမည်ကောင်းရအောင် လုပ်နေလေသလားဆိုပြီး သံသယရှိတဲ့ လူတချို့ လည်း ရှိပါတယ်။ သူတို့အတွက် သံသယရှင်းအောင် ဆရာနိုင်ဟံသာအနေနဲ့ ဘာများ ပြောပြချင်ပါသလဲ။ နိုင်ဟံသာ ။ ။ ဒါလဲ ဥပမာပေါ့။ ကျနော်တို့ ဒါကို ဦးတည်ပြီးတော့မှ အကောင်အထည်ပေါ်လာနိုင်ဖို့ လာမယ့် ဆွေးနွေးပွဲမှာ ဆွေးနွေးမယ်ဆိုတော့ ဒါကတော့ အနည်းနဲ့အများကတော့ ဒါကို မူအရ လက်ခံလိုက်တာပေါ့။ အသေးစိတ်ကတော့ ဆွေးနွေးရမှာပေါ့။ အဲဒီ မူအရကလည်း တဖက်ကပြောမယ်ဆိုရင် အရင်က လုံးဝမရှိခဲ့တဲ့မူပါ။ သူတို့ဖက်က လုံးဝလက်မခံဘူး။ အရင်က ဖယ်ဒရယ်ကိုလည်း လက်မခံဘူး။ ကိုယ်ပိုင်ပြဌာန်းခွင့်ကိုလည်း သူတို့ကတော့ ဥပဒေနဲ့ငြိနေတယ် ဘာညာ ဖြစ်နေပါသေးတယ်။ အခုကတော့ ကျော်သွားနိုင်ပြီပေါ့လေ။ ဦးကျော်ဇံသာ ။ ။ ဖယ်ဒရယ်ဆိုတဲ့စကားကိုလည်း တရားဝင်ပွင့်ပွင့်လင်းလင်း သုံးလာပြီပေါ။ နိုင်ဟံသာ ။ ။ ဟုတ်တယ် ဖယ်ဒရယ်မူကို ဦးတည်သော ပြည်ထောင်စုကို တည်ဆောက်ရေးဆိုပြီး အဲဒီလို သုံးပါတယ်။ ဦးကျော်ဇံသာ ။ ။ နောက်တခါ တိုင်းရင်းသားတွေဖက်က ဖယ်ဒရယ်တပ်မတော် ထူထောင်ရေးဆိုတဲ့ အသုံးအနှုန်းကလိုလည်း ပြောခဲ့တာ ရှိပါတယ်။ နောက် ဟိုတုန်းက လွတ်လပ်ရေးယူခါစ ဖွဲ့စည်းခဲ့သလိုပဲ ပြည်နယ် (၇) ခုနဲ့ ဗမာအပါအဝင် (၈) စသဖြင့် အဲဒါမျိုးထားမယ်ဆိုတဲ့ စဉ်းစားချက်တွေလည်း ရှိခဲ့ပါတယ်။ အဲဒီကိစ္စနဲ့ ပတ်သက်လို့ ဘာများ ပြောခဲ့ကြပါသလဲ။ နိုင်ဟံသာ ။ ။ ဒါတွေကတော့ မပြောသေးပါဘူး။ တကယ်တမ်း ဆွေးနွေးတဲ့အခါကြရင် ဖယ်ဒရယ်ပြည်ထောင်စုဆိုတာ နိုင်ငံတခုနဲ့တခု မတူဘူးလေ။ အဲဒါတွေကို ဘယ်ပုံစံ အတိအကျရယ်လို့ ကျနော်တို့ ပြောလို့မရပါဘူး။ သူ့နှုန်းနဲ့သူပေါ့။ အရင့်အမာ၊ အပျော့နဲ့အမာ ဆိုသလိုပေါ့။ ကွဲပြားမှုတော့ ရှိမှာပါ။ ဦးကျော်ဇံသာ ။ ။ ကျနော် စောစောကပြောတဲ့ အချက်တွေကတော့ ဒီဖက်က သိပ်ပြီးတော့ တင်းတင်းမာမာ သဘောထား တောင်းဆိုရမယ့်အချက်လို့ ရမယ်ဆိုရင်လည်း ရမယ်ထင်ပါတယ်။ အပျော့ပြောင်းဆုံး ဟိုဖက်က လိုက်လျောနိုင်တဲ့ အခြေအနေကို ကျနော် စဉ်းစားမိတာတစ်ခုက အခုလက်ရှိ ဖွဲ့စည်းပုံထဲမှာလည်း ဖယ်ဒရယ်အသွင်ကိုဆောင်နေတာပဲ။ ဒီနေရာမှာ ဇယားခွဲခြားတဲ့နေရာမှာ ပြည်နယ်များ လူမျိုးစုများရဲ့  လုပ်ပိုင်ခွင့်၊ ရပိုင်ခွင့်တွေကို ပိုပေးလိုက်ရင် ဖြစ်သွားနိုင်တယ်ဆိုတဲ့ စောဒကတစ်ခုလည်း ရှိပါတယ်။ အဲဒါ အပျော့ပြောင်းဆုံး ဟိုဖက်က လိုက်လျောမယ့် အခြေအနေ။ ဒီလို အပျော့ပြောင်းဆုံး လိုက်လျောမယ့် အခြေအနေပဲ ဖြစ်နိုင်သလား။ ဆရာတို့ ပိုပြီးလိုချင်တဲ့ စောစောက ပြောထားတဲ့ ပြည်နယ်တွေပြန်လည်ဖွဲ့စည်းရေးအထိ ဖြစ်လာနိုင်သလားဆိုတာကို ဆရာ ဘယ်လို တွေးမိပါသလဲ။ နိုင်ဟံသာ ။ ။ ဒါကတော့ ဘယ်လောက် ဖြစ်လာမလဲတော့ မပြောတတ်ဘူး။ တစ်ခုတော့ နည်းနည်း ရှင်းလာပါတယ်လို့တော့ ကျနော် မြင်ပါတယ်။ တဖက်က ဒီမိုကရေစီရေး၊ အမျိုးသားတန်တူရေး၊ ကိုယ်ပိုင်ပြဌာန်းခွင့် ဒါတွေက ဖယ်ဒရယ်က နံမည်ခံရုံလောက် လက်ရှိ ၂၀၀၈ ဖွဲ့စည်းပုံလောက်နဲ့ သွားလို့မရဘူးလေ။ အခုနက ပြောထားတဲ့အတိုင်း ပြည်နယ်နဲ့ ပြည်ထောင်စုကို အာဏာခွဲဝေပေးရမယ်။ ဒါတွေ ပါလာမယ်။ နောက် အမျိုးသားတန်တူရေး ဆိုပြီးတော့ ဆိုထားတဲ့အတွက် အမျိုးသားတွေရဲ့  လက္ခဏာတွေကို identity တွေကို အဲဒါတွေက ပေါ်ပေါ်လွင်လွင် ဖြစ်ဖို့လိုတယ်။ ဦးကျော်ဇံသာ ။ ။ နောက်တစ်ခုက ၁၉၆၂ ခုနှစ်တုန်းကလည်း အစိုးရဖြစ်တဲ့ ဝန်ကြီးချုပ်ဦးနု ဦးဆောင်တဲ့အစိုးရ ပြည်ထောင်စုအစိုးရက ဒါကို လိုက်လျောဖို့ အကြမ်းမျဉ်း ဆွေးနွေးစေခဲ့တယ်လို့ ကျနော်တို့ နားလည်းရပါတယ်။ ဒါပေမဲ့ ဒီဟာ ပြည်ထောင်စုပြိုကွဲရေး အန္တရာယ်ရှိတယ်လို့ အကြောင်းပြပြီးတော့ ဗိုလ်ချုပ်နေဝင်းက ဦးဆောင်ပြီး စစ်တပ်က အာဏာသိမ်းယူခဲ့ပါတယ်။ ဆိုတော့ ဒီလို သမိုင်းဘီးမျိုး တပတ်ပြန်လည်လာနိုင်တဲ့ အန္တရာယ်ကော လုံးဝလွတ်ကင်းပြီလို့ ဆရာ တွက်ပါသလားခင်များ။ နိုင်ဟံသာ ။ ။ ဒါကတော့ ပြောလို့မရပါဘူး။ အာမခံလို့လဲ မရပါဘူး။ ဒါပေမဲ့ ကျနော်တို့က ကျနော်တို့နိုင်ငံမှာ ဖြစ်ရှိနေတဲ့ ပြည်တွင်းစစ်ကို လက်နက်ကိုင်အင်အားသုံးပြီးမှ ဖြေရှင်းလာတာ (၆၅) နှစ် ကြာပါပြီ။ မဖြေရှင်းနိုင်ဘူးဆိုတဲ့ဟာကို နားလည်းလာပြီလေ။ အဲဒီလို နားလည်းလာတဲ့အပေါ်မှာ အဲဒီ လမ်းစဉ်ကိုပဲ ဆက်လက်ပြီးတော့ ကျင့်သုံးနေရင် ကျနော်တို့နိုင်ငံဟာ ပိုပြီးတော့ ဆင်ရဲတွင်းနက်လာမယ်။ နောက်ဆုံးကတော့ ထိန်းလို့မရတဲ့ ပြိုကွဲသွားတဲ့အဆင့်ကို ရောက်သွားနိုင်တယ်လို့ ကျနော်မြင်တယ်။ ဒါကို နားလည်းတဲ့ နိုင်ငံရေးခေါင်းဆောင်တွေကတော့ ဒါကိုတော့ ဆက်ခွင့်ပြုနိုင်တော့မှာ မဟုတ်ဘူးလို့တော့ ကျနော် မြင်ပါတယ်။ ဦးကျော်ဇံသာ ။ ။ နောက်တစ်ခုက နိုင်ငံရေးသမားတချို့  တွက်တာကတော့ အခု ၂၀၁၅ ရွေးကောက်ပွဲ နီးလာတဲ့အခါမှာ တိုင်းရင်းသားတွေရဲ့  မဲဟာလည်း အင်မတန် အရေးကြီးတဲ့ကိစ္စ ဖြစ်လာပါလိမ့်မည်။ ပြီးတော့ ငြိမ်းချမ်းရေးဖော်ဆောင်နိုင်တဲ့ စွမ်းဆောင်ချက်ကလည်း အင်မတန်အရေးကြီးတဲ့ ပြည်သူတွေကြိုက်မယ့် လုပ်ရပ်တစ်ခု ဖြစ်ပါတယ်။ ဘာကြောင့်များ အခု သမ္မတဦးသိန်းစိန်အစိုးရက ဒီကိစ္စကို အသံကောင်းပေးပြီးတော့ မဲဆွယ်တဲ့နေရာမှာ အသုံးချဖို့ ကြိုးစားနေသလားဆိုတဲ့ သံသယတမျိုးလည်း ကြားရသေးတယ်။ အဲဒါက ဘယ်လောက်ဖြစ်နိုင်ပါသလဲ။ နိုင်ဟံသာ ။ ။ ဒါတွေကလဲ တဖက်က ဖြစ်ကောင်းဖြစ်နိုင်မှာပေါ့။ ဒါတွေကတော့ တဖက်ကတော့ အဆိုးကြီးပဲ ကြည့်လို့မရဘူး။ တဖက်က ကျနော်တို့နိုင်ငံက တိုင်းရင်းသားစည်းလုံးညီညွှတ်မှု မရှိလို့၊ တဖက်က နိုင်ငံက တော်တော်လေး ခေတ်နောက်ကျနေသလို။ ဒီမိုကရေစီ အခွင့်အရေး၊ လူ့အခွင့်အရေးတို့လည်း ဆုံးရှုံးနေတဲ့ဟာကို ပြည်သူတွေက နားလည်းလာပါပြီ။ ဒါကြောင့် ကျနော်တို့က ခေတ်ဟောင်းအတိုင်း ဆက်သွားနေလို့တော့ မရဘူး။ ဒီနေ့ နိုင်ငံရေးပါတီ အများစုနဲ့လည်း တွေ့ပါတယ်။ ကျနော်တို့ နိုင်ငံမှာရှိတဲ့ တိုင်းရင်းသားလူမျိုးပေါင်းစုံနဲ့ ဖွဲ့စည်းထားတဲ့ နိုင်ငံကို ဖယ်ဒရယ်ပြည်ထောင်စုပုံစံနဲ့ပဲ ဖွဲ့စည်းမှ ဒါကတော့ ပြဿနာအားလုံး အေးချမ်းပြီးတော့ တိုးတက်နိုင်မယ့်ဟာကို နိုင်ငံရေးပါတီအားလုံးလိုလိုကလည်း ဒါကို လက်ခံလာပါတယ်။ ဒါကြောင့် ဒီကိစ္စကတော့ ပြည်သူအများစု နိုင်ငံရေးအင်အားစုအများစုရဲ့  သဘောတော့ လက်ခံလာတဲ့ အယူအဆတစ်ခုဖြစ်တယ်လို့ ကျနော် မြင်တယ်။ ဦးကျော်ဇံသာ ။ ။ အခု ဆရာတို့ မှန်းထားတဲ့အတိုင်းဆိုရင် ဒီဇင်ဘာ သို့မဟုတ် ဇန်နဝါရီမှာ နိုင်ငံရေးဆွေးနွေးပွဲလုပ်မယ်၊ ဘာညာ ကြားရပါတယ်။ ဝန်ကြီးဦးအောင်မင်း ပြောတဲ့အထဲမှာလည်းပါတယ်ဆိုတော့။ ဆရာတို့က အခု ဒီရက်ပိုင်းမှာပဲ ဒေါ်အောင်ဆန်းစုကြည်နဲ့လည်း တွေ့ကြတယ်လို့ ကြားသိရပါတယ်။ ဒေါ်အောင်ဆန်းစုကြည်က ဘယ်လို သဘောထား ရှိပါသလဲ။ သူက အားတတ်သရော ရှိပါသလား။ နိုင်ငံရေးဆွေးနွေးပွဲမှာ သူကိုယ်တိုင်ပါဝင်ဖို့ အစီအစဉ် ရှိပါသလား။ နိုင်ဟံသာ ။ ။ ဒါကတော့ နိုင်ငံရေးဆွေးနွေးပွဲက ဘယ်အချိန်ရောက်မှန်းလဲ မပြောတတ်သေးဘူး။ ကျနော်တို့က ဒီကိစ္စလည်း သူကိုတော့ နိုင်ငံရေးဆွေးနွေးပွဲမှာ သဘောကတော့ သူလည်း နိုင်ငံရေးခေါင်းဆောင်တစ်ဦးပါပဲ။ နိုင်ငံရေးဆွေးနွေးပွဲမှာတော့ ပါသင့်ပါထိုက်တဲ့ အဆင့်တခုခုမှာတော့ သူလည်းပါမှာပေါ့။ ကနေ့ကတော့ သူနဲ့ ကျနော်တို့ တွေ့တုန်းကတော့ တနိုင်ငံလုံး ပစ်ခတ်ရပ်စဲရေးလောက်ကိုပဲ ကျနော်တို့က သူကို ပြောပြသလို၊ တဖက်ကလည်း လွှတ်တော်အတွင်းမှာ ဒီအခြေခံဥပဒေ ပြောင်းလဲရေးအနေအထားတွေကိုလည်း သူဆီက ကျနော်တို့ ကြားရပါတယ်။ ဦးကျော်ဇံသာ ။ ။ နောက်ဆုံးမေးချင်တာက ဆရာတို့ ငြိမ်းချမ်းရေးဆွေးနွေးပွဲက ငြိမ်းချမ်းရေးမျှော်လင့်ချက်သံတွေ ကြားနေရတဲ့ကိစ္စကို တိုင်းရင်းသားတွေထဲမှာ အစိုးရနဲ့ သဘောထားအတော်လေး တင်းမာနေတယ်ဆိုတဲ့ ကချင် တိုင်းရင်းသား ကေအိုင်အေနဲ့ကော ဆရာတို့နဲ့ ထပ်တူထပ်မျှ သဘောတူပါသလား။ အဲဒါတစ်ခုရယ် နောက် တအောင်းတွေနဲ့ ဆက်လက်ပြီး တိုက်ပွဲတွေ ဖြစ်တယ်ဆိုတဲ့ကိစ္စကိုလည်း ကြားရပါတယ်။ အဲဒီကိစ္စတွေကို ဘယ်လို ဖြေရှင်းကြမလဲ။ နိုင်ဟံသာ ။ ။ ကျနော်တို့ မြင်တာကတော့ ကချင်ခေါင်းဆောင်တွေ၊ ပလောင်းခေါင်းဆောင်တွေက ကျနော်တို့နဲ့ ရင်းရင်းနှီးနှီး အားလုံး သိကြပါတယ်။ သူတို့သဘောထားကလဲ တမျိုးဘေးထွက်နေတာ မဟုတ်ပါဘူး။ တနိုင်ငံလုံး အပစ်အခတ်ရပ်စဲရေးကို သူတို့လည်း လိုလားပါတယ်။ တကယ်လို့ တနိုင်ငံလုံး အပစ်အခတ်ရပ်စဲရေး ဖြစ်သွားရင် သူတို့နယ်မြေမှာလည်း အခု ဖြစ်နေတဲ့ စစ်ပွဲတွေလည်း အလိုလို ရပ်နားသွားမှာပါလို့ ကျနော်တို့ အဲဒီလိုမြင်တယ်။ သူတို့လည်း အဲဒီလိုပဲ မျှော်လင့်ပါတယ်။ VOA သတင်းမှ ကူးယူဖေါ်ပြသည်။

အပြည့်အစုံသို့...

ပြန်ခေါက်ထားပါ...

မူးယစ်ဆေးတရားခံ ရှာပုံတော်

လိုင် ၁၀၊ ၂၀၁၄ - ဘိန်းဘုရင်အဖြစ် နံမည်ကြီးခဲ့တဲ့ပုဂ္ဂိုလ်တွေ ကွယ်လွန်သွားကြပေမယ့် မူးယစ်ဆေးလုပ်ငန်းဟာ မြန်မာပြည်မှာ ရှင်သန်ကြီးထွားနေပါတယ်။ တဦးတည်း၊ တဖွဲ့တည်းကို တရားခံသတ်မှတ်ပြီး အရေးယူရုံနဲ့ ဖြေရှင်းနိုင်တဲ့ ပြဿနာမဟုတ်ကြောင်း ဦးအောင်ခင် နဲ့ ကိုကျော်ကျော်သိန်းတို့က သုံးသပ်တင်ပြထားပါတယ်။ ဦးအောင်ခင်, ကျော်ကျော်သိန်း 10.07.2014 20:32 တရုတ်ပြည်တွင်းစစ်မှာ အရေးနိမ့်လို့ ရှမ်းပြည်နယ်မှာ ၁၉၅၁ က ဝင်ရောက်ခိုလှုံခဲ့တဲ့ KMT တရုတ်တပ်ရင်းအချို့ က စတင်ခဲ့တဲ့ ဘိန်းလုပ်ငန်းဟာ အခုအထိ ရှင်သန်နေတုန်း ဖြစ်ပါတယ်။ အနှစ် (၆၀) ကျော်ကာလမှာ မူးယစ်ဆေးတရားခံအဖြစ် နံမည်ကြီးခဲ့သူတွေ ကွယ်လွန်သွားကြပေမယ့် မူးယစ်ဆေး ထုတ်လုပ်မှုဟာ တိုးပွားနေပါတယ်။ တကယ်တော့ ဘိန်းထုတ်လုပ်မှု တိုးပွားလို့သာ ဘိန်းဘုရင်တွေ ပေါ်လာတာဖြစ်လို့ သူတို့မရှိလည်း ဘိန်းအထွက် တိုးနေပါတယ်။ ရှမ်းပြည်နယ်က တိုင်းရင်းသားတွေ ဆင်းရဲမွဲတေနေလို့ ဘိန်းစိုက်ရတာလို့ ရှမ်းမူးယစ်ဆေးနှိမ်နင်းရေးအဖွဲ့ခေါင်းဆောင် ဦးခွန်စိုင်းက ပြောပါတယ်။ ရှမ်းပြည်နယ်မှာ မြို့ နယ် (၅၅) ခုရှိတဲ့အနက် ဝ (၄) မြို့ နယ်နဲ့ ကိုးကန့် (၃) မြို့ နယ် စုစုပေါင်း (၇) မြို့ နယ်မှာသာ ဘိန်းစိုက်ပျိုးမှု ကင်းရှင်းပြီး ကျန်တဲ့ (၄၈) မြို့ နယ်မှာ အနည်းနဲ့အများ ဘိန်းစိုက်နေတုန်းပဲလို့ ဦးခွန်စိုင်း ပြောတာကို ဇူလိုင် (၁) ရက်နေ့ထုတ် သျှမ်းသံတော်ဆင့်မှာ ဖော်ပြထားပါတယ်။ အစိုးရတပ်၊ ပြည်သူ့စစ်နဲ့ တောင်လှန်ရေးတပ်ဖွဲ့တွေကို ဆက်ကြေးမပေးဘူး၊ အလှူအတန်းမလုပ်ဘူးဆိုရင် ဘိန်းမစိုက်ဘဲ စိုက်ပျိုးလုပ်ကိုင်စားသောက်နိုင်တယ်လို့ ဆိုပါတယ်။ လက်နက်ကိုင်ပဋိပက္ခကြောင့် ဆင်းရဲတွင်းနက်လာတဲ့ ရှမ်းပြည်သူလူထုဟာ ဘဝရပ်တည်ရေးအတွက် ဘိန်းစိုက်နေကြရတာ ဖြစ်ပါတယ်။ မူးယစ်ဆေးကြောင့် သိက္ခာကျစရာ ဖြစ်လာရင် အစိုးရက တရားခံရှာပြီး အပြစ်ပေးလေ့ရှိပါတယ်။ ဘိန်းဘုရင်အဖြစ် နာမည်ကြီးတဲ့ လော်စစ်ဟန်ကို ထိုင်းအစိုးရက ဘန်ကောက်မှာ (၁၉၇၃) ခုနှစ်က ဖမ်းဆီးပြီး ရန်ကုန်ကို ပို့ပေးခဲ့ပါတယ်။ လောစစ်ဟန် ထောင်ကျပေမယ့် စစ်ခေါင်းဆောင်ပိုင်းနဲ့ အဆင်ပြေတာမို့ တရားဝင်စီးပွားရှာခွင့်ရတဲ့အတွက် ကုဋေကြွယ်သူဌေးကြီး ဖြစ်လာပါတယ်။ လော်စစ်ဟန်လိုပဲ ပြည်သူစစ်ဘဝကနေ ဘိန်းဘုရင်ဖြစ်လာတဲ့ စိုင်းနော်ခမ်းကတော့ ဇာတ်သိမ်းမကောင်းပါဘူး။ ၂၀၁၁ က မဲခေါင်မြစ်ကြောင်းမှာ တရုတ်သင်္ဘောသား (၁၃) ဦး အသတ်ခံရမှုဟာ တရုတ်အစိုးရ သိက္ခာကျစရာ ဖြစ်လာလို့ မဖြစ်မနေ တရားခံရှာရပါတယ်။ ဒီအချိန်မှာ ဘိန်းရာဇာဖြစ်နေတဲ့ စိုင်းနော်ခမ်းနဲ့ အပေါင်းပါတွေကို လာအိုနိုင်ငံမှာ ဖမ်းဆီးမိပြီး ယူနန်ကို ပို့လိုက်ပါတယ်။ နော်ခမ်းနဲ့အဖွဲ့ကို သေဒဏ်ပေးနိုင်လို့ တရုတ်အစိုးရ ကျေနပ်သွားပေမယ့် မူးယစ်ဆေး ရေစီးကြောင်းကတော့ ပုံမှန်အတိုင်း ပြန်ပြီးစီးဆင်းနေပါတယ်။ ဈေးကွက်စီးပွားရေးခေတ်မှာ ပြည်သူ့စစ်နဲ့ အစိုးရတပ်ဟာ မူးယစ်ဆေးနဲ့ ရန်ပုံငွေရှာပါတယ်။ ကွတ်ခိုင်မြို့ နယ်မှာ မူးယစ်ဆေးစခန်းပုန်းတခု ဖမ်းမိတာကို လွန်ခဲ့တဲ့ နိုဝင်ဘာလ (၁၁) ရက်ထုတ် အစိုးရသတင်းစာတွေမှာ ဖော်ပြပေမယ့် မုံးစီးပြည်သူ့စစ်ရဲ့  ဘိန်းချက်စခန်းဖြစ်တာကိုတော့ ကွယ်ဝှက်ထားပါတယ်။ ပြည်သူ့စစ်ကို တရားခံရှာတာမျိုး မလုပ်ချင်တာ ထင်ရှားနေပါတယ်။ ဒါပေမဲ့ ရာဘ (ခေါ်) စိတ်ကြွဆေး ထုတ်လုပ်တာဟာ ဘိန်းစိုက်တာထက် ပိုဆိုးတယ်လို့ ဦးခွန်စိုင်း က ပြောဆိုပါတယ်။ ငွေရင်းရှိတဲ့ သူဌေးတွေက ရာဘ ကို ထုတ်လုပ်ရောင်းချပြီး ပြည်သူလူထု က စားသုံးတာ ဖြစ်တဲ့အတွက် လူ့အဖွဲ့အစည်းတခုလုံးကို ယိုယွင်းပျက်စီးစေတဲ့ မူးယစ်ဆေးအမျိုးအစား ဖြစ်တယ်လို့ ဆိုပါတယ်။ တရုတ်အစိုးရ ဖိအားပေးမှုကြောင့် ကိုးကန့်နဲ့ ဝ ဒေသမှာ ဘိန်းမစိုက်တာ နှစ်အတော်ကြာပြီဖြစ်ပေမယ့် ဘိန်းအထွက် တိုးနေပါတယ်။ အကြောင်းကတော့ အစိုးရတပ်နဲ့ ပြည်သူ့စစ် ချုပ်ကိုင်ရာဒေသတွေမှာ ဘိန်းစိုက်ပျိုးမှု တိုးပွားလာလို့ ဖြစ်ပါတယ်။ ရှမ်းပြည်နယ်မှာတင် ပြည်သူ့စစ်ပေါင်း တစ်ရာကျော်ရှိပြီး အပြိုင်အဆိုင် ရန်ပုံငွေရှာကြကြောင်း သိရပါတယ်။ ပြည်သူ့စစ်ရဲ့  တာဝန်ဟာ အစိုးရပေါ်လစီနဲ့ ကြံ့ဖွံ့ပါတီကို ထောက်ခံဖို့သာ ဖြစ်ပါတယ်။ တချို့ဆိုရင် ပြည်နယ်လွှတ်တော်နဲ့ အမျိုးသားလွှတ်တော်မှာ ကိုယ်စားလှယ်တွေ ဖြစ်နေကြပါတယ်။ ကြံ့ဖွံ့ပါတီဝင် လွှတ်တော်ကိုယ်စားလှယ် ဦးကျော်မြင့် (ခေါ်) ဂီဟောင်းကျင်းရဲ့  ပြည်သူ့စစ်ကြီးစိုးတဲ့ နမ့်ခမ်းမြို နယ်မှာ မူးယစ်ဆေးဝါးရောင်ဝယ်သူတွေ နေ့စဉ်တိုးပွားနေကြောင်း လွန်ခဲ့တဲ့ မေလ (၁၅) ရက်နေ့ထုတ် သျှမ်းသံတော်ဆင့်မှာ ဖော်ပြထားပါတယ်။ ဒါပေမဲ့ ရှမ်းပြည်နယ်က မူးယစ်ဆေးလုပ်ငန်းကို ငွေရင်းထောက်ပံ့ပြီး ကြိုးကိုင်နေသူဟာ တိုင်းရင်းသားလတ တိုင်းရင်းသား လက်နက်ကို မဟုတ်ဘဲ။ ပြည်ပက တရုတ်တွေသာ ဖြစ်တယ်လို့ Transitional Institute က ဆိုပါတယ်။ ပြည်ပအခြေစိုက် တရုတ်တွေက ငွေကြေးထောက်ပံပြီး ပြည်တွင်းလက်နက်က မူးယစ်ဆေးထုတ်လုပ်နိုင်မယ့် နေရာဒေသကို ဖန်းတီးပေးတဲ့အတွက်၊ မူးယစ်ဆေးလုပ်ငန်း သက်ဆိုးရှည်နေတာ ဖြစ်ပါတယ်။ မူးယစ်ဆေးလုပ်ငန်းဟာ အမြတ်အစွန်းများတဲ့အတွက် စစ်ဗိုလ်နဲ့ အရပ်ဘက်အရာရှိတွေ ငွေရှာတဲ့လုပ်ငန်း ဖြစ်လာပါတယ်။ ဒေသခံနိုင်ငံရေးသမား၊ အစိုးရအမှုထမ်း၊ စစ်ဗိုလ်၊ ပြည်သူ့စစ်၊ တိုင်းရင်းသားလက်နက်ကိုင်၊ ပြည်ပအခြေစိုက် တရုတ်စီးပွားရေးသမား စတဲ့ လူတန်းစားတွေအားလုံး မူးယစ်ဆေးလုပ်ငန်းမှာ ပါဝင်ပတ်သက်ပြီး အပေးအယူ လုပ်နေကြတာမို့ တဦးတည်းတဖွဲ့တည်းကို အပြစ်ပုံချပြီး တရားခံရှာတာမျိုး မြန်မာပြည်မှာ လုပ်လေ့မရှိပါဘူး။ မူးယစ်ဆေးပြဿနာဟာ တိုင်းရင်းသားတွေရဲ့  နိုင်ငံရေးနဲ့ စီးပွားရေးကိစ္စ ဖြစ်တာမို့ အမျိုးသားပြန်လည်သင့်မြတ်ရေး ရယူပြီး နိုင်ငံရေးပြဿနာ ဖြေရှင်းနိုင်မယ်။ နှစ်ပေါင်းများစွာ ဆင်းရဲမွဲတေနေတဲ့ ပြည်သူလူထုကို ဝမ်းစာဖူလုံအောင် အကူအညီပေးမယ့် တရားဥပဒေနဲ့ ထိန်းကွပ်နိုင်မယ် ဆိုရင်တော့ မူးယစ်ဆေးပြဿနာကို ဖြေရှင်းနိုင်လိမ့်မယ်လို့ ဦးခွန်စိုင်းက မှတ်ချက်ချပါတယ်။

အပြည့်အစုံသို့...

ပြန်ခေါက်ထားပါ...

၆၇နှစ်မြောက် KNDO နေ့ အခမ်းအနား ကျင်းပပြီးစီး

ဇူလိုင် ၁၈ရက်၊ ၂၀၁၄ခုနှစ်။ နန်းဝေဖြိုးဇာ ပြီးခဲ့သည့် ဇူလိုင် ၁၆ ရက်နေ့တွင် ကျရောက်သော ၆၇နှစ်မြောက် ကရင်အမျိုးသားကာကွယ်ရေးတပ်ဖွဲ့(KNDO)ကို ကရင်အမျိုး သားအစည်းအရုံး (ကေအဲန်ယူ) ဖာပွန်(မုတြော်)ခရိုင်၊ တပ်မဟာ-၅ ရှိ KNDO တပ်ရင်း(၁)နေရာနှင့် ဗဟိုဌာနချုပ်တွင် ကျင်းပ ပြီးစီးခဲ့သည်။ အခမ်းအနားတွင် KNDO အပါအ၀င် ကေအဲန်ယူ အရပ်ဘက်၊ စစ်ဘက်တာဝန်ရှိသူများ၊ ကရင်လူထုအခြေပြုအဖွဲ့ အစည်းများ၊ ထိုင်း-မြန်မာနယ်စပ်အခြေစိုက် ဒုက္ခသည်စခန်းများမှ ဒုက္ခသည်များနှင့် ထိုင်းစစ်ဘက် အရပ်ဘက်အရာရှိများ၊ ရခိုင်တပ်မတော် ခေါင်းဆောင်များ စသည်တို့ အပါအ၀င် စုစုပေါင်း လူဦးရေ ၄၀၀ကျော် တက်ရောက်ခဲ့ကြသည်ဟု သိရသည်။ ယင်းအခမ်းအနားတွင် KNDO ဦးစီးချုပ် ဗိုလ်မှူးချုပ် စောနယ်ဒါးမြက KNDO စတင် ဖြစ်ပေါ်လာပုံ၊ ရပ်တည်ချက်၊ လုပ်ဆောင် ချက်၊ နောက်ခံသမိုင်းကြောင်းနှင့် ခေါင်းဆောင်များ၏ မိန့်ခွန်းစကားများကို ပြောကြားခဲ့သည်ဟု ကေအိုင်စီသို့ ပြောသည်။ “ဒီနေ့ဟာ တကယ့်အရေးကြီးတဲ့နေ့ KNDO က ၁၉၄၉ ခုနှစ်ကစပြီး အခုချိန်ထိ တိုင်းပြည်နဲ့ လူမျိုးအတွက် အလုပ်လုပ်နေတုန်း ပဲ။ ဆက်ပြီးတော့ ရည်မှန်းချက်ရောက်တဲ့အထိ လုပ်ဆောင်နေဦးမှာပဲ”ဟု ဗိုလ်မှူးချုပ်စောနယ်ဒါးမြက ပြောဆိုသည်။ ယခု ၂၀၁၄ခုနှစ်တွင် ကျရောက်သော ၆၇နှစ်မြောက် KNDO နေ့ကို KNU တပ်မဟာနေရာများ၌ ပြုလုပ်ကျင်းပခဲ့ကြသလို ထိုင်း-မြန်မာနယ်စပ်ရှိ ကရင်ဒုက္ခသည်စခန်းရှိ စာသင်ကျောင်းအချို့၌လည်း ဟောပြောပွဲများ ကျင်းပခဲ့သည်ဟု သိရသည်။ “KNDO နေ့ကို ကျနော်တို့ဒုက္ခသည်စခန်းက စာသင်ကျောင်းအချို့တွေမှာတော့ ဟောပြောပွဲတွေ ကျင်းပတာတော့ ရှိတယ်။ အခုလို ဒီနေ့နဲ့ပတ်သက်ပြီး ဟောပြောပွဲတွေ လုပ်ပေးတဲ့အတွက် မသိထားတဲ့အရာတွေလည်း သိလာရတယ်။ ဗဟုသုတတွေ လည်း အများကြီး ရလာတာပေါ့”ဟု နို့ဖိုးဒုက္ခသည်စခန်းမှ ကျောင်းသားတစ်ဦးဖြစ်သူ စောဝါးရှီးက ကေအိုင်စီသို့ ပြောသည်။ KNDO သည် လက်ရှိ အစိုးရနှင့် ကေအဲန်ယူ အပစ်အခတ်ရပ်စဲထားချိန်တွင် မိုင်းရှင်းလင်းရေးလုပ်ငန်းများနှင့် မိုင်းရှင်းလင်းရေး သင်တန်းများကို ပြုလုပ်ပေးလျှက်ရှိပြီး ကျေးရွာကာကွယ်ရေးတပ်ဖွဲ့အဖြစ်လည်းကောင်း၊ ကာကွယ်ရေးနှင့် လုံခြုံရေးရဲတာဝန် အဖြစ်လည်းကောင်း တာဝန်ထမ်းဆောင်လျှက်ရှိသည်။ KNDO ကို ၁၉၄၆ခုနှစ်၊ ဇူလိုင် ၁၆ရက်တွင် ကရင်အမျိုးသားကာကွယ်ရေးတပ်ဖွဲ့ကို စတင်ဖွဲ့စည်းခဲ့ပြီး ယင်းနောက် ရန်ကုန်၊ အလုံ၊ စမ်းချောင်းတွင် စစ်သင်တန်းများပေးကာ ၁၉၄၉ခုနှစ် ကရင်တော်လှန်ရေး စတင်ဖြစ်ပေါ်လာသည့်အချိန်တွင် KNDO သည် ကရင်အမျိုးသားတရပ်လုံးအတွက် တိုက်ပွဲဝင်ကာ ယခုအချိန်ထိဖြစ်သည်။

အပြည့်အစုံသို့...

ပြန်ခေါက်ထားပါ...

ကေအဲန်ယူ ခေါင်းဆောင် ၅ဦးကို လိုင်ဇာညီလာခံတက်ရန် အရေးပေါ်အစည်းအဝေး၌ ရွေးချယ်

ဇူလိုင် ၁၇ရက်၊ ၂၀၁၄ခုနှစ်။ စဖန်းရှောင်း လာမည့် ဇူလိုင် ၂၄ရက်နေ့၌ ကချင်ပြည်နယ်၊ လိုင်ဇာမြို့တွင် ပြုလုပ်မည့် တိုင်းရင်းသားလက်နက်ကိုင်အဖွဲ့အစည်းများ ညီလာခံ သို့ တက်ရောက်ရန် ကရင်အမျိုးသားအစည်းအရုံး(ကေအဲန်ယူ)၏ ဥက္ကဌ ဗိုလ်ချုပ်ကြီးစောမူတူးစေးဖိုး ပါဝင်သည့် ကိုယ်စား လှယ်ခေါင်းဆောင် ၅ဦးကို ယမန်နေ့က အတည်ပြု ရွေးချယ်လိုက်သည်။ ဇူလိုင်လ ၁၄ရက်မှ ၁၆ရက်နေ့အထိ ကရင်ပြည်နယ်ရှိ ကေအဲန်ယူထိန်းချုပ်နယ်မြေ ဖားအံခရိုင်၊ လေးဝါးစခန်း၌ ပြုလုပ်သော ကေအဲန်ယူ ဗဟိုအမြဲတမ်းကော်မတီဝင်များ အရေးပေါ်အစည်းအဝေးတွင် ဥက္ကဌ စောမူတူးစေးဖိုး၊ အထွေထွေ အတွင်းရေးမှူး ပဒိုစောကွယ်ထူးဝင်း၊ ဗဟိုအလုပ်အမှုဆောင်များဖြစ်ကြသည့် ပဒိုစောတာဒို့မူး၊ ပဒိုမန်းငြိမ်းမောင်နှင့် KNLA စစ်ထောက်ချုပ် ဗိုလ်ချုပ်စောအိုင်းဇက်တို့ကို လိုင်ဇာတွင်ကျင်းပမည့် ယင်းညီလာခံအတွက် ရွေးချယ်ခဲ့ခြင်းဖြစ်သည်။ လိုင်ဇာညီလာခံသို့ သွားရောက်မည့် ကိစ္စနှင့်ပတ်သက်၍ ကေအဲန်ယူ အထွေထွေအတွင်းရေးမှူး ပဒိုစောကွယ်ထူးဝင်းက “အခု သွားမယ့် ကိုယ်စားလှယ်တွေအနေနဲ့ ကျနော်တို့ တိုင်းရင်းသားဘက်က NCCT နဲ့ အစိုးရဘက်က UPWC တို့ သဘောတူထား တဲ့ ဒုတိယမူကြမ်းအပေါ် အခြေခံပြီးတော့ NCCT ဘက်ကနေ ကြုံတွေ့ရတဲ့ အခက်အခဲတွေ၊ သုံးသပ်ချက်တွေ၊ အကြံပြုချက် တွေကို အခြေခံပြီး ညီလာခံမှာ ဆွေးနွေးသွားမှာ ဖြစ်ပါတယ်”ဟု ကေအိုင်စီသို့ ပြောသည်။ လိုင်ဇာညီလာခံ ဆုံးဖြတ်ချက်အပေါ်မှုတည်ပြီး တစ်နိုင်ငံလုံးအပစ်အခတ်ရပ်စဲရေး စာချုပ်ချုပ်ဆိုနိုင်ရန်အတွက် ထပ်မံ ဆွေးနွေး မည့်အချိန်ကို ဆုံးဖြတ်နိုင်မည်ဖြစ်ပြီး ပြည်ထောင်စု ငြိမ်းချမ်းရေးဖော်ဆောင်ရေးလုပ်ငန်းကော်မတီ(UPWC)နှင့် တစ်နိုင်ငံလုံး အပစ်အခတ်ရပ်စဲရေး ညှိနှိုင်းရေးအဖွဲ့ (NCCT) တို့မှ ဆက် လက်ညှိုနှိုင်း ဆွေးနွေးသွားရမည်ဖြစ်ကြောင်း ပဒိုကွယ်ထူးဝင်းက ဆက်ပြောသည်။ ထို့အပြင် လေးဝါးစခန်းတွင် ပြုလုပ်သည့် ၎င်းအရေးပေါ်အစည်းအဝေးတွင် ကေအဲန်ယူ ဗဟိုအမြဲတမ်းကော်မတီဝင် အရပ် ဘက်၊ တပ်ဘက်ခေါင်းဆောင် ၃၈ဦး တက်ရောက်ခဲ့ကြပြီး လိုင်ဇာတွင် ဇူလိုင်လ ၂၄-၂၆ရက်အထိ ကျင်းပမည့် ညီလာခံနှင့် တပ်ပြန်လည်နေရာချထားရေး Code of Conduct ၊ ကရင်ပြည်နယ်အတွင်း ဖြစ်ပွားနေသည့် မူးယစ်ဆေးဝါးကိစ္စများ၊ လက်ရှိ ဖြစ်ပေါ်နေသော ဒုက္ခသည်အရေးများ၊ ကရင်အမျိုးသားအဖွဲ့များ စည်းလုံးညီညွတ်ရေး စသည့်ကိစ္စရပ်များကို အစည်းအဝေးတွင် ဆွေးနွေးခဲ့ကြသည်။ အစည်းအဝေးတွင် ပါဝင်သူ ကေအဲန်ယူ ဗဟို စည်းရုံးရေးနှင့် ပြန်ကြားရေးဌာန တာဝန်ခံ ပဒိုစောလှထွန်းက “အဓိကဆွေးနွေး တာကတော့ တစ်နိုင်ငံလုံး အပစ်အခတ်ရပ်စဲနိုင်ရေးအတွက် အစိုးရနဲ့ ကျနော်တို့ တိုင်းရင်းသားတို့ ချုပ်ဆိုခဲ့တဲ့ ဒုတိယမူကြမ်း ထဲမှာပါတဲ့ ရပ်တည်ချက်တွေ စကားလုံးဝေါဟာရ အနက်အဓိပ္ပါယ်တွေနဲ့ ပတ်သက်ပြီး အဓိက ဆွေးနွေးခဲ့ကြတာ ဖြစ်ပါတယ်” ဟု ကေအိုင်စီသို့ ပြောသည်။ အဆိုပါကိုယ်စားလှယ်များအနေဖြင့် မည်သည့်နေ့ရက်တွင် လိုင်ဇာသို့ စတင်ထွက်ခွာမည်ကို လက်ရှိအချိန်တွင် အတိအကျ မပြောဆိုနိုင်သေးကြောင်းလည်း ပဒိုစောလှထွန်းက ဆက်လက်ပြောဆိုသည်။ ကေအဲန်ယူအနေဖြင့် တနိုင်ငံလုံး အပစ်အခတ်ရပ်စဲရေး လော်ခီးလာသဘောတူစာချုပ်နှင့် အစိုးရဘက်က ပြင်ဆင်ထားသည့် စာချုပ်များကို မူကြမ်းတစ်ခုတည်းဖြစ်အောင် ပြင်ဆင်ရေးဆွဲနိုင်ရန်အတွက် ၎င်းတို့၏ ဗဟိုအမြဲတမ်းကော်မတီဝင်များ အရေးပေါ် အစည်းအဝေးကို လေးဝါးစခန်းတွင် ပြီးခဲ့သည့် မတ်လ ၂၄ရက်မှ ၂၇ရက်နေ့ကလည်း ကျင်းပပြုလုပ်ခဲ့သေးသည်။

အပြည့်အစုံသို့...

ပြန်ခေါက်ထားပါ...

မြန်မာဒုက္ခသည်ပြန်လာရေး အခက်အခဲ ကုလထောက်ပြ

16.07.2014 ထိုင်းမြန်မာနယ်စပ်မှာ ခိုလှုံနေကြတဲ့ မြန်မာနိုင်ငံသား ဒုက္ခသည်တွေ နေရပ်ရင်းပြန်ပို့နိုင်ရေး အကူအညီပေးမှာ ဖြစ်ပေမဲ့ လတ်တလောမှာတော့ ဒုက္ခသည်တွေ ပြန်လည်အခြေချမယ့် ဒေသတွေမှာ အဆင်သင့် မဖြစ်သေးဘူးလို့ ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) က ပြောပါတယ်။ ဒုက္ခသည်အရေး ကြိုးပမ်းနေသူတွေကလည်း ထိုင်းနိုင်ငံမှာ ခိုလှုံနေသူတွေ ပြန်လည်အခြေချနိုင်ဖို့ မြေမြှုပ်မိုင်းတွေ ရှင်းလင်းတာ အပါအ၀င် ဘေးကင်းလုံခြုံမှုနဲ့ တည်ငြိမ်မှုတွေရှိဖို့ လိုအပ်နေဆဲ ဖြစ်တယ်လို့ သတိပေးနေကြတာပါ။ အပြည့်အစုံကိုတော့ ဗွီအိုအေ မြန်မာပိုင်းရဲ့ သတင်းထောက် ကိုမိုးဇော်က သတင်းပေးပို့ထားပါတယ်။ ထိုင်းနိုင်ငံ စစ်အစိုးရအဖွဲ့ခေါင်းဆောင် ဗိုလ်ချုပ်ကြီး Prayuth Chan-ocha က ထိုင်းနိုင်ငံရှိ စခန်း ၉ ခုက မြန်မာနိုင်ငံသား ဒုက္ခသည် ၁ သိန်း ၃ သောင်းလောက်ကို နေရပ်ရင်း ပြန်ပို့ဖို့အတွက် ဒီရက်ပိုင်းအတွင်း ပြောဆိုထားတာဖြစ်သလို မြန်မာအစိုးရ တာဝန်ရှိသူတွေလည်း နေရပ်ရင်းပြန်မယ့် ဒုက္ခသည်တွေအတွက် အဆင်သင့်ဖြစ်အောင် စီစဉ်နေတယ်လို့ ပြောဆိုထားတာဖြစ်ပါတယ်။ ဒုက္ခသည်တွေ ပြန်လည် နေရာချထားရေး အစီအစဉ်နဲ့ ပတ်သက်ပြီး ဗွီအိုအေက ရန်ကုန်မြို့အခြေစိုက် ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး UNHCR ကို မေးမြန်းရာမှာတော့ - မိမိသဘော ဆန္ဒအလျောက် နေရပ်ပြန်လိုတဲ့ ဒုက္ခသည်တွေကို ဘေးကင်းလုံခြုံပြီး ဂုဏ်သိက္ခာမထိခိုက်ဘဲ နေရပ်ပြန်နိုင်ဖို့အတွက် ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံးက သက်ဆိုင်ရာနိုင်ငံတွေက အာဏာပိုင်တွေ၊ မိတ်ဖက်အဖွဲ့အစည်းတွေ၊ လူမှုအသိုင်းတွေနဲ့အတူ လက်တွဲ ဆောင်ရွက်နေကြောင်း UNHCR ရုံးက တာဝန်ရှိသူက အီးမေးလ်က တဆင့် ပြန်ကြားပါတယ်။ ဒါပေမဲ့လည်း လောလောဆယ်မှာတော့ ဒုက္ခသည်တွေ အများစုရဲ့ နေရပ်ရင်းဖြစ်တဲ့ မြန်မာနိုင်ငံ အရှေ့တောင်ပိုင်းဒေသက အခြေအနေတချို့အရ ဒုက္ခသည်တွေ စည်းစနစ်တကျ နေရပ်ပြန်ရေး လုပ်ငန်းတွေကို တိုးမြှင့်လုပ်ဆောင်ဖို့အတွက် အပြည့်အ၀ ပံ့ပိုးဆောင်ရွက်ဖို့ မဖြစ်နိုင်သေးကြောင်း သုံးသပ်ထားပါတယ်။ ဒီအခြေအနေတွေကတော့ ခိုင်မာတဲ့ အပစ်အခတ်ရပ်စဲရေး သဘောတူညီချက်တွေ မရရှိသေးတာ၊ မြေမြှုပ်မိုင်းတွေ မရှင်းလင်းရသေးတာနဲ့ အချို့ဒေသတွေမှာ လမ်းပန်း ဆက်သွယ်ရေး အခက်အခဲ၊ မြေယာနဲ့ သက်မွေးဝမ်းကြောင်း အခက်အခဲ စတာတွေ ပါဝင်တယ်လို့ ဖော်ပြပါတယ်။ နေရပ်မပြန်လိုသူတွေနဲ့ တတိယနိုင်ငံတွေကို ရွှေ့ပြောင်းလိုသူတွေနဲ့ ပတ်သက်လို့တော့ ဘာသဘော တူညီချက်မှ ချမှတ်ထားတာ မရှိသေးဘူးလို့ ပြန်ကြားထားပါတယ်။ ကရင်နီအမျိုးသားတိုးတက်ရေး ပါတီက ဗဟိုအလုပ်အမှုဆောင် တဦးဖြစ်တဲ့ ဦးဒယ်နီရယ် ကတော့ ဒုက္ခသည်တွေ ပြန်ပို့မယ်ဆိုရင် အဓိက နိုင်ငံရေး တည်ငြိမ်မှုရှိဖို့ လိုအပ်ကြောင်း အခုလို ပြောပါတယ်။ “အဓိကအရေးကြီးဆုံးကတော့ ဒီနိုင်ငံရေးအပိုင်းပဲပေါ့။ တကယ် မြန်မာပြည်မှာ အပစ်အခတ်ရပ်စဲရေးတို့၊ ငြိမ်းချမ်းရေးတို့က ခိုင်ခိုင်မာမာ ရှိနေဖို့က လိုတယ်။ နိုင်ငံရေးပြေလည်မှသာလျှင် ဒီဟာတွေကို စဉ်းစားပေးတယ်ပေါ့နော်။ ဒါကတော့ အဓိက နိုင်ငံရေး တည်ငြိမ်ဖို့က အဓိကကျတာပေါ့။ ဒါတွေ ပြင်ဆင်ထားဖို့ လိုပါတယ်။ အဲ့ဒါကတော့ ဗမာပြည်အစိုးရဘက်ကပေါ့နော် ထိုင်းနိုင်ငံမှာ လက်ရှိ စစ်အာဏာ သိမ်းပြီးတဲ့ကာလ ဖြစ်နေလို့ ဒါက ဒုက္ခသည်တွေအတွက် အခွင့်အရေး ပြည့်ပြည့်၀၀ ရှိနေတဲ့အချိန် ဖြစ်ချင်မှဖြစ်မယ်ပေါ့လေ။ ဒီမိုကရေစီ အစိုးရလက်ထက်မှသာလျှင် ဒါတွေကို စဉ်းစားသင့်ပါတယ်။” နိုင်ငံရေးအရ တည်ငြိမ်တဲ့တိုင်အောင် အခြားလိုအပ်ချက်တွေလည်း ရှိနေသေးတယ်လုိ့ ဦးဒယ်နီရယ်က အခုလို ဆက်ပြောပါတယ်။ “ဒုက္ခသည်အပိုင်းနဲ့ ပတ်သက်လာရင် ဒီနယ်စပ်တလျှောက်မှာ နှစ်ပေါင်း ၆၀ လောက် စစ်မြေပြင်လို ဖြစ်နေတယ်ပေါ့။ အဲ့ဒီနေရာမှာ ဒုက္ခသည်တွေအတွက်က မြေမြုပ်မိုင်းတွေ ဘာတွေ အရင်ဆုံး ရှင်းလင်းထားသင့်တယ်။ အဲ့ဒါကတော့ ဒုတိယအရေးကြီးတယ်ပေါ့။ နောက် သူတို့ရဲ့ ဘ၀ အာမခံချက်အတွက်က ဘာတွေလဲ။ စသဖြင့်က ဒါတွေပေါ့ စီစဉ်ရမှာ အများကြီးပါ။ ဥပမာလေ သူတို့ ပြန်လာတာနဲ့ သူတို့အတွက် ဘာတွေ ထောက်ပံ့မလဲ။ ဘယ်ကနေရမလဲ။ ဘယ်နှစ်နှစ် ထောက်ပံ့မလဲ စသဖြင့် အဲဒါတွေလည်း ပြင်ဆင်ဖို့က အများကြီး လိုအပ်ပါတယ်။ ဒုက္ခသည်တွေ သဘောထား မေးမြန်းရမှာ စသဖြင့် အဲ့ဒါတွေပေါ့လေ။” အခုလို ဒုက္ခသည်တွေကို ပြန်ပို့ဖို့ သတင်းတွေ ထွက်ပေါ်နေချိန်မှာပဲ ကရင်ပြည်နယ် ဖာပွန်ခရိုင်အတွင်းမှာ အပစ်အခတ်ရပ်စဲထားတဲ့ ကရင်အမျိုးသားအစည်းအရုံး KNU နဲ့ အစိုးရတပ်တွေအကြား ဒီလ ၁၅ ရက်နေ့က တိုက်ပွဲ ထပ်မံ ဖြစ်ပွားခဲ့ပါတယ်။ အစိုးရနဲ့ တိုင်းရင်းသား လက်နက်ကိုင်အဖွဲ့တွေအကြား တပြည်လုံးဆိုင်ရာ အပစ်အခတ်ရပ်စဲရေး စာချုပ်ကို သြဂုတ်လဆန်းမှာ လက်မှတ်ရေးထိုးဖို့ မူလက ရည်ရွယ်ထားပေမဲ့ စာချုပ်မူကြမ်းရေးဆွဲရာမှာ နှစ်ဘက် ကွဲလွဲချက်တွေ ရှိနေတာကြောင့် လောလောဆယ် ရက်ရွှေ့ဆိုင်းရမယ့် အခြေအနေ ရှိနေပါတယ်။ http://burmese.voanews.com/content/unhcr-refugee-/1958606.html

အပြည့်အစုံသို့...

ပြန်ခေါက်ထားပါ...

တနင်္သာရီမြို့နယ် ကေအဲန်ယူဒေသအတွင်း အစိုးရတပ်များ ပိုမိုလှုပ်ရှားလာ

ဇူလိုင်၂၀၁၄ခုနှစ်။ ကေအိုင်စီ တနင်္သာရီတိုင်းဒေသကြီး၊ တနင်္သာရီမြို့နယ်ရှိ ကရင်အမျိုးသားအစည်းအရုံး(ကေအဲန်ယူ) ထိန်းချုပ်ဒေသများတွင် ယခုလဆန်း ပိုင်းမှစ၍ အစိုးရစစ်တပ်များက လုံခြုံရေးစစ်သားများချထားခြင်း၊ တပ်စခန်းများ ပြင်ဆင်မွမ်းမံခြင်း၊ စခန်းတစ်ခုနှင့်တစ်ခု သွား လာနိုင်ရန် ကားလမ်းများ ဖောက်လုပ်ခြင်း စသည့်လှုပ်ရှားမှုများ ပိုမိုလုပ်ဆောင်လာကြောင်း ဒေသခံလူထု၏ ပြောပြချက်များအ ရ သိရသည်။ တနင်္သာရီမြို့နယ်၊ ကော်ဆဲဒေသရှိ လမ်းဆုံလမ်းခွများတွင် ယင်းသို့ လုပ်ဆောင်နေကြောင်း အမည်မဖော်လိုသူ မိုးတောင်ရွာ သားတစ်ဦးက “အခု စစ်တပ်လှုပ်ရှားမှုတွေက အရင် အပစ်အခတ် မရပ်စဲခင်အတိုင်းပါပဲ။ လမ်းဖောက်၊ စခန်းပြင်၊ တပ်အ ပြောင်းအလဲ၊ အဲဒါတွေကို အဆက်မပြတ်ပဲ လုပ်တယ်။ အရင်က အဲဒါတွေကို မတွေ့ရဘူး။ အခြေအနေက နည်းနည်း ပိုဆိုးလာ သလိုပဲ”ဟု ကေအိုင်စီသို့ ပြောသည်။ အဆိုပါ အစိုးရစစ်တပ် လှုပ်ရှားမှုများလာသည့်နေရာမှာ ကရင်အမျိုးသားလွတ်မြောက်ရေးတပ်မတော် ကေအဲန်အယ်လ်အေ တပ်ရင်း(၁၁)နယ်မြေဖြစ်ပြီး ဇွန်လ ၁၃ရက်နေ့က ကေအဲန်အယ်လ်အေ တပ်သား(၁)သေဆုံးကာ (၁)ဦးဒဏ်ရာရရှိခဲ့သည့် အစိုး ရစစ်တပ်နှင့် ကေအဲန်ယူ တပ်ဖွဲ့ဝင်တို့ကြား ပစ်ခတ်မှုဖြစ်ပွားခဲ့ပြီးနောက် ယခုကဲ့သို့ အစိုးရစစ်တပ်ဘက်မှ လှုပ်ရှားမှု ပိုမိုလုပ် ဆောင်လာသည်ကို မြင်တွေ့ရခြင်းဖြစ်သည်ဟု ယင်းရွာသားက ဆက်ပြောသည်။ အလားတူ ကော့သောင်းအခြေစိုက် အစိုးရစစ်တပ် စကခ(၁၃)လက်အောက်ခံ အင်အား (၃၀၀)ကျော်ရှိ ခမရ(၄၃၂)၊ ခမရ (၅၅၈)နှင့် ခမရ(၅၆၀) တပ်ရင်းများသည် တပ်အပြောင်းအလဲလုပ်ရန်ဟုဆိုကာ တနင်္သာရီမြို့နယ်သို့ ယနေ့ ထပ်မံ ရောက်ရှိ လာကြောင်းလည်း နယ်မြေခံ ကေအဲန်ယူသတင်းရပ်ကွက်အရ သိရသည်။ ထိုဒေသရှိ ကေအဲန်အယ်လ်အေ တပ်ရင်း(၂၀၃)မှ အရာရှိတစ်ဦးက “အစိုးရစစ်တပ်က တပ်အပြောင်းအလဲ လုပ်တဲ့ပုံစံမျိုးလို လို။ တိုးချဲ့လာသလိုလို ရှင်းရှင်းလင်းလင်း မသိရဘူး။ အစိုးရစစ်တပ်တွေက တစ်ခုခုလုပ်ရင် ဒီအတိုင်းချည်းပဲ။ တစ်ခုမှ ရှင်းရှင်း လင်းလင်းမရှိဘူး”ဟု ပြောသည်။ အစိုးရစစ်တပ် လှုပ်ရှားမှုနှင့် ပတ်သက်၍ စစ်တပ်မှ တာဝန်ရှိသူများကို ဆက်သွယ်မေးမြန်း၍ မရသော်လည်း ၎င်းနယ်စပ်တွင် မြန်မာစစ်တပ်၏ လှုပ်ရှားမှုကို အနီးကပ် စောင့်ကြည့်နေသည့် ထိုင်းစစ်တပ်နှင့် နီးစပ်သူတစ်ဦးက “တပ်ရင်း ၃ရင်း၊ အင်အား ၃၀၀ကျော်နဲ့ စစ်ကားအများအပြား တက်လာတာမှန်ပါတယ်။ ဒီည တနင်္သာရီမြို့ အနီးအနားဝန်းကျင်မှာပဲ စခန်းချဖို့ များမယ်”ဟု ပြောသည်။ ကေအဲန်ယူ ဘိတ်-ထားဝယ်ခရိုင်၊ တပ်မဟာ(၄)တွင် အစိုးရ၏ စစ်ဆင်ကွပ်ကဲရေးဋ္ဌာနချုပ် စကခ(၂၀)၊ စကခ(၁၃)နှင့် စကခ (၈)တို့၏ လက်အောက်ခံ တပ်ရင်းပေါင်း ၅၀နီးပါး အခြေစိုက် လှုပ်ရှားလျှက်ရှိကြောင်း နယ်စပ်စစ်ရေးလေ့လာသူများက ပြော သည်။ ၎င်းအပြင် တနင်္သာရီတိုင်းဒေသကြီးရှိ ဒေသခံလူထုကို ကေအဲန်ယူအဖွဲ့ဝင်များနှင့် အဆက်အသွယ် မပြုလုပ်ရန် အစိုးရ စစ်တပ်ဘက်မှ ယခုလဆန်းပိုင်းက အမိန့်ထုတ်ပြန်ထားသည်ဟုလည်း ဒေသခံ ပြည်သူလူထုက ပြောဆိုနေကြသည်။

အပြည့်အစုံသို့...

ပြန်ခေါက်ထားပါ...

ကျောက်စိမ်း တူးဖော်ရေး ပြန်စမည်

ထုတ်လုပ်ပေးနေသည့် နေရာဖြစ်သော မြန်မာနိုင်ငံမြောက်ပိုင်းတွင် ကျောက်မျက် တူးဖော်ရေး ကုမ္ပဏီများ မကြာမီ လုပ်ငန်းများ စတင်နိုင်တော့မည်ဟု သိရသည်။ လက်နက်ကိုင် ပဋိပက္ခများကြောင့် ၂ နှစ်ကြာ ရပ်ဆိုင်းထားရခြင်း ဖြစ်သည်။ သယံဇာတ အရင်းအမြစ် ကြွယ်ဝသည့် ကချင်ပြည်နယ်တွင် စက်တင်ဘာလ ၁ ရက်နေ့မှ စတင်၍ အသေးစားနှင့် အကြီးစား တူးဖော်ရေး လုပ်ငန်းများ ပြန်လည် စတင်နိုင်မည်ဟု သတ္တုတွင်း ၀န်ကြီးဌာနက ဇူလိုင်လ ၈ ရက်နေ့ တွင် ထုတ်ပြန်ကြေညာခဲ့သည်။ ကချင်ပြည်နယ်တွင် အစိုးရတပ်ဖွဲ့များနှင့် တိုင်းရင်းသား လက်နက်ကိုင် အဖွဲ့တခုဖြစ်သည့် ကချင် လွတ်လပ်ရေး တပ်မတော် (KIA) တို့ တိုက်ပွဲများ ဖြစ်ပွားခဲ့သည့်အတွက် တူးဖော်ရေး လုပ်ငန်းများကို ၂၀၁၂ ခုနှစ်တွင် ရပ်နားထားခဲ့ရ သည်။ ရပ်ဆိုင်းထားစဉ် အတွင်း အသေးစားတူးဖော်သူများနှင့် လက်နှင့်တူး၍ ရှာဖွေသူများသာ တရားမ၀င် ခိုးဝှက် လုပ် ကိုင်နိုင်ခဲ့ကြသည်။ နှစ်ဘက် အပစ်အခတ်ရပ်စဲရေး မပြုလုပ်နိုင်သေးသော်လည်း အစိုးရနှင့် KIA တို့ လတ်တလောပြုလုပ်ခဲ့သည့် ငြိမ်းချမ်း ရေးဆွေးနွေးပွဲများတွင် တိုးတက်မှုများ ရရှိခဲ့သည်ဟု သတ္တုတွင်း ၀န်ကြီးဌာနက ဆိုသည်။ လုပ်ငန်းများ ပြန်လည်စတင်ရန် ဆုံးဖြတ်ချက်သည် မကြာသေးမီက နေပြည်တော်တွင် ပြုလုပ်ခဲ့သည့် နှစ်ပတ်လည် ကျောက်မျက်ရတနာပြပွဲ အပြီးတွင် ထွက်ပေါ်လာခြင်း ဖြစ်သည်။ အဆိုပါ ပြပွဲတွင် ကျောက်စိမ်းတွဲများ ပြသရောင်းချနိုင်မှု ယခင်နှစ် များထက် နည်းပါးခဲ့သည်။ သို့သော်လည်း ကျောက်စိမ်းရောင်းချရမှုသည် မျှော်မှန်းထားသည်ထက် ကျော်လွန် ခဲ့ ပြီး အမေရိကန်ဒေါ်လာ ၃.၄ ဘီလီယံ အထိရောက်ရှိခဲ့သည်။ ယမန်နှစ်က အမေရိကန်ဒေါ်လာ ၂.၆ ဘီလီယံသာ ရရှိခဲ့ သည်။ ကျောက်စိမ်းတူးဖော်ရေးနှင့် ကုန်သွယ်ရေး ရပ်ဆိုင်းသွားရခြင်းမှာ ကျောက်တွင်းများ ပိုင်ဆိုင်ရယူလိုမှုကို အစိုးရ စစ်တပ်နှင့် KIA အကြား အငြင်းပွားကာ စစ်ပွဲပိုပြီး အရှိန်မြင့်တက်စေသောကြောင့် ဖြစ်သည်။ ကျောက်စိမ်း အများဆုံးထွက်သည့် ကချင်ပြည်နယ် ဖားကန့်နှင့် လုံးခင်းဒေသများတွင် ၂၀၁၂ ခုနှစ် မတိုင်ခင်အထိ တူးဖော်ရေး ကုမ္ပဏီ ၇၀၀ ခန့် ရှိသည်ဟု သတ္တုတွင်း ၀န်ကြီးဌာန၊ မြန်မာ့ကျောက်မျက်ရတနာ လုပ်ငန်းမှ တာဝန်ရှိသူတဦး က ပြောသည်။ “လိုင်စင် ရထားတဲ့ ကုမ္ပဏီတွေက သူတို့အလုပ်တွေ ပြန်စနိုင်ပြီး ကျောက်စိမ်းတွေရှာဖွေဖို့ တက်ကြွနေကြတုန်းပဲ။ ဒါပေမယ့် သူတို့ လိုင်စင်တွေကို အသစ်ပြန်လုပ်ဖို့ လိုပါတယ်” ဟု အဆိုပါ တာဝန်ရှိသူက ဧရာဝတီသို့ ပြောသည်။ “အစိုးရက ကျောက်စိမ်းတူးဖော်မှုကို ခဏ ရပ်ဆိုင်းလိုက်တဲ့အတွက် ၂၀၁၃ နဲ့ ၂၀၁၄ နှစ်ပတ်လည် ကျောက်မျက် ပြပွဲတွေမှာ ကျောက်စိမ်းတွဲ အရေအတွက် ကျဆင်းသွားတယ်။ သူတို့ကို ပြန်လုပ်ခွင့်ပြုလိုက်ရင် နောက်နှစ်မှာ ပြပွဲ တကြိမ် က ၂ ကြိမ်ဖြစ်လာမယ်လို့ ကျနော် မျှော်လင့်ပါတယ်” ဟု သူက ဆိုသည်။ အစိုးရက အနာဂတ်တွင် အရိုင်းတုံးအတိုင်း ရောင်းချမှု လျှော့ချပြီး တန်ဖိုးမြှင့် ကျောက်စိမ်း ထုတ်ကုန်များ ပိုမိုရောင်းချနိုင်ရန် မျှော်လင့်ထားကြောင်းလည်း သူက ထပ်ပြောသည်။ မြန်မာနိုင်ငံ ကျောက်မျက်လုပ်ငန်းရှင်များ အသင်း (မန္တလေး) ၏ ဒုတိယ ဥက္ကဌ ဒေါ်ခင်လေးမြင့်က ကျောက်စိမ်း ထုတ်လုပ် မှု ပုံမှန်အခြေအနေသို့ မကြာမီ ပြန်လည်ရောက်ရှိရန် မျှော်လင့်ထားကြောင်းပြောသည်။ “ကျောက်တူးကုမ္ပဏီတွေကို အလုပ် ပြန်လုပ်ခွင့်ပြုလိုက်တဲ့ အစိုးရရဲ့ ဆုံးဖြတ်ချက်ကို ကျမတို့ ကြိုဆိုပါတယ်” ဟု သူကဆိုသည်။ ဖားကန့်မှ ကျောက်စိမ်းကုန်သည်တဦး ဖြစ်သော ဒေါ်ခါ က ကျောက်တူးကုမ္ပဏီများကို ပြန်လည် တူးဖော်ခွင့် ပေးလိုက် ခြင်း အားဖြင့် တရားမ၀င်တူးဖော်နေမှုများ အဆုံးသတ်သွားလိမ့်မည်ဟု ပြောသည်။ “တချို့ဒေသခံတွေက ကုမ္ပဏီတွေ လုပ်ငန်းရပ်ထားတုန်းမှာ ကုမ္ပဏီပိုင် ကျောက်တွင်းတွေမှာ ၀င်ပြီးရှာဖွေကြတယ်။ ဒါက တရားမ၀င်ဘူးလေ။ ဒါတွေကို ရပ်ဖို့ လိုတယ်” ဟု သူကဆိုသည်။

အပြည့်အစုံသို့...

ပြန်ခေါက်ထားပါ...

ပြုပြင်ပြောင်းလဲရေးသည် လိမ်ညာမှုသာ ဖြစ်ကြောင်း အဓိကရုဏ်းများက သက်သေပြ

မြန်မာနိုင်ငံ၏ ဒုတိအကြီးဆုံးဖြစ်သော မန္တလေးမြို့တွင် ယခုအပတ် အစောပိုင်းက မွတ်စလင် ဘာသာဝင်များနှင့် ဗုဒ္ဓဘာသာဝင်များကြား အဓိကရုဏ်းတခု ရုတ်ချည်းပေါ်ပေါက်ခဲ့ပြီးနောက် မန္တလေးတွင် အခြေအနေ အေးဆေးငြိမ်သက်နေပြန်သည်။ ညမထွက်ရ အမိန့်ထုတ်ပြန်ထားပြီးနောက် လူသူခြောက်ကပ်နေသည့် မြို့တော်၏ လမ်းများပေါ်တွင် ရဲအဖွဲ့က ကင်းလှည့်လျက်ရှိသည်။ သို့သော်လည်း ပဋိပက္ခအကြောင်း သတင်းယူသည့် စာနယ်ဇင်းသမားများ အတွက်ကတော့ ပြဿနာက အခုမှ စ စိုးရိမ်စရာ ဖြစ်လာသည်။ နောက်ဆုံးဖြစ်ပေါ်ခဲ့သည့် အဓိကရုဏ်းအကြောင်း ပြည်သူတွေကို သတင်းပို့ဖို့ သူတို့အလုပ် သူတို့ လုပ်ခဲ့ကြသည့် စာနယ်ဇင်းသမားများ အနေဖြင့် အစွန်းရောက်များ၏ ပစ်မှတ်ဖြစ်လာနေသည်က စိတ်မချမ်းမြေ့စရာပင်။ ဧရာဝတီ သတင်းထောက်များနှင့် ဓာတ်ပုံဆရာများ သူတို့၏အသက်ကို ခြိမ်းခြောက်မှုတွေနှင့် ရင်ဆိုင်ခဲ့ရသည်။ သတင်းထောက်များကို လူအုပ်က ဝိုင်းရန်ရှာခံရသည်။ ဓာတ်ပုံဆရာများ လူအုပ်က ဝိုင်းလိုက်သဖြင့် ထွက်ပြေးခဲ့ရသည်။ သတင်းထောက်များနှင့် နိုင်ငံခြား မီဒီယာများအတွက် အလုပ်လုပ်နေသည့် အလွတ်တန်း သတင်းထောက်များကိုလည်း “ဒေါသထွက်နေသည့် လူအုပ်ကြီး” က ပြင်းစွာသော ဖိအားတွေပေးခဲ့သည်။ အွန်လိုင်းပေါ် ပေါ်ပေါ်တင်တင် ခြိမ်းခြောက်ခံလာရသည်။ ရဲအဖွဲ့၏ ပြောရေးဆိုခွင့်ရှိသူ ရဲမှူးချုပ် ဝင်းခေါင်က အမုန်းစကားများ ပြန့်ပွားနေခြင်းကို တားဆီးနိုင်ရန် အစိုးရက Facebook ကို ပိတ်ထားခဲ့သည်ဟု ပြောဆိုခဲ့ခြင်းကလည်း မှတ်သားစရာ ဖြစ် ခဲ့သည်။ Facebook သည် မွတ်စလင်ဆန့်ကျင်ရေး ကောလာဟလများ ဖြန့်ဖြူးရန်နှင့် စာနယ်ဇင်းသမားများကို အမျိုး၊ ဘာသာကို သစ္စာဖောက်သူများအဖြစ် သရုပ်ဖော်ရန် မြန်မာနိုင်ငံတွင် လူသုံးအများဆုံး လူမှုကွန်ရက်တခုဖြစ်သည်။ သို့သော်လည်း အစိုးရက အမုန်းစကားများ ဖြန့်ဖြူး၍ သွေးထိုးလှုံ့ဆော်သူများကို အရေးယူရန် မမျှော်လင့်ပါနှင့်။ ဖြစ်လာမည် မဟုတ်ပါ။ ကုလသမဂ္ဂ၏ မြန်မာနိုင်ငံဆိုင်ရာ လူ့အခွင့်အရေး အထူးကိုယ်စားလှယ်ဟောင်း တောမတ်စ်အို ဟေးကင်တာနာက မွတ်စလင်များကို တိုက်ခိုက်ရာတွင် “အစိုးရ ပါဝင်ပတ်သက်မှုရှိခဲ့သည်” ဆိုသော တိုင်ကြားမှုများ ရရှိခဲ့ကြောင်းနှင့် အာဏာပိုင်များသည် ၄င်းတို့၏ “မျက်စိရှေ့မှောက်တွင် အကြမ်းဖက် ရက်စက်မှုများ ဖြစ်ပေါ်နေသည့်တိုင် ရပ်ကြည့်နေခဲ့ကြပြီး စနစ်တကျ စုစည်းထားသည့် အစွန်းရောက် အမျိုးသားရေးဝါဒီ လူစုလူဝေးများလည်း ပါဝင်ကြောင်း” ယမန်နှစ်က ပြောကြားခဲ့သည်။ လွန်ခဲ့သော ၃ နှစ်ခန့် မြန်မာနိုင်ငံ တံခါးဖွင့်လာခဲ့ပြီး နောက်ပိုင်းတွင် တိုင်းပြည်အတွင်း၌ မွတ်စလင်နှင့် ဗုဒ္ဓဘာသာဝင် အသိုင်းအဝိုင်းများကြား ပဋိပက္ခများ ဆက်တိုက်ဖြစ်ပွားခဲ့သည်။ မွတ်စလင် ဆန့်ကျင်ရေးရောဂါကလည်း လူမှုမီဒီယာများနှင့် လက်ဘက်ရည်ဆိုင်များအတွင်း မုန်တိုင်းထန်လာသည်။ မွတ်စလင် ဆန့်ကျင်ရေး သဘောထားများ ရုတ်တရက် မြင့်တက်လာခြင်းသည် အတိုက်အခံ ခေါင်းဆောင် ဒေါ်အောင်ဆန်းစုကြည်၏ အမျိုးသား ဒီမိုကရေစီအဖွဲ့ချုပ် NLD ၂၀၁၂ ခုနှစ် ဧပြီလ ကြားဖြတ်ရွေးကောက်ပွဲတွင် အပြတ်အသတ် အနိုင်ရရှိခဲ့ပြီး နောက်ပိုင်း လအနည်းငယ်အတွင်း ဖြစ်ပေါ် လာခဲ့ကြောင်း မြန်မာ့အရေး စောင့်ကြည့်လေ့လာသူများက သတိထားမိခဲ့သည်။ မဲရလဒ်က ၂၀၁၀ ခုနှစ် နိုဝင်ဘာလတွင် ကျင်းပခဲ့သည့် အထွေထွေ ရွေးကောက်ပွဲတွင် မရိုးမသားပြုလုပ်၍ အနိုင်ရရှိခဲ့သော လက်ရှိ အာဏာရ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (USDP) ကို ဆူးနှင့်ထိုးပြီး သတိပေး လိုက်သလို ဖြစ်သွားသည်။ ထိုအချိန်မှစ၍ လူမျိုးဘာသာပေါင်းစုံ ပေါင်းစပ်ထားသည့် မြန်မာ့လူ့အဖွဲ့အစည်းအတွင်း မွတ်စလင်များသည် သတိထားရမည့် ခြိမ်းခြောက်မှုတခုအဖြစ် ပုံဖော်ခံလာခဲ့သည်။ “ရက်ရက်စက်စက် ထိရောက်သည့် တိုက်ခိုက်မှုများလည်း ဖြစ်ပွားလာခဲ့သည်” ဟု ကုလသမဂ္ဂ အထွေထွေအတွင်းရေးမှူး၏ မြန်မာနိုင်ငံဆိုင်ရာ အထူးအကြံပေး ပုဂ္ဂိုလ်ဟောင်း ဖြစ်သည့် ဗီဂျေနမ်ဘီးယားကလည်း ပြောဆိုခဲ့ဖူးသည်။ ထို ဒဏ်ရာများအတွင်းသို့ ဆားထပ်သိပ်သည့် အနေဖြင့် သမ္မတ ဦးသိန်းစိန်၏ အစိုးရက ဘာသာကူး ပြောင်းမှုတွင် တင်းကြပ်စွာထိန်းချုပ်ခြင်း၊ ဘာသာခြားနှင့် လက်ထပ်မည့် အမျိုးသမီးများ ခွင့်ပြုချက် တောင်းခံရန် လိုအပ်ခြင်း စသည့် အချက်များပါဝင်သည့် ဥပဒေများကို အဆိုပြုလာသည်။ သက်ရောက်မှု အနေဖြင့် မွတ်စလင်များသည် လူ့အဖွဲ့အစည်းအတွက် ခြိမ်းခြောက်မှုဆိုသည့် အမြင်ကို အတည်ပြုပေးသလို ဖြစ်သည်။ လက်ထပ်ထိမ်းမြားခြင်းဆိုင်ရာ ဥပဒေကြမ်းသည် အမျိုးနှင့် ဘာသာကို ကာကွယ်ရန်အတွက် ပြဋ္ဌာန်းရန် အဆိုပြုထားသော “မျိုးစောင့်ဥပဒေ” ၏ တစိတ်တပိုင်း ဖြစ်သည်။ အမျိုးသားရေးဝါဒီ ဗုဒ္ဓဘာသာ ဘုန်းတော်ကြီး အဖွဲ့တဖွဲ့က ကမကထပြု၍ ဆော်ဩနေသည့် မျိုးစောင့်ဥပဒေတွင် မယားပြိုင်စနစ်ကို ပိတ်ပင်ခြင်း၊ လူဦးရေထိန်းချုပ်သည့် ဥပဒေ များပြဋ္ဌာန်းခြင်းနှင့် ဘာသာကူးပြောင်းခြင်းကို ထိန်းချုပ် ကန့်သတ်ခြင်းများပါဝင်သည်။ အဆိုပါ ဥပဒေများကို ဆန့်ကျင်ကန့်ကွက်ခဲ့ကြသည့် အရပ်ဘက် အဖွဲ့အစည်းများနှင့် ဘာသာပေါင်းစုံအဖွဲ့ အစည်းများသည် အသက်ကို ခြိမ်းခြောက်ခြင်းနှင့် အခြားသော ခြိမ်းခြောက်မှု အမျိုးမျိုးခံခဲ့ကြရသည်။ မြန်မာ့နိုင်ငံရေးကို ကာလရှည်ကြာစွာ စောင့်ကြည့်လေ့လာခဲ့ကြသူများကမူ မြန်မာနိုင်ငံ လမ်းများပေါ်တွင် အမျိုးသားရေး အမည်ခံလူမိုက်များ အုပ်ဖွဲ့သောင်းကျန်းခြင်းများ ရုတ်တရက်ပေါ်ပေါက် လာခြင်းသည် အံ့ဩဖွယ်ရာမဟုတ်ဟု ပြောကြသည်။ အတိတ်ကလည်း မြန်မာစစ်အာဏာပိုင်များသည် သူတို့အတွက် ခြိမ်းခြောက်မှုရှိသည်ဟု ခံစားရသည့်အခါတိုင်း လူ့အသိုင်းအဝိုင်းကြား တိုက်ခိုက်သတ်ဖြတ်မှုများ ဖြစ်ပွားလာစေပြီး ငြိမ်ဝပ်ပိပြားမှုကို ပြန်လည်ထိန်းသိမ်းရန် လိုအပ်သည်ဟု အကြောင်းပြတတ်ကြသည်။ လတ်တလော ဖြစ်ပေါ်ခဲ့သည့် နောက်ဆုံး အဓိကရုဏ်း မတိုင်မီတွင် တိုင်းရင်းသားခေါင်းဆောင် အချို့က လာမည့်နှစ်တွင် ကျင်းပရန်ရှိနေသည့် ရွေးကောက်ပွဲကို လွတ်လပ်၍ တရားမျှတစွာ ကျင်းပပေး ရန်အစိုးရက သတ္တိမရှိကြောင်း ကျနော့်ကို ပြောခဲ့ကြသည်။ “အရင်တုန်းကအတိုင်းပဲ ရွေးကောက်ပွဲမှာ သူတို့ ထပ်ပြီးတော့ မဲခိုးလိမ့်မယ်။ ဒါမဟုတ် အဲဒီလို သူတို့ မလုပ်နိုင်ဘူးဆိုရင် ဒါကို (ရွေးကောက်ပွဲကို) ရွှေ့ဆိုင်းဖို့ အကြောင်းရှာလိမ့်မယ်” ဟု သူတို့က ပြောခဲ့သည်။ အုပ်ချုပ်နေသော စစ်ခေါင်းဆောင်များ အကြားတွင်လည်း ဒီဇာတ်လမ်းအတွက် လိုအပ်သော အခြေခံ လုပ်ငန်းတွေ ချထားပေးပြီးပုံရသည်။ မလွှဲမရှောင်သာသည့် အခြေအနေသို့ ရောက်ရှိလာလျှင် တိုင်းပြည်ကို ထိန်းချုပ်ပြီး ဒီမိုကရေစီ၏ မာရ်နတ်များ လက်ထဲမှ ကယ်တင်ဖို့ အဆင်သင့် ဖြစ်ချင်နေပေလိမ့်မည်။ ဦးသိန်းစိန် အစိုးရအပေါ် အစောပိုင်းနေ့များက ပြုပြင်ပြောင်းလဲရေး အစိုးရအဖြစ် အကောင်းမြင်ခဲ့မှုများ လျင်လျင်မြန်မြန် ပျောက်ကွယ်နေခြင်းနှင့် ပတ်သက်၍ အံ့ဩစရာမရှိပါ။ မေလအတွင်းက NLD ပါတီ အင်အားပြခဲ့သည့် မန္တလေးက မြန်မာနိုင်ငံ၏ အနာဂတ်အတွက် အဓိက စစ်မြေပြင်တခု ဖြစ်လာခဲ့ခြင်းကလည်း အနည်းငယ် အံ့ဩစရာသာ ဖြစ်သည်။ များပြားသည့် ထောက်ခံသူများကို မိန့်ခွန်းပြောရင်း ဒေါ်အောင်ဆန်းစုကြည်က စစ်တပ်အရာရှိများကို မှန်သောအလုပ်သာ လုပ်ဆောင်ရန်နှင့် တိုင်းပြည်ကို စစ်တပ်ကသာ အလုံးစုံချုပ်ကိုင်နိုင်ရန် ရည်ရွယ်၍ အတင်းပြဋ္ဌာန်းခဲ့သော ဒီမိုကရေစီမဆန်သည့် ၂၀ဝ၈ ခုနှစ် အခြေခံဥပဒေကို ပြင်ဆင်ရန် တောင်းဆိုခဲ့သည်။ “ကျမသူတို့ (စစ်တပ်အရာရှိများ) ကို ဒီနှစ်အတွင်းမှာ ဖွဲ့စည်းပုံကို လွှတ်တော်ကနေတဆင့် ဥပဒေ ဘောင်အတွင်းကနေ ပြင်ဆင်ပေးဖို့ စိန်ခေါ်ချင်ပါ တယ်။ တိုင်းပြည်ကို တကယ်ချစ်ရင်၊ ပြည်သူတွေကို လေးစားပါ။ တိုင်းပြည်ရဲ့အနာဂတ်အတွက် စဉ်းစားပါ။ သတ္တိရှိကြပါ” ဟု လူထုကြီးကိုပြောခဲ့ရာ လက်ခုပ်သံတွေ ကျယ်လောင်စွာ ထွက်ပေါ်ခဲ့၏။ ယခုအချိန်တွင် ထင်ရှားသည့် နိုင်ငံရေး အကျဉ်းသားဟောင်း ကျောင်းသားခေါင်းဆောင်များနှင့် ပူးပေါင်း၍ အခြေခံဥပဒေ ပြင်ဆင်ရေး လှုပ်ရှားမှုများ ပြုလုပ်နေရာ အတော် အရှိန်ရနေပြီဖြစ်သည်။ သို့သော်လည်း မိမိကိုယ်မိမိ “မြန်မာ ဘင်လာဒင်” ဟု ကင်ပွန်းတပ်ထားသည့် ဘုန်းကြီး ဦးဝီရသူ၏ စည်းရုံးလှုပ်ရှားမှု များကြောင့် မြန်မာ့ ဒီမိုကရေစီ အင်အားစုများသည် မျက်ကန်း အမျိုးသားရေးဝါဒ၏ တိုက်ရိုက် စိန်ခေါ်ရင်ဆိုင်မှုနှင့် ကြုံတွေ့နေကြရသည်။ လူမှုမီဒီယာများတွင် ကြံ့ခိုင်ရေးပါတီမှ သဘောထားတင်းမာသည့် ခေါင်းဆောင်များနှင့် သူ့ကို ဗုဒ္ဓဘာသာကို အမှန်တကယ် ကာကွယ်နေသူအဖြစ် အရှက်ကင်းမဲ့စွာ ကြေညာပေးနေသည့် အခြားသော သူများ၏ လှူဒါန်းမှုကို လက်ခံယူနေသည့် ဓာတ်ပုံများကို ပေါ်ပေါ်တင်တင် မြင်တွေ့နေရသည် ဖြစ်ရာ ဦးဝီရသူ မွတ်စလင် မုန်းတီးရေး လှုံ့ဆော်မှုများကို အစစ်အဆေးမရှိ ခွင့်ပြုထားခြင်းကလည်း အံ့ဩစရာ မဟုတ်တော့။ အံ့အားသင့်ဖွယ်ရာ ကောင်းသည်မှာကား နိုင်ငံခြား အစိုးရ တာဝန်ရှိသူများက မြန်မာနိုင်ငံ၏ တံခါးဝတွင် ဆက်လက်တန်းစီ နေကြဆဲဖြစ်ပြီး တိုင်းပြည်ကို ဒီမိုကရေစီစနစ်သို့ အပြည့်အဝ ပြန်လည်ရောက်ရှိစေလိုသော ပြည်သူများ၏ ဆန္ဒကို စိတ်ဝင် စားအလေးထားမှု အနည်းငယ်သာ ပြသနိုင်ကြသည့် စစ်အစိုးရ ခေါင်းဆောင်ဟောင်းများနှင့် အလုပ်လုပ်ရန် စိတ်အားထက်သန်နေကြခြင်း ဖြစ်သည်။ မကြာသေးခင်က ရောက်ရှိခဲ့သည့် ဧည့်သည်များမှာ ဩစတြေးလျ နိုင်ငံခြားရေးဝန်ကြီး ဂျူလီဘိရှော့နှင့် မြန်မာ စစ်တပ်နှင့် ဆက်သွယ်ဆောင်ရွက်ရန် “အချိန်ကျပြီ”ဟု ထုတ်ဖော်ပြောခဲ့သော အမေရိကန် နိုင်ငံခြားရေးဝန်ကြီး ဌာန၊ ဒီမိုကရေစီ၊ လူ့အခွင့်အရေးနှင့် အလုပ်သမားဆိုင်ရာ ဒုတိယဝန်ကြီး တွမ်မလင်နောင်းစကီးတို့ဖြစ်သည်။ ၂၀၁၁ ခုနှစ်တွင် နှစ်နိုင်ငံ စစ်တပ်ချင်း ဆက်ဆံမှု ပြန်လည်စတင်ခဲ့ပြီး နောက်ပိုင်း ပထမဆုံး အမေရိကန် ဗိုလ်ချုပ်ကြီး တဦးအနေဖြင့် အမေရိကန် စစ်တပ်မှ ပစိဖိတ်ဒေသဆိုင်ရာ ဒုတိယတပ်မှူး ဒုတိယဗိုလ်ချုပ်ကြီး အန်ထော်နီ ခရက်ခ်ျဖီးလ် နေပြည်တော် အမျိုးသားကာကွယ်ရေး ကောလိပ်တွင် မိန့်ခွန်းပြောကြားခဲ့မှုက အဆင့်သစ်တခုသို့ ရောက်ရှိခဲ့သည်။ “ဒီလို ဆက်ဆံ ဆောင်ရွက်ရခြင်းရဲ့ အခြေခံ ရည်ရွယ်ချက်က မြန်မာစစ်တပ်ကို လူ့အခွင့်အရေး၊ တရားဥပဒေ စိုးမိုးရေးနဲ့ အရပ်သားပြည်သူ ထိန်းချုပ်မှုတွေရဲ့ အရေးကြီးပုံကို ပြောပြဖို့ ဖြစ်ပါတယ်” ဟု တွမ်မလင်နောင်းစကီးက ပြောသည်။ ဆက်ဆံမှုသည် သတိကြီးစွာထားသော ဆက်ဆံမှုအဖြစ် သူက သရုပ်ဖော်ခဲ့သော်လည်း “အပြည့်အဝ ပူးပေါင်းဆောင်ရွက်ဖို့ မဟုတ်ရင်တောင် အနာဂါတ်မှာ ပိုပြီး နက်ရှိုင်းတဲ့ ပူးပေါင်းဆောင်ရွက်မှု တခုရှိလာဖို့ အလားအလာ ကောင်းပါတယ်” ဟု ပြောခဲ့သည်။ မေလအတွင်း အာဏာသိမ်းယူခဲ့သည့် ထိုင်းနိုင်ငံ စစ်ခေါင်းဆောင်သစ်က မြန်မာစစ်တပ် ခေါင်းဆောင်ကို အားပါးတရ ပွေ့ဖက်ခဲ့သည့်အတွက် အိပ်မက်ဆန်ဆန် ဖြစ်ခဲ့သည်။ မြန်မာကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင် ဘန်ကောက်သို့ အလည်အပတ် ရောက်ရှိချိန်တွင် ထိုင်းဘုရင့် တပ်မတော် ဦးစီးချုပ် ဗိုလ်ချုပ်ကြီး တနာဆက်ပတီ မာပရာကွန်းက ထိုင်းနိုင်ငံ၏ သွေးမစွန်းသော အာဏာသိမ်းယူမှုကို မြန်မာနိုင်ငံတွင် စစ်အာဏာရှင်စနစ်မှ ဒီမိုကရေစီအုပ်ချုပ်ရေးသို့ ကူးပြောင်းနိုင် ရေးတောင်းဆိုကြသည့် ထောင်နှင့်ချီသော ငြိမ်းချမ်းစွာ ဆန္ဒပြသူများကို သေနတ်နှင့်ပစ်၍ ရက်စက်စွာ နှိမ်နင်းခဲ့သည့် ခေတ်သစ် မြန်မာ့သမိုင်းနှင့် ခိုင်းနှိုင်း၍ ပြောဆိုခဲ့သည်။ “ထိုင်းနိုင်ငံမှာ တိုင်းပြည်ပြန်လည် တည်ငြိမ်ရေးအတွက် လုပ်ဆောင်နေတာကို မြန်မာအစိုးရက သဘောတူပါတယ်။ မြန်မာနိုင်ငံမှာ ၁၉၈၈ ခုနှစ်က ကျနော်တို့နဲ့ အလားတူ အတွေ့အကြုံမျိုး ရှိခဲ့တဲ့အတွက် သူတို့နားလည်ပါတယ်”ဟု ထိုင်းစစ်ဦးစီးချုပ်က ပြောသည်။ အဆိုပါ မှတ်ချက်စကားက အကြောင်းအကျိုး ညီညွတ်ခြင်း မရှိပါ။ သို့သော်လည်း တိုင်းပြည်၏ ဒီမိုကရေစီ မျှော်လင့်ချက်များ အိပ်မက်ဆိုးများ အဖြစ်သို့ ပြောင်းလဲသွားရန် အလားအလာများ တိုးလာနေသည့်တိုင် မြန်မာနိုင်ငံ၏ ပြုပြင်ပြောင်းလဲရေးကို အကောင်းဘက်မှ ဆက်လက်ရှုမြင်နေကြသော အနောက်ကမ္ဘာ၏ သုံးသပ်ဆုံးဖြတ်မှုများလောက် စိတ်အနှောင့်အယှက်ဖြစ်ဖွယ် မကောင်းပါ။

အပြည့်အစုံသို့...

ပြန်ခေါက်ထားပါ...

ဂျာမနီကမ္ဘာ့ဖလား ချန်ပီယံဖြစ်

ဗွီအိုအေ (မြန်မာဌာန) 14.07.2014 06:28 ၂၀၁၄ ကမ္ဘာ့ဖလားကို ဂျာမနီက အနိုင်ရပြီး ကမ္ဘာ့ချန်ပီယံဖြစ်သွားပါပြီ။ ရီယိုဒီ ဂျနေရိုမြို့က မာရာကနာကွင်းမှာ ဂျာမနီနဲ့ အာဂျင်တီးနားတို့ တနင်္ဂနွေနေ့က ကစားကြတာမှာ မိနစ် ၉၀ ပြီးတဲ့အထိ ဂိုးမရှိ သရေဖြစ်နေခဲ့ပါတယ်။ အချိန်ပိုဒုတိယပိုင်း ၁၁၂ မိနစ်ကျတော့မှ ဂျာမနီအသင်းက Gotze က အနိုင်ဂိုးသွင်းပြီး ဗိုလ်စွဲသွားတာပါ။ ဂျာမနီအတွက်တော့ ဒါဟာ ကမ္ဘာ့ဖလားကို ၄ ကြိမ်မြောက် ဗိုလ်စွဲတာလည်းဖြစ်ပါတယ်။ ဒီပွဲမှာ ဂျာမနီက ဘောလုံးပိုင်ဆိုင်မှုအသာနဲ့ ကစားသွားခဲ့ပေမယ့် အာဂျင်တီးနားက ခံစစ် အသေပိတ်ပြီး တန်ပြန်တိုက်စစ်နဲ့ ကစားတာကြောင့် ဂျာမနီ ထင်သလောက် အခွင့်အရေးတွေ မရခဲ့ပါဘူး။ ပထမပိုင်းမှာ ၂၁ မိနစ်မှာ ဂျာမနီအသင်းရဲ့ အမှားကနေ ရတဲ့ဘောလုံးကို အာဂျင်တီးနား ရှေ့တန်းလူ Gonzalo Higuain ဂိုးသမားနဲ့ တစ်ယောက်ချင်း ကန်ရပေမယ့် ဂိုးမ၀င်ခဲ့ပါဘူး။ အဲဒီနောက်ပိုင်းမှာ အီဂွါရင်း ၁ ဂိုးသွင်းခဲ့ပေမယ့် လူကျွံနေတာကြောင့် ဂိုးမရခဲ့သလို မက်ဆီနဲ့ Palacios တို့ ဂိုးသမားနဲ့ တစ်ယောက်ချင်းတွေ့ပြီး အပိုင်ကန်သွင်းခွင့်တွေရခဲ့ပေမယ့် ဂိုးဝင်အောင် မသွင်းနိုင်ခဲ့ကြပါဘူး။ အာဂျင်တီးနားအသင်းက Lionel Messi နဲ့ ဂျာမန်အသင်းက Mats Hummelsအာဂျင်တီးနားအသင်းက Lionel Messi နဲ့ ဂျာမန်အသင်းက Mats Hummels ဒါ့အပြင် ဂျာမနီဘက်က Howedes ခေါင်းတိုက်တာ တိုင်ထိခဲ့သလို Klose နဲ့ Schurrle တို့ ဂိုးသွင်းတာတွေကို အာဂျင်တီးနားဂိုးသမား ကာကွယ် သွားခဲ့ပါတယ်။ ဂျာမနီအတွက် ၁ လုံးတည်းသော အနိုင်ဂိုးကိုတော့ အချိန်ပို ၁၁၂ မိနစ်မှာတော့ ဂျာမနီ ဘယ်ဝင်းက Schurrele တင်ပေးလိုက်တဲ့ဂိုး ဒုတိယပိုင်းကျမှ လူစားဝင်လာတဲ့ ဂျာမနီရှေ့တန်းလူ Gotze က ရင်ဘတ်နဲ့ ထိန်းပြီး ဘယ်ခြေနဲ့ ကန်သွင်းသွားပြီး ဂျာမနီက အနိုင်ရသွားတာပါ။ ကမ္ဘာ့ဖလား ချန်ပီယံဖြစ်မယ့် တလုံးတည်းသော ဂိုးကို သွင်းခဲ့တဲ့ ဂျာမနီအသင်းသား Mario Goetzeကမ္ဘာ့ဖလား ချန်ပီယံဖြစ်မယ့် တလုံးတည်းသော ဂိုးကို သွင်းခဲ့တဲ့ ဂျာမနီအသင်းသား Mario Goetze ဒါဟာ ကမ္ဘာ့ဖလားသမိုင်းတလျှောက်မှာ လူစားဝင်လာတဲ့သူရဲ့ ဂိုးနဲ့ နိုင်တာလည်း ပထမဆုံးဖြစ်ပါတယ်။ ဂျာမနီက ဒီပွဲနိုင်လိုက်တဲ့အတွက် အမေရိကမြေမှာ အမေရိကတိုက်ပြင်ပက ပထမဆုံးအနိုင်ရတဲ့အသင်းလည်းဖြစ်သွားပါတယ်။ ဘရာဇီးကမ္ဘာ့ဖလားရဲ့ အကောင်းဆုံး ဘောလုံးသမားဆုကိုတော့ အာဂျင်တီးနားတိုက်စစ်မှူး လီယိုနယ်လ်မက်ဆီက ရသွားပြီး အကောင်းဆုံး ဂိုးသမားဆုကိုတော့ ဂျာမနီဂိုးသမား Manuel Neuer က ရသွားခဲ့ပါတယ်။ ဂိုးအများဆုံးသွင်းတဲ့ ရွှေဖိနပ်ဆုကိုတော့ ကိုလံဘီယာတိုက်စစ်မှူး James Rodriguez က ရသွားပါတယ်။

အပြည့်အစုံသို့...

ပြန်ခေါက်ထားပါ...

ဂါဇာဒေသ မြေပြင်စစ်ဆင်ရေး အစ္စရေးစတင်

ဗွီအိုအေ (မြန်မာဌာန) 13.07.2014 21:37 အရှေ့အလယ်ပိုင်းက ဂါဇာကမ်းမြှောင်ဒေသမှာ အရင်တပတ်ကစပြီး Hamas စစ်သွေးကြွတွေကို အစ္စရေးတို့ တိုက်ခိုက်နေတာမှာ ပထမဆုံးအကြိမ်အဖြစ် ဒီကနေ့မှာပဲ အစ္စရေးကမြေပြင်စစ်ဆင်ရေးကို စတင်လိုက်ပြီဖြစ်ပါတယ်။ အစ္စရေးအထူးတပ်ဖွဲ့ဝင်တွေဟာ ဒုံးကျဉ်ပစ်လွှတ်တဲ့ နေရာတခုကို ပစ်မှတ်ထားပြီး တနင်္ဂနွေနေ့မှာ တခဏချင်း ဝင်ရောက်စီးနင်းမှုပြုလုပ်ခဲ့တယ်လို့ အရာရှိတွေက ပြောပါတယ်။ ပါလက်စတိုင်းတိုက်ခိုက်ရေးသမားတွေနဲ့ အပြန်အလှန်ပစ်ခတ်မှုအတွင်း အစ္စရေးစစ်သား ၄ ဦး ဒဏ်ရာ နည်းနည်း ရသွားတယ်လို့ အာဏာပိုင်တွေက ဆိုပါတယ်။ သူတို့ ၂ ဖက်ကြား အခု ပဋိပက္ခက ၆ ရက်မြောက်လာပြီ ဖြစ်သလို နိုင်ငံတကာက အပစ်အခတ်ရပ်စဲထားဖို့ ဝိုင်းပြီးပန်ကြားနေတာကို အစ္စရေးက မျက်ကွယ်ပြုပြီး ဂါဇာဒေသတလွှားကဒေသတွေကို ပစ်မှတ်ထားတဲ့ လေကြောင်းစစ်ဆင်ရေးတွေကို ဆက်လုပ်နေပါတယ်။ ဂါဇာမြောက်ပိုင်းကို စနေညဖက်မှာ ပြင်းပြင်းထန်ထန် တိုက်ခိုက်ခဲ့လို့ ပါလက်စတိုင်း ဒေသခံထောင်ပေါင်းများစွာ တောင်ပိုင်းကို ထွက်ပြေးကြရပါတယ်။ တခြားနိုင်ငံတွေရဲ့ နိုင်ငံသားအဖြစ်လည်း ခံယူထားတဲ့ ပါလက်စတိုင်း နွယ်ဖွားတွေနဲ့ နိုင်ငံခြားသားတွေကတော့ ဒီကနေ့ပဲ ဂါဇာဒေသကနေ အပြီးထွက်ခွာ သွားကြပါပြီ။ လေကြောင်းတိုက်ခိုက်မှုတွေကို အရှိန်မြှင့်လုပ်ဆောင်မှာဖြစ်ကြောင်း ဂါဇာမြောက်ပိုင်းမှာ နေထိုင်ကြတဲ့ ပါလက်စတိုင်းနွယ်ဖွားတွေ ဘေးလွတ်ရာကို ကိုယ့်ဖာကိုယ်ပြောင်းရွှေ့ကြဖို့ အစ္စရေးစစ်တပ်က သတိပေးထားပါတယ်။ အခုဆို အစ္စရေးတို့ရဲ့ တိုက်ခိုက်မှုတွေကြောင့် သေဆုံးရသူပေါင်း ၁၅၀ ကျော် သွားပြီလို့ ပါလက်စတိုင်း အရာရှိတွေက ပြောပါတယ်။ အစ္စရေးက Hamas နဲ့ တခြားစစ်သွေးကြွအဖွဲ့တွေကို ပစ်မှတ်ထားတိုက်ခိုက်တာဖြစ်ပေမယ့် သေဆုံးသူအများစုဟာ အရပ်သားတွေဖြစ်တယ်လို့ ဂါဇာက ထွက်လာတဲ့ သတင်းတွေမှာ ပြောထားပါတယ်။

အပြည့်အစုံသို့...

ပြန်ခေါက်ထားပါ...

ထွန်တုံးတိုက်ပွဲဆင်နွဲရာသို့ စစ်တပ်က ဝင်ရောက်ကာ စစ်ရေးလေ့ကျင့်

ကန့်ဘလူ၊ မဇ္ဈိမ။ ။ စစ်ကိုင်တိုင်း၊ ရွှေဘိုခရိုင်၊ ကန့်ဘလူမြို့နယ်၊ မြေမွန်ကျေးရွာရှိ လယ်ယာမြေများ ပြန်လည်ရရှိရန် ထွန်တုံးတိုက်ပွဲဆင်နွဲသည့် တောင်သူများရှိရာသို့ တပ်မ ၃၃ လက်အောက်ခံ ခမရ ၁၂ (ကျောက်မြောင်း) တပ်က တပ်မတော်သား ၁ဝဝဦးခန့်က စစ်ရေးလေ့ကျင်မှုများကို ဇူလိုင်လ ၁၃ ရက်တွင် လာရောက်ပြုလုပ်ခဲ့သည်ဟု မြေမွန်ကျေးရွာမှ တောင်သူ ဦးစောထွန်းက မဇ္ဈိမကို ပြောသည်။ “ကျွန်တော်တို့က နံနက် ၉ နာရီလောက်ကတည်းက ထွန်းတုံးတိုက်ပွဲ ဝင်နေတာပါ။ ထွန်တုံးဝင်ပြီး ၁ နာရီလောက်လည်းကြာရော စစ်သားအယောက် ၁ဝဝလောက် ရောက်လာပြီး တောင်ဘက်ပြေးလိုက်၊ မြောက်ဘက်ပြေးလိုက်နဲ့ စစ်ရေးလေ့ကျင့်တော့တာပဲ။ အဲဒါကြောင့် ကျွန်တော်တို့လည်း ထွန်နေတာကို ရပ်လိုက်ရတယ်''ဟု ဦးစောထွန်းက ပြောသည်။ စစ်ကိုင်တိုင်းဒေသကြီး၊ ရွှေဘိုခရိုင်၊ ကန့်ဘလူမြို့နယ်၊ မြေမွန်ကျေးရွာမှ ဒေသခံတောင်သူ ၁၆ ဦး၏ မြေဧက ၃၁၉ ဧက၊ ကွင်းအမှတ် ၈၅၅/ကရှိ လယ်ယာမြေများကို ၁၉၉၁-၁၉၉၂ ခုနှစ်ခန့်တွင် အမှတ် ၃၃ ခြေမြန်တပ်မဌာနချုပ် (စစ်ကိုင်း)က စစ်တပ်လေ့ကျင်ရေးကွင်းအဖြစ် အသုံးပြုရန် သိမ်းခဲ့သည်ဟုဆိုသည်။ “တောင်သူတွေ မထွန်ရင် စစ်ရေးလေ့ကျင့်တာတွေ မလုပ်ဘူး။ တောင်သူတွေကနေ နွားတွေနဲ့ထွန်ဖို့ ပြင်ပြီဆိုရင် သူတို့ကလည်း စစ်ရေးလေ့ကျင့်တော့တာပဲ” ဟု ယင်းတောင်သူများအရေးကို ကူညီဆောင်ရွက်ပေးနေသူ ILO နှင့် ချိတ်ဆက်ဆောင်ရွက်သူများကွန်ယက် FNI မှ စစ်ကိုင်းတိုင်း စည်းရုံးရေးတာဝန်ခံ ကိုတင်အုန်းကျော်က ပြောသည်။ မြေမွန်ကျေးရွာရှိ ဒေသခံတောင်သူများသည် မိမိတို၏ သိမ်းဆည်းခံ လယ်ယာမြေများ ပြန်လည်ရရှိရန် ဇွန်လ ၈ရက်က စတင်ကာ ထွန်တုံးတိုက်ပွဲများ ဆင်နွဲခဲ့ပြီး ၂၂ ရက်မြောက်နေ့တွင် တပ်မတော်မှ တပ်သားအင်အား ၁ဝဝ ဦးခန်ဖြင့် လာရောက်တားမြစ်ခဲ့သဖြင့် ထွန်တုံးတိုက်ပွဲများ ရပ်နားထားခဲ့ရသည်ဟု ဆိုသည်။

အပြည့်အစုံသို့...

ပြန်ခေါက်ထားပါ...

ခမာနီ လက်ချက်ကြောင့် သေဆုံးသူတွေ အတွက် အောက်မေ့ဘွယ် ရုပ်ထု ဆောက်မည်

ဗွီအိုအေ (မြန်မာပိုင်း) 11.07.2014 06:26 ကမ္ဘောဒီးယားနိုင်ငံမှာ ခမာနီအစိုးရလက်ထက်က သတ်ဖြတ်ခံလိုက်ရသူတွေ အတွက် အမှတ်ရအောင့်မေ့ဘွယ် ရုပ်ထုတခုကို ခမာနီတွေလက်ထက်က ညှဉ်းပန်းနှိပ်စက်တဲ့ အကျဉ်းစခန်းနေရာတခုမှာ တည်ဆောက်သွားဖို့ ကမ္ဘောဒီးယား ယဉ်ကျေးမှုဝန်ကြီးဌာနနဲ့ ကုလသမဂ္ဂ ကျောထောက်နောက်ခံပေး ထားတဲ့ ခမာနီခုံရုံးအဖွဲ့တို့ ကြာသပတေးနေ့က သဘောတူလိုက်ကြပါတယ်။ အရင်က စာသင်ကျောင်းကို ညှဉ်းပန်းနှိပ်စက်တဲ့ အကျဉ်းစခန်းအဖြစ် ခမာနီတွေက အသွင်ပြောင်းခဲ့ပြီး အခု Tuol Sleng လူတွေ အစုလိုက်အပြုံလိုက် သတ်ဖြတ်ခံရမှုအကြောင်း ပြတိုက်လုပ်ထားတဲ့နေရာမှာ ဗုဒ္ဓဘာသာဝင်တို့ရဲ့ ထုံးတန်းအစဉ်အလာနဲ့အညီ ပြတိုက်တစ်ခု တည်ဆောက်သွားမှာ ဖြစ်ပါတယ်။ အဲဒီနေရာမှာ ခမာနီတွေရဲ့လက်ချက်ကြောင့် လူပေါင်း ၁၂၀၀၀ ကျော် သေဆုံးခဲ့ ရတာလည်း ဖြစ်ပါတယ်။ ဒီအမှတ်ရအောင့်မေ့ဘွယ် ရုပ်ထုဟာ ခမာနီခုံရုံးအတွက် အရေးပါတဲ့ မှတ်ကျောက်တစ်ခုဖြစ်တယ်လို့ ခုံရုံးအဖွဲ့ရဲ့ ယာယီအုပ်ချုပ်ရေးမှူး Kranh Tony က ကြာသပတေးနေ့က ပြုလုပ်တဲ့ သဘောတူညီချက် လက်မှတ်ထိုးပွဲ အခမ်းအနားမှာ ပြောကြားလိုက်ပါတယ်။ အဲဒီ အမှတ်ရအောက်မေ့ဘွယ် ရုပ်ထုတည်ဆောက်ဖို့အတွက် ၉ လ ကြာမှာ ဖြစ်ပါတယ်။ ခမာနီတွေရဲ့ ညှဉ်းပန်းနှိပ်စက်မှုကို ခံခဲ့ရသူတွေနဲ့ သူတို့ရဲ့ မိသားစုဝင်တွေက လျှော်ကြေးဖို့ တောင်းဆိုနေကြသလို အမှတ်ရအောက်မေ့ဘွယ် အဆောက်အဦးတွေ တည်ဆောက်တာနဲ့ သူတို့အတွက် ကျန်းမာရေး စောင့်ရှောက်ရေးဌာနတွေ နိုင်ငံအ၀ှမ်း ဖွင့်လှစ်ပေးဖို့ တောင်းဆိုနေကြတာ ဖြစ်ပါတယ်။

အပြည့်အစုံသို့...

ပြန်ခေါက်ထားပါ...

မြန်မာနိုင်ငံတွင် လူ့အခွင့်အရေး ချိူးဖောက်မှု ကြီးထွားနေဆဲဟု အမေရိကန် ပြော

မြန်မာနိုင်ငံတွင် လူ့အခွင့်အရေး ချိုးဖောက်မှု ကြီးထွားနေဆဲ ဖြစ်သည်ဟု အမေရိကန် အောက်လွှတ်တော် နိုင်ငံခြား ဆက်ဆံရေး ကော်မတီ ဥက္ကဋ္ဌ က ပြောဆိုလိုက်သည်။ ကယ်လီဖိုးနီးယား ပြည်နယ် ရီပတ်ဘလီကန် အထက်လွှတ်တော် အမတ်လည်း ဖြစ်သည့် မစ္စတာ အက်ဒ်ရွိုက်စ်က ဇူလိုင် ၉ ရက်က ကျင်းပသော အမေရိကန် အောက်လွှတ်တော် လူ့အခွင့်အရေး ကြားနာပွဲ တခု၌ ပြောကြားခြင်း ဖြစ်သည်။ အမေရိကန် အစိုးရအနေဖြင့် မြန်မာနိုင်ငံတွင် လူ့အခွင့်အရေး ချိုးဖောက်မှု ကြီးထွားနေဆဲ ဖြစ်သည့်အတွက် ဗီဇာ ပိတ်ပင်ခြင်း အပါအ၀င် မြန်မာ-အမေရိကန် စစ်တပ်ချင်း ပူးပေါင်း ဆောင်ရွက်မှု ချက်ချင်း ရပ်တန့်ရန်လည်း ၎င်းက တိုက်တွန်းခဲ့သည်။ ထို့အပြင် လာမည့် နိုဝင်ဘာတွင် မြန်မာနိုင်ငံသို့ လာရောက်မည့် အမေရိကန် သမ္မတ ဘားရက် အိုဘားမားနှင့် သြဂုတ်လတွင် မြန်မာနိုင်ငံသို့ လာရောက်မည့် နိုင်ငံခြားရေး ၀န်ကြီး ဂျွန်ကယ်ရီ တို့၏ ခရီးစဉ် မတိုင်မီ မြန်မာနှင့် အမေရိကန် ဆက်ဆံရေး အကန့်အသတ် ထားရှိရန် အဆိုပါ ကြားနာပွဲသို့ တက်ရောက်သူများကလည်း ပြောဆိုကြသည်။ မြန်မာ့ တပ်မတော်အား အမေရိကန်စစ်တပ်က လေ့ကျင့် သင်တန်းပေးမှု ဆိုင်ရာများကို အမေရိကန် အရာရှိများနှင့် မြန်မာ ခေါင်းဆောင်များ အကြား မကြာသေးခင်က ဆွေးနွေးခဲ့သည့်အပေါ်ကိုလည်း မစ္စတာ အက်ဒ်ရွိုက်စ်က အချိန်မကျသေးကြောင်း ဝေဖန် ထောက်ပြခဲ့သည်။ နိုင်ငံတကာက မြန်မာနိုင်ငံ အပေါ် ယခင်က ထားရှိခဲ့သည့် စီးပွားရေး ဒဏ်ခတ် ပိတ်ဆို့မှုများ ဆက်လက် ထားရှိသင့် မသင့် ကို အထူး စောင့်ကြည့်သွားရန် လိုအပ်ကြောင်းလည်း မစ္စတာ အက်ဒ်ရွိုက်စ် က ပြောဆိုသည်ဟု Foreign Policy မဂ္ဂဇင်း သတင်း တရပ်တွင် ဖော်ပြထားသည်။ မြန်မာနိုင်ငံတွင် အစောပိုင်း ကာလက တိုးတက်လာခဲ့သော လူ့အခွင့်အရေး အခြေအနေများ ဆုတ်ယုတ်သွားမှုကြောင့် ယခု အခါ လူမျိုးရေး၊ ဘာသာရေး ခွဲခြားမှုများဖြင့် အုပ်စုဖွဲ့၍ စနစ်တကျ အကြမ်းဖက် သတ်ဖြတ်မှုများက လူ့အခွင့်အရေး အခြေ အနေများ အပေါ် အလွန် စိုးရိမ်စရာ ကောင်းလာကြောင်းလည်း မစ္စတာ အက်ဒ်ရွိုက်စ် က ထောက်ပြသည်။ “လူနည်းစု တိုင်းရင်းသား လူမျိုးစုတွေနဲ့ ရိုဟင်ဂျာ (ဘင်္ဂါလီ) မွတ်စလင်များ အပေါ် စနစ်တကျ ဖိနှိပ်မှုတွေ ရပ်တန့်မှု မရှိမချင်း ၂ နိုင်ငံ စစ်တပ်ချင်း ဆက်ဆံရေး ချက်ချင်း ရပ်တန့်ဖို့ လိုအပ်နေပါတယ်”ဟု မစ္စတာ အက်စ်ရွိုက်စ် က ဆိုသည်။ အကြမ်းဖက် တိုက်ခိုက်မှုများကြောင့် မြန်မာနိုင်ငံ အနောက်ဘက်ခြမ်းရှိ အိုးအိမ်များကို စွန့်ခွာထွက်ပြေးခဲ့ရသော ဒုက္ခသည် ၁ သိန်း ၄ သောင်းကျော်သည် ကျန်းမာရေး စောင့်ရှောက်မှုနှင့် အစားအသောက် အကူအညီများ ရရှိရန် ငြင်းပယ်ခံ နေရသည် ဟု သူက ဆက်လက် ပြောဆိုသည်။ ထို့အပြင် မြန်မာလွှတ်တော်က ဘာသာရေး လွတ်လပ်မှုကို ကန့်သတ် ထိန်းချုပ်သည့် တရားမျှတမှု မရှိသော ဥပဒေ တရပ်ကို မကြာခင်က အတည်ပြု ပေးသကဲ့သို့ လာမည့်နှစ် ရွေးကောက်ပွဲတွင် အတိုက်အခံ ခေါင်းဆောင် ဒေါ်အောင်ဆန်းစုကြည်အား သမ္မတဖြစ်ခွင့် ပိတ်ပင်ထားမှုလည်း ဆက်လက်ရှိနေသေးကြောင်း အမေရိကန် ကွန်ဂရက် လွှတ်တော်၏ လူ့အခွင့်အရေး ကြား နာပွဲတွင် သူက ပြောကြားခဲ့သည်။ သမ္မတ အိုဘားမားက သူ့အစိုးရ၏ နိုင်ငံခြားရေး ပေါ်လစီ အောင်မြင်ကြောင်း မြန်မာနိုင်ငံကို ဥပမာပေး၍ မကြာခင်က ပြော ဆိုခဲ့မှု အပေါ် ယခုကဲ့သို့ အမေရိကန် ကွန်ဂရက်လွှတ်တော်က သတိပေးလိုက်ခြင်း ဖြစ်သည်။ ကွန်ဂရက် ကြားနာပွဲတွင် မစ္စတာ အက်ဒ်ရွိုက်စ်က ရိုဟင်ဂျာ ဘင်္ဂါလီများအပေါ် အကြမ်းဖက်မှုနှင့် ပတ်သက်ပြီး မြန်မာ တာဝန် ရှိသူများကို အမေရိကန် သို့ ပြည်ဝင်ခွင့် ဗီဇာ ပိတ်ပင်ခြင်း အပါအ၀င် ဘဏ္ဍာရေး ၀န်ကြီးဌာန၏ နာမည်ပျက် စာရင်း သွင်းပြီး ၄င်းတို့၏ စီးပွားရေး လုပ်ငန်း၊ ငွေကြေးနှင့် ပစ္စည်းများ ထိန်းချုပ်ရန် အတွက် အမည် စာရင်းများ ထပ်မံထည့်သွင်း ပေး ရန် လည်း သမ္မတ အိုဘားမား အစိုးရအား တောင်းဆိုခဲ့သည်။ အမေရိကန် ပြည်ထောင်စု၏ လူမျိုးတုန်း သတ်ဖြတ်မှု အဆုံးသတ်ရေး ညီညွတ်စွာ ဆောင်ရွက်ရေးအဖွဲ့ ဥက္ကဋ္ဌ သောမတ်စ် အင်ဒရူးကလည်း အဆိုပါ ကြားနာပွဲတွင် ရခိုင်ပြည်နယ်က ရိုဟင်ဂျာ ဒုက္ခသည်များအရေး အလေးပေး ပြောဆို ခဲ့ပြီး လူ့အခွင့် အရေး ချိုးဖောက်မှု အခြေအနေများ ပိုမို ဆိုးဝါးလာခဲ့ကြောင်း ထွက်ဆိုခဲ့သည်။ သောမတ်စ် အင်ဒရူးက အမေရိကန်-မြန်မာ နှစ်နိုင်ငံ ဆက်ဆံရေး ပြန်လည် သုံးသပ်ရန် လိုကြောင်း၊ အမေရိကန်မှ မြန်မာနိုင်ငံ သို့ နောက်ထပ် ထောက်ပံ့ ကူညီမည့် အစီအစဉ်များ အပါအ၀င် မြန်မာနိုင်သို့ သွားမည့် အမေရိကန် နိုင်ငံခြားရေးဝန်ကြီး ဂျွန်ကယ်ရီနှင့် သမ္မတ အိုဘားမားတို့၏ ခရီးစဉ်များကိုလည်း ဝေဖန် ထောက်ပြ သွားခဲ့သည်။ ဗာဂျီးနီးယား ပြည်နယ် ဒီမိုကရက်အမတ် ဂျယ်ရီ ကွန်နိုလီက မြန်မာနိုင်ငံ အနောက်ဘက်ခြမ်းက အကြမ်းဖက်မှုများကို ရည်ညွှန်း၍ ရိုဟင်ဂျာနှင့် အခြားတိုင်းရင်းသား လူနည်းစုများအား ခွဲခြားကန့်သတ် ဖိနှိပ်မှုများအပေါ် ကွန်ဂရက်က အာရုံထားမှု ရှိကြောင်းကို ကြားနာပွဲတွင် ထုတ်ဖော် ပြောဆိုသည်။ သို့သော် အမေရိကန် နိုင်ငံခြားရေးဋ္ဌာန တာဝန်ရှိသူများကမူ ၄င်းတို့၏ ထောက်ပြမှုများ အပေါ် မည်သို့မျှ တုံ့ပြန် ဖြေကြားခြင်း မရှိကြောင်း Foreign Policy မဂ္ဂဇင်း၏ သတင်းတွင် ရေးသားထားသည်။

အပြည့်အစုံသို့...

ပြန်ခေါက်ထားပါ...

မလေးရှားမှာ ၁၀ ရက်အတွင်း မြန်မာ ၄ ဦး အသတ်ခံရ

မလေးရှားနိုင်ငံမှာ ၁၀ ရက်အတွင်း မြန်မာနိုင်ငံသား ၄ ဦး တိုက်ခိုက်သတ်ဖြတ်ခြင်း ခံလိုက်ရတယ်လို့ သေဆုံးသူ မြန်မာနိုင်ငံ သား တွေရဲ့ ရုပ်အလောင်းတွေကို သင်္ဂြိုဟ်ပေးနေတဲ့ မလေးရှားနိုင်ငံ ကပုန်း မြို့နယ် အခြေစိုက် ခုနစ်ရက် သားသမီး နာရေးကူညီမှုအသင်း က ပြောပါတယ်။ ဇူလိုင်လ ၁ ရက်နေ့ကစပြီး ၉ ရက်နေ့အထိ သေဆုံးသွားတဲ့ မြန်မာနိုင်ငံသား ၄ ဦးလုံးဟာ ဓားဒဏ်ရာတွေနဲ့ သေဆုံးသွားခဲ့ ကြ တာ ခြင်းတူညီပြီး အုပ်စုတခုရဲ့ စုဖွဲ့တိုက်ခိုက်မှုမျိုးဖြစ်နေတယ်လို့ ခုနစ်ရက်သားသမီး နာရေးကူညီမှုအသင်း ဥက္ကဋ္ဌ ဦးဆန်းဝင်း က ဧရာဝတီ ကို ပြောပါတယ်။ “သတ်တဲ့လူတွေ အားလုံးက ဆိုင်ကယ်တွေနဲ့လာကြပြီး ဓားနဲ့ ထိုးတာ၊ ခုတ်တာတွေ လုပ်ကြတာချင်း တူကြတယ်။ အခုဖြစ် သွားတဲ့ နေရာတိုင်းမှာ အဲဒီတော့ သူတို့ဟာ အဖွဲ့အစည်းတခု၊ ဂိုဏ်းဂဏတခု ရှိနိုင်တယ်။ နောက်ပြီးတော့ သေမယ့်လူရဲ့ သွားမယ့် လမ်း ကြောင်းကိုလည်း ကောင်းကောင်းသိထားတယ်။ အဲဒါကြောင့်မလို့ သေမယ့်လမ်းကြောင်းကို ကောင်းကောင်း အပိုင်စောင့်ပြီး တော့လုပ်တာ။ မနေ့က သေသွားတဲ့လူလဲ အဲဒီလိုပဲ အလုပ်ခံရတာ”လို့ ကိုဆန်းဝင်း က ပြောပါတယ်။ ကွာလာလမ်ပူ နာရေးကူညီမှုအသင်း ဥက္ကဋ္ဌ ဦးမျိုးပိုင်ဟာ ဇူလိုင်လ ၉ ရက်နေ့ညနေမှာ ဆိုင်ကယ်စီး ဓားသမားအဖွဲ့တွေရဲ့ တိုက် ခိုက်သတ်ဖြတ်ခြင်းကို ခံခဲ့ရကြောင်း အလားတူပဲ ၇ ရက်နေ့ကလည်း အသက် ၄၄ နှစ်အရွယ် ကိုတိုနီ လည်း ပုံစံတူ အသတ်ခံခဲ့ရ တာဖြစ်တယ်လို့ ဆိုပါတယ်။ ဦးမျိုးပိုင်နဲ့ ကိုတိုနီတို့ဟာ အသိမိတ်တွေတွေဖြစ်ကြသလို မလေးရှားနိုင်ငံကို တရားမဝင် ရောက်ရှိလာတဲ့ မြန်မာနိုင်ငံ သားတွေကို အောက်လမ်းကနေ နေရပ်ရင်းပြန်ရောက်နိုင်ရေး ကူညီဆောင်ရွက်ပေးနေသူတွေဖြစ်တယ်လို့ နီးစပ်သူတွေက ပြောပါတယ်။ ဦးမျိုးပိုင်ဟာ ဦးတိုနီရဲ့ နာရေးက အပြန်မှာ ထပ်ပြီး အသတ်ခံခဲ့ရတာလို့ ဆိုပါတယ်။ နောက်ဆုံးသေဆုံးသွားတဲ့ ကွာလာလမ်ပူ နာရေးကူညီမှုအသင်း ဥက္ကဋ္ဌ ဦးမျိုးပိုင်ဟာ အခြားပုဂ္ဂိုလ်တွေနဲ့ ရန်ငြိုးရန်စ မရှိသလို လူမှုရေး၊ ငွေကြေး အရှုပ်အရှင်းရှိသူမဟုတ်ဘူးလို့ အတူနေတဲ့ သားဖြစ်သူ ကိုရဲထွဋ်ပိုင်က ဧရာဝတီကို ပြောပါတယ်။ “မိသားစုကတော့ ဒီမှာ အဖေနဲ့အတူနေတာ ကျန်ာတယောက်ပဲ ရှိတယ်။ ကျန်တဲ့မိသားစုတွေကတော့ ရန်ကုန်မှာ၊ အဖေက လူမှုရေးကိစ္စ လုပ်တဲ့လူဆိုတော့ လူချစ်လူခင်ပေါတယ်။ ရန်ငြိုးရန်စ ရှိတဲ့လူမရှိဘူး။ အခုလိုဖြစ်သွားတာ ကျနော်လည်း မယုံနိုင်ဘူး”လို့ ကိုရဲထွဋ်ပိုင် က ပြောပါတယ်။ ဇူလိုင်လ ၁ ရက်နေ့ကလည်း ပီနန်မြို့မှာ အလုပ်က ပြန်လာတဲ့ မြန်မာအလုပ်သမားတဦး အသတ်ခံလိုက်ရသလို ၅ ရက်နေ့ မှာလည်း မလေးရှားနယ်စပ်မြို့ဖြစ်တဲ့ အလတ်စတားမြို့မှာလည်း အုပ်စုလိုက် ဓားသမားတွေရဲ့ တိုက်ခိုက် သတ်ဖြတ်မှုကို ခံခဲ့ရတယ် လို့ ဒေသဆိုင်ရာ နာရေးကူညီမှုအသင်းတွေဆီက ပေးပို့တဲ့ လူသေစာရင်းတွေကို ကိုးကားပြီး ကိုဆန်းဝင်းက ရှင်းပြပါတယ်။ ဒီလထဲမှာ မလေးရှားနိုင်ငံအတွင်း မြန်မာနိုင်ငံသားတွေ ဆက်တိုက်အသတ်ခံရတဲ့ ကိစ္စနဲ့ပတ်သက်ပြီး မန္တလေးမြို့မှာ ဖြစ်ပွားသွားတဲ့ ဘာသာရေး ပဋိပက္ခတွေနဲ့ ဆက်နွယ်နေတယ်လို့ မလေးရှားရောက် မြန်မာအလုပ်သမားတွေက ထင်မြင်ယူဆနေကြပြီး ထပ်မံဖြစ်ပွားမှာကိုလည်းစိုးရိမ်နေကြသလို ဒီလိုအသတ်ခံရတဲ့ သတင်းတွေဟာလည်း မလေးရောက် မြန်မာ အလုပ်သမားတွေကြားမှာ ခြောက်ခြား စရာတွေဖြစ်နေတယ်လို့ ဆိုကြပါတယ်။ “အစောပိုင်းက ကျနော်တို့ထင်တာကတော့ လူမှုရေးနဲ့၊ ငွေရေး၊ ကြေးရေး တွေကြောင့်လို့ ထင်တယ်လေ။ အခုနောက်ပိုင်းမှာတော့ မန္တလေးကိစ္စကြောင့်လို့ ဒီမှာရှိတဲ့ လူအများက ယူဆကြတယ်။ ဘာဖြစ်လို့လည်းဆိုရင် ပြီးခဲ့တဲ့နှစ်ကလည်း လားရှိုးနဲ့ မိတ္ထီလာမှာဖြစ်သွားတဲ့ ပဋိပက္ခတွေအပြီးမှာ ဒီမှာလည်း အဲလိုအကြမ်းဖက်မှုတွေ ဖြစ်ခဲ့တယ်။ ဒါကြောင့် အဲလိုပဲယူဆနေကြတယ်” လို့ ကိုဆန်းဝင်းက ပြောပါတယ်။ မြန်မာနိုင်ငံထဲမှာ ၂၀၁၃ ခုနှစ်အတွင်းက လားရှိုးနဲ့ မိတ္ထီလာ မြို့တွေမှာ မွတ်စလင်တွေနဲ့ ဗုဒ္ဓဘာသာဝင်တွေ အကြား ပဋိပက္ခတွေဖြစ်ပွားခဲ့ကြပြီး သေဆုံးမှုတွေ ဖြစ်ခဲ့ပါတယ်။ အဲဒီ ဖြစ်ပွားမှုတွေနဲ့ တဆက်တည်းမှာပဲ မလေးရှားနိုင်ငံမှာ ရှိနေတဲ့ မြန်မာ အလုပ် သမား တွေ အကြမ်းဖက် သတ်ဖြတ်ခံခဲ့ရပြီး အဲဒိဖြစ်စဉ်မှာ မြန်မာ အလုပ်သမား ၉ ဦး သေဆုံးခဲ့ပြီး ၁၅ ဦး ဒဏ်ရာ ရရှိခဲ့ပါတယ်။ ဒီအရေအတွက်ဟာလည်း နာရေးကူညီမှု အသင်းတွေက တရားဝင်သိရတဲ့ စာရင်းတွေသာ ဖြစ်တယ်လို့ ဆိုပါတယ်။ လက်ရှိဖြစ်ပွားခဲ့တဲ့ မြန်မာနိုင်ငံသားတွေ အသတ်ခံရမှုနဲ့ ပတ်သက်ပြီး မလေးရောက် မြန်မာအလုပ်သမားတွေက မြန်မာသံရုံး နဲ့ မလေးရှား အာဏာပိုင်တွေကို အကြောင်းကြားခဲ့ပြီး မလေးရှား အစိုးရက စစ်ဆေးမှုတွေ ပြုလုပ်နေတယ်လို့ ဆိုပါတယ်။ ဒါပေမယ့် လည်း ပြီးခဲ့တဲ့နှစ်ထဲမှာ သတ်ဖြတ်ခံရသူတွေနဲ့ ဒဏ်ရာ ရရှိသူတွေနဲ့ ပတ်သက်တဲ့အမှုတွေကိုတော့ မလေးရှား ရဲတွေက အခုအချိန် အထိ တမှုမှ ဖော်ထုတ် အရေးယူနိုင်ခြင်း မရှိသေးဘူးလို့ နာရေးကူညီမှု အသင်းအဖွဲ့တွေက ပြောပါတယ်။ ဒီဖြစ်ရပ်တွေနဲ့ပတ်သက်ပြီး မလေးရှားနိုင်ငံဆိုင်ရာ မြန်မာသံရုံး တာဝန်ရှိသူတွေကို ဧရာဝတီက အကြိမ်ကြိမ် ဆက်သွယ်ခဲ့ပေမယ့် ဖုန်းကိုင် ဖြေဆိုခြင်း မရှိပါဘူး။ မလေးရှားမှာ ရှိတဲ့ အလုပ်သမားတွေကလည်း သူတို့ အခက်အခဲ ကြုံတွေ့တဲ့ အခါတွေမှာ မြန်မာသံရုံးကို ဆက်သွယ်ခဲ့ရာမှာ ခက် ခဲ သလို မြန်မာနိုင်ငံသားတွေရဲ့ အရေးကိစ္စတွေကို မြန်မာသံရုံးက လျစ်လျူရှု ထားတယ်လို့ အလုပ်သမားတွေနဲ့ နာရေးအသင်း အဖွဲ့ တာဝန်ရှိသူတွေက ပြောပါတယ်။

အပြည့်အစုံသို့...

ပြန်ခေါက်ထားပါ...

ဆီးရီးယား ဓာတုလက်နက်တွေ အမေရိကန် စတင်ဖျက်ဆီး

ဗွီအိုအေ (မြန်မာဌာန) 08.07.2014 07:13 အမေရိကန် ကုန်သေတ္တာတင် သင်္ဘောတစင်းပေါ်မှာ တင်ဆောင်လာတဲ့ ဆီးရီးယားနိုင်ငံက ဓါတုလက်နက်တွေကို မက်ဒစ်တာရေးနီးယမ်း ပင်လယ်ပြင်အတွင်းမှာ အမေရိကန်ရေတပ် တပ်ဖွဲ့ဝင်တွေက စတင်ပြီး ဖျက်ဆီးနေပါပြီ။ အရေပြားကိုလောင်ကျွမ်းစေတဲ့ အဆိပ်ဓါတ်ငွေ့တွေ၊ အာရုံကြောတွေကိုထိခိုက် ပျက်စီးစေတဲ့ အဆိပ်ဓါတ်ငွေ့ရည်တွေ အပါအ၀င် မက်ထရစ်တန် ၆၀၀ ရှိတဲ့ ဓါတုလက်နက်တွေကို ဖျက်ဆီးဖို့အတွက် အချိန် ၂ လ လောက် ယူရလိမ့်မယ်လို့ အမေရိကန် ပင်တာဂွန် စစ်ဌာနချုပ်က ပြောပါတယ်။ Cape Ray လို့ အမည်ရှိတဲ့ အဲဒီသင်္ဘောမှာ hydrolysis system တပ်ဆင်ထားပြီး အဲဒီစနစ်ဟာ ရေနဲ့ ဆိုဒီယမ် ဟိုက်ဒြောက်ဆိုဒ်လို စွန့်ပစ် ဓါတုပစ္စည်းတွေကို ဓါတ်ပြယ်စေပြီး အန္တရာယ်မဖြစ်အောင် လုပ်ဆောင်ပေးမှာ ဖြစ်ပါတယ်။ အဲဒီသင်္ဘောဟာ နိုင်ငံတကာရေပိုင်နက် နယ်မြေအတွင်းမှာ ရှိနေပြီး အခုလိုလုပ်ဆောင်နေမှုကနေ သဘာဝပတ်ဝန်းကျင် မထိခိုက်စေရအောင် အထူးဂရုစိုက် ကြိုတင်ကာကွယ်မှုတွေ လုပ်ထားပါတယ်လို့ တာဝန်ရှိသူတွေက ပြောဆိုပါတယ်။ အဲဒီဓာတ်ပြယ်ဓါတုပစ္စည်းတွေကို ဖင်လန်နဲ့ ဂျာမနီနိုင်ငံတွေကို အဆုံးသတ် ဖျက်ဆီးပစ်ဖို့ လွှဲပြောင်းပေးမှာ ဖြစ်တယ်လို့ဆိုပါတယ်။ ဒီဓါတုလက်နက်တွေကို ကုလသမဂ္ဂနဲ့ မနှစ်တုံးကရရှိခဲ့တဲ့ သဘောတူညီချက်အရ ဆီးရီးယားက လွှဲပြောင်းပေးခဲ့တာ ဖြစ်ပါတယ်။ ဆီးရီးယား

အပြည့်အစုံသို့...

ပြန်ခေါက်ထားပါ...

ရွှေတြိဂံနယ်မြေက မူးယစ်ဆေး သံသရာ

ဦးအောင်ခင်, ကျော်ကျော်သိန်း 04.07.2014 04:20 မြန်မာ၊ လာအို နဲ့ ထိုင်းနိုင်ငံတို့ ဆုံတွေ့တဲ့ ရွှေတြိဂံနယ်မြေရဲ့  မူးယစ်ဆေးထုတ်လုပ်မှုကို နယ်သာလန်နိုင်ငံ အခြေစိုက် TNI-Transnational Institute က စောင့်ကြည့်နေတာ ကြာပါပြီ။ ၁၉၉၈ ခုနှစ်ကနေ ၂၀၀၆ ခုနှစ်အထိ မူးယစ်ဆေး ထုတ်လုပ်မှုကျဆင်းပုံကို ကွင်းဆင်းလေ့လာတဲ့ အစီရင်ခံစာ (၂၀၀၉) မှာ ထုတ်ဝေပါတယ်။ နောက်တော့ (၂၀၀၇) ကစပြီး ရွှေတြိဂံနယ်မြေမှာ မူးယစ်ဆေး အထွက်နှုန်း (၂) ဆ တိုးလာပုံကို ဖော်ပြတဲ့ Bouncing Back ဆိုတဲ့ အစီရင်ခံစာကို လွန်ခဲ့တဲ့လက ထုတ်ဝေလိုက်ပြန်ပါတယ်။ မူးယစ်ဆေး ပပျောက်ဖို့ အစိုးရက ကြိုးပမ်းနေတုန်းမှာ မူးယစ်ဆေးအထွက်တိုးနေပုံကို ဖော်ပြတဲ့ အစီရင်ခံစာ ဖြစ်ပါတယ်။ (၂၀၀၉) က (၂၀၁၃) အထိ ဒေသခံသုတေသီတွေ ကွင်းဆင်းလေ့လာထားတာကို အခြေခံပြီး အစီရင်ခံစာ ရေးသားတာ ဖြစ်ပါတယ်။ ရွှေတြိဂံနယ်မြေနဲ့ တရုတ်၊ အိန္ဒိယက မူးယစ်ဆေးလုပ်ငန်းတွေ ဆက်သွယ်နေပုံကိုလည်း ဖော်ပြထားပါတယ်။ မူးယစ်ဆေး အထွက်နှုန်းတိုးတာဟာ တနိုင်ငံတည်း ဖြေရှင်းလို့ရတဲ့ ပြဿနာမဟုတ်ပါဘူး။ မူးယစ်ဆေး နှိမ်းနင်းရေး စီမံကိန်းတွေ အကောင်အထည်ဖော်နေတဲ့ကြားက မူးယစ်ဆေးထုတ်လုပ်မှုနဲ့ စားသုံးမှု တိုးပွားလာတာဟာ စဉ်းစားစရာ ဖြစ်နေပါတယ်။ ဒါကြောင့် မူးယစ်ဆေးနဲ့ ပတ်သက်တဲ့လမ်းစဉ် ချမှတ်ရာမှာ အရပ်သားအဖွဲ့တွေ ပါဝင်ဖို့ လိုတယ်လို့ဆိုပါတယ်။ လွန်ခဲ့တဲ့နှစ်က မြန်မာပြည်မှာ ဘိန်းစိုက်ပျိုးတဲ့နယ်မြေ ဧကတသိန်းခွဲနီးပါးရှိပြီး လာအိုနိုင်ငံမှာ ဧက (၁) သောင်းလောက် ရှိပါတယ်။ ထိုင်းနိုင်ငံမှာတော့ ဧက (၅၀၀) ဝန်းကျင်လောက်သာ ဘိန်းစိုက်ပါတယ်။ အိန္ဒိယအရှေ့ မြောက်ပိုင်းဒေသမှာလည်း ဘိန်းခင်းတွေ တိုးပွားနေပါတယ်။ ကိုးကန့်၊ ဝ နဲ့ မိုင်းလားဒေသမှာ ဘိန်းစိုက်ပျိုးမှုကို ပိတ်ပင်လိုက်တာကြောင့် အခြားနေရာဒေသမှာ ဘိန်းခင်းတွေ တိုးပွားလာတာ ဖြစ်ပါတယ်။ ပြည်နယ်တွေမှာ မြေယာသိမ်းပိုက်မှုတွေ များပြားလာလို့ လယ်ယာမဲ့ဖြစ်သွားတဲ့ တိုင်းရင်းသားတွေဟာ ဝေးလံတဲ့ဒေသတွေမှာ ဘိန်းစိုက်ပြီး ဘဝရပ်တည်ကြပါတယ်။ စိုက်ပျိုးမြေမှာ လယ်ယာလုပ်ခွင့်ရသူကသာ သီးနှံစိုက်ပျိုးနိုင်ကြပြီး မြေယာမရှိသူဟာ ဘိန်းစိုက်ပျိုးကြတာများတယ်လို့ ဆိုပါတယ်။ ဘိန်းဈေးနှုန်းဟာ လွန်ခဲ့တဲ့ (၁၀) နှစ်ကထက် လေးဆလောက် တိုးပွားလာတယ်လို့ ဖော်ပြထားပါတယ်။ လွန်ခဲ့တဲ့နှစ်က မြန်မာနိုင်ငံမှာ ဘိန်းခင်းဧက (၁) သိန်းခွဲလောက် ရှိတာကြောင့် ဘိန်းတန်ချိန် ရှစ်ရာကျော်ထွက်မယ်လို့ ကုလသမဂ္ဂ မူးယစ်ဆေးနဲ့ ရာဇဝတ်မှုရုံးရဲ့  အစီရင်ခံစာမှာ ခန့်မှန်းပါတယ်။ ကမ္ဘာ့ဘိန်းထုတ်လုပ်မှုမှာ အာဖဂါနစ္စတန်က ပထမဖြစ်ပြီး၊ မြန်မာက ဒုတိယ ဖြစ်ပါတယ်။ ဘိန်းထုတ်လုပ်မှုကို ခန့်မှန်းရာမှာ ကုလသမဂ္ဂ နဲ့ မြန်မာအစိုးရ ပူးပေါင်းထုတ်လုပ်တဲ့ စာရင်းဇယားကို အားကိုးကြတာများပါတယ်။ အမေရိကန်အစိုးရကလည်း (၂၀၀၄) အထိ ဘိန်းထုတ်လုပ်မှုစစ်တမ်း ထုတ်ဝေခဲ့ပြီး အခုတော့ ကုလသမဂ္ဂနဲ့ ပူးတွဲဆောင်ရွက်နေပါတယ်။ တရုတ်ကလည်း ဂြိုလ်တုက ရိုက်ကူးတဲ့ ဓါတ်ပုံတွေသုံးပြီး ဘိန်းထုတ်လုပ်မှုကို လေ့လာနေပေမယ့် အစီရင်ခံစာ ထုတ်ပြန်တာမျိုး မရှိသေးပါဘူး။ ဘိန်းအထွက်နှုန်း တိုးလာရင် တိုင်းရင်းသားလက်နက်ကိုင်တွေကို တရားခံအဖြစ် လက်ညှိုးထိုးလေ့ ရှိပါတယ်။ ဒါပေမဲ့ ပြည်တွင်းပဋိပက္ခမှာ ပါဝင်နေသူအားလုံးဟာ မူးယစ်ဆေးဝါးလုပ်ငန်းမှာ ပါဝင်ပတ်သက်နေကြပါတယ်။ အစိုးရကိုယ်တိုင် ဖွဲ့စည်းထားတဲ့ ပြည်သူ့စစ်တွေ၊ ဘိန်းလုပ်ငန်းမှာ ခြေသွက်တယ်လို့ ဆိုပါတယ်။ ဒီပြည်သူ့စစ်ခေါင်းဆောင်အချို့ ဟာ ကြံ့ဖွံ့ပါတီဝင်လွှတ်တော် ကိုယ်စားလှယ်တွေတောင် ဖြစ်နေကြပါတယ်။ ဒါကြောင့် မူးယစ်ဆေးက ငွေမဲတွေ နိုင်ငံရေးရန်ပုံငွေ ဖြစ်လာမယ့် အန္တရာယ်ရှိတယ်လို့ ဆိုပါတယ်။ မူးယစ်ဆေးလုပ်ငန်းမှာ အဂတိလိုက်စားမှုတွေများတာမို့ ဘက်စုံအရေးယူနိုင်မယ့်လမ်းစဉ်ကို ကျင့်သုံးဖို့လိုကြောင်း အကြံပေးထားပါတယ်။ ဗိုလ်ချုပ်နေဝင်းလက်ထက်က ဖွဲ့စည်းထားတဲ့ ကာကွယ်ရေးပြည်သူစစ်က ဘိန်းဘုရင်လော်စစ်ဟန်နဲ့ ခွန်ဆာပေါ်ထွက်လာပြီး ဗိုလ်ချုပ်မှူးကြီးသန်းရွှေလက်ထက်မှာ စီးပွားရေးလုပ်ငန်းရှင်ကြီးတွေအဖြစ် အသွင်ပြောင်းတာဟာ မူးယစ်ဆေးရဲ့  အကျိုးဆက်တခုဖြစ်ပါတယ်။ မူးယစ်ဆေး ကင်းရှင်းရေးကို ဦးသိန်းစိန်အစိုးရ ကြွေးကြော်နေပေမယ့် ပြည်သူ့စစ်နဲ့ အစိုးရတပ်တွေဟာ ဘိန်းလုပ်ငန်းမှာ ငွေရှာနေကြတုန်း ဖြစ်ပါတယ်။ ရှမ်းပြည်မြောက်ပိုင်းက နမ့်ခမ်း၊ ကွတ်ခိုင်၊ တန်ယန်း နဲ့ သိမ်းဂီမြို့ နယ်တွေက ပြည်သူ့စစ်အဖွဲ့တွေဟာ ဘိန်းလုပ်ငန်းမှာ အကြီးအကျယ် ပါဝင်နေတယ်လို့ ဆိုပါတယ်။ ဒီဒေသတွေမှာ အစိုးရတပ်တွေလည်း ရှိပါတယ်။ နမ့်ခမ်းမြို့ နယ်က လီစူးတရုတ် ဦးကျော်မြင့်ခေါင်းဆောင်တဲ့ ပန်းဆေးပြည်သူ့စစ်ဒေသမှာ ဘိန်းခင်းအများဆုံး ရှိပါတယ်။ မူးယစ်ဆေးလုပ်ငန်းရှင်တွေဖြစ်တဲ့ ကိုးကန့်တရုတ် ဘိုင်ဆုံချိန်၊ လူဂိုရှိ၊ ဦးဟော်၊ ကွတ်ခိုင်ဦးခွန်မြတ်၊ ဦးမြင့်လွင် နဲ့ မူဆယ် ဦးကင်းမိုင်းတို့ လွှတ်တော်အမတ်ဖြစ်လာပုံကို ရှမ်းမူးယစ်ဆေးဝါး အစီရင်ခံစာမှာ (၂၀၁၀) ကတည်းက ဖော်ပြထားပါတယ်။ ပြည်သူ့စစ်အဖွဲ့ကို (၂၀၀၈) အခြေခံဥပဒေမှာ အသိအမှတ် ပြုထားပါတယ်။ (၂၀၀၇) ကစပြီး ဒီနေ့အထိ မူးယစ်ဆေး ထုတ်လုပ်မှု တိုးပွားလာပုံကို ပြည်ထဲရေးဌာန ဒု-ဝန်ကြီး ဗိုလ်မှုးချုပ် ကျော်ကျော်ထွန်းက လွန်ခဲ့တဲ့လက ပြည်သူ့လွှတ်တော်မှာ ရှင်းပြသွားပါတယ်။ ကွတ်ခိုင်ဦးခွန်မြတ်ကတော့ တိုင်းရင်းသားအဖွဲ့တွေနဲ့ ငြိမ်းချမ်းရေးမရမချင်း မူးယစ်ဆေးထုတ်လုပ်မှု ပပျောက်မှာ မဟုတ်ဘူးလို့ ဆိုပါတယ်။ မူးယစ်ဆေးထုတ်လုပ်မှု ကျဆင်းအောင် စီမံချက်ချပြီး လုပ်ဆောင်နေတုန်း မူးယစ်ဆေးထုတ်လုပ်မှု တိုးပွားလာတာဟာ ညံ့ဖျင်းချက်နဲ့ အားနည်းချက်တွေ ရှိနေတာကို ပြတာဖြစ်တယ်လို့ လွှတ်တော်ဥက္ကဋ္ဌ ဦးရွှေမန်းက မှတ်ချက်ချကြောင်း သိရှိရပါတယ်။

အပြည့်အစုံသို့...

ပြန်ခေါက်ထားပါ...

ရာဇဝတ်မှု ကျူးလွန်တဲ့ စစ်ခေါင်းဆောင်တွေ ဖော်ထုတ်အရေးယူဖို့ WLB တိုက်တွန်း

စစ်တပ်ခေါင်းဆောင်တွေ ကျူးလွန်ထားတဲ့ ရာဇဝတ်မှုတွေကို ဖော်ထုတ်ပြီး တရားမျှတစွာ အရေးယူဆောင်ရွက်ဖို့ အမျိုးသမီးများ အဖွဲ့ချုပ် မြန်မာ နိုင်ငံ (WLB) က ထိုင်း-မြန်မာနယ်စပ် တနေရာမှာ ဇူလိုင်လ ၆ ရက်နေ့က ပြုလုပ်တဲ့ နိုင်ငံရေးပါတီ ၁၂ ပါတီ နဲ့ တွေ့ဆုံပွဲမှာ ပြောဆိုလိုက်ပါတယ်။ နဝတ၊ နအဖ စစ်အစိုးရတွေ လက်ထက်က ကျူးလွန်ခဲ့ကြတဲ့ ရာဇဝတ်မှုတွေကို အသွင်ကူးပြောင်းရေး ကာလမှာ အရေးယူ မခံရဖို့ ၂၀၀၈ ဖွဲ့စည်းပုံ အခြေခံ ဥပဒေကို စစ်တပ်က ပါးပါးနပ်နပ်နဲ့ စိတ်ကြိုက် ရေးဆွဲခဲ့တာဖြစ်ပြီး အဲဒီ ပြဌာန်းချက်တွေကို လွှတ်တော် ထဲ က အမတ်တွေနဲ့ နိုင်ငံရေးပါတီတွေက လုပ်ပိုင်ခွင့်ရှိတာကြောင့် ချပြဆွေးနွေးခဲ့တာ ဖြစ်တယ်လို့ WLB ကပြောပါတယ်။ WLB အထွေထွေ အတွင်းရေးမှူး ဒေါ်တင်တင်ညို က “တချို့ကကြတော့လည်း လေပြေအေး တရားဟောတာပေါ့။ သင်ပုန်း ချေလိုက်ကြဖို့၊ ခွင့်လွှတ်လိုက်ဖို့ပေါ့။ ကျမတို့အနေနဲ့မြင်တာက ငြိမ်းချမ်းရေးကို တည်ဆောက်ဖို့ ဆိုတာက မှားနေတဲ့ အရာတခုကို ဒီအတိုင်းပဲ လျစ်လျူရှုလိုက်ရုံနဲ့ အမှန်တခုကို ရောက်မသွားဘူး။ အဲဒီအမှားတခုဟာ အမှန်တခုအတွက် အရမ်း အရေးကြီးတယ် ဆိုရင် ဖော်ထုတ်ရမှာပဲ။ ဒါကြောင့်မလို့ ကျမတို့တွေက ဖော်ထုတ်နေတာပဲ”လို့ ပြောပါတယ်။ တိုင်းရင်းသူ အမျိုးသမီးတွေအနေနဲ့ စစ်တပ်ရဲ့ ရာဇဝတ်မှု ကျူးလွန်တာတွေကို စစ်အစိုးရ လက်ထက်မှာခံစားခဲ့ရသလို လက်ရှိ အချိန်အထိလည်း ဆက်လက် ချိုးဖောက်ခံနေရကြောင်း၊ ပြည်သူတွေ ကျူးလွန်ခံနေရတဲ့ ဒုက္ခတွေကို နိုင်ငံရေးပါတီတွေနဲ့ လွှတ် တော် အမတ်တွေက ဖော်ထုတ်ပြီး တရားမျှမျှတတ ဆောင်ရွက်ပေးနိုင်လိမ့်မယ်လို့ မျှော်လင့်ကြောင်း ဆိုပါတယ်။ စစ်တပ်က ရေးဆွဲပြဌာန်းထားတဲ့ ၂၀၀၈ ဖွဲ့စည်းပုံ အခြေခံဥပဒေ အခန်း (၁၄) ပုဒ်မ (၄၅၅) အရ အရင် နဝတ၊ နအဖ အစိုးရတွေ လက်ထက်က တာဝန်ထမ်းဆောင်ခဲ့ကြတဲ့ အစိုးရအဖွဲ့ ဒါမှမဟုတ် အစိုးရ အဖွဲ့ဝင် တဦးဦးရဲ့ တာဝန် အရ ဆောင်ရွက်ခဲ့တဲ့ ဆောင် ရွက်ချက်တွေကို အကြောင်းပြုပြီး အဲဒီ ပုဂ္ဂိုလ်တွေကို တရားစွဲဆိုခြင်း၊ အရေးယူခြင်းတွေ မပြုလုပ်ရဘူးလို့ ပြဌာန်းထားပါတယ်။ “အမျိုးသမီးတွေ လိင်ပိုင်းဆိုင်ရာ အကြမ်းဖက်ခံနေရတဲ့ကိစ္စတွေ ဆက်လက်ပြီး အကြမ်းဖက်ခံနေရတဲ့ ကိစ္စတွေကို ဖော်ထုတ်တာ အဲဒီ ရည်ရွယ်ချက်ပါတယ်။ အဲဒီလိုမှ မဟုတ်ဘူးဆိုရင် ဒီအမျိုးသမီးတွေက ဒီလိုပဲအနာတရတွေနဲ့ သူတို့ဘဝမှာ ဆက်လက်ပြီး တော့ မှ လျှောက်လှမ်းရဦးမယ် ဆိုလို့ရှိရင် ဘယ်လိုလုပ် ငြိမ်းချမ်းမလဲ။ ငြိမ်းချမ်းရေး ဆိုတာက တဦးတယောက်ချင်းစီ မှာလည်း အများကြီးမူတည်တယ်။ ကိုယ့် တကိုယ်ရေ ငြိမ်းချမ်းမှသာ ကိုယ့်ရဲ့လူမှုအသိုင်းအဝိုင်းမှာ ငြိမ်းချမ်းအောင် လုပ်နိုင်မှာ။ ပြီးမှတဆင့် နိုင်ငံတော်ကို ငြိမ်းချမ်းအောင်လုပ်နိုင်မှာ”လို့ ဒေါ်တင်တင်ညို က ရှင်းပြပါတယ်။ ဆွေးနွေးပွဲမှာ ၁၂ ပါတီက WLB ရဲ့ လုပ်ငန်းစဉ်တွေကို မေးမြန်းကြသလို WLB ကလည်း ဖက်ဒရယ် ဒီမိုကရေစီ အရေးကိစ္စ၊ ငြိမ်းချမ်းရေး လုပ်ငန်းစဉ်တွေမှာ အမျိုးသမီးတွေပါဝင်မှု၊ ၂၀၀၈ အခြေခံဥပဒေ ပြင်ဆင်ရေး၊ အမျိုးသမီးတွေ အပေါ်မှာ လူ့အခွင့်အရေးချိုးဖောက်မှု နဲ့ လက်ရှိနိုင်ငံအတွင်းမှာ ဖြစ်နေတဲ့ စစ်ပွဲတွေနဲ့ ဘာသာရေး ပဋိပက္ခ ဖြစ်စဉ်တွေအပေါ်မှာ အမြင်သဘောထားတွေကို ဆွေးနွေး ဖလှယ်ခဲ့ကြတယ်လို့ သိရပါတယ်။ ဆွေးနွေးပွဲကို တက်ရောက်ခဲ့တဲ့ စည်းလုံးညီညွှတ်ရေးနဲ့ ဒီမိုကရေစီပါတီ(UDPKS) အမျိုးသားလွှတ်တော်အမတ် ဦးခက်ထိန်နန် က “အမျိုးသမီးဆိုတာ ကျနော်တို့ လူမှုအဖွဲ့အစည်းမှာရော နိုင်ငံမှာရော အဓိကပါပဲ။ ဒါပေမယ့် နေရာတကာမှာ သူတို့ရဲ့ ပါဝင်မှုအား နည်း တယ်။ ဦးစားပေးမှု အားနည်းတယ်။ အထူးသဖြင့် ပဋိပက္ခဖြစ်တဲ့၊ ပြည်တွင်း မတည်မငြိမ်ဖြစ်တဲ့အခါမှာ ပိုပြီးတော့ ဒုက္ခကြုံရတာက အမျိုးသမီးတွေ၊ မိခင်တွေနဲ့ ကလေးတွေ ဖြစ်နေတာပေါ့။ ဒါတွေကို ပိုပြီးတော့ သိရတယ်။ သိရတော့ ဒီကဏ္ဍမှာ ကျနော် တို့က ပိုပြီးတော့ ပါဝင်ရမယ်။ ကြိုးစားရမယ်၊ ပိုပြီးတော့ တာဝန်ရှိလာတယ်ဆိုတာ သူတို့တင်ပြလာတဲ့ အပေါ်မှာ ပိုပြီးတော့ နား လည် လာတယ်”လို့ ဆိုပါတယ်။ ဆွေးနွေးပွဲကို အမျိုးသားဒီမိုကရေစီ အင်အားစု (NDF)၊ တိုင်းရင်းသား စည်း လုံးညီညွှတ်ရေးပါတီ (NUP)၊ Democratic Party (Myanmar)၊ ဒီမိုကရေစီ နှင့် ငြိမ်းချမ်းရေးပါတီ (DPP)၊ ကရင်ပြည်သူ့ပါတီ (KPP)၊ ချင်းတိုးတက်ရေး ပါတီ (CPP)၊ ရခိုင်အမျိုးသားပါတီ (ANP)၊ မွန်ဒေသလုံး ဆိုင်ရာ ဒီမိုကရေစီပါတီ(AMRDP)၊ စည်းလုံးညီညွတ်ရေးနှင့် ဒီမိုကရေစီပါတီ ကချင်ပြည်နယ် (UDPKS)၊ တိုင်းလျဲန်(သျှမ်းနီ) အမျိုးသားများ ဖွံ့ဖြိုးတိုးတက်ရေးပါတီ လုို့ခေါ်တဲ့ (TNDP)၊ ကချင်ပြည်နယ် ဒီမိုကရေစီ ပါတီ (KSDP)နဲ့ Kayah National Race Democracy Party (KNRDP) တို့က ကကိုယ်စားလှယ် ၂၃ ဦး တက်ရောက်ကြပါတယ်။ ပါတီ ၁၂ ပါတီအနေနဲ့ WLB နဲ့တွေ့ဆုံ ဆွေးနွေးခဲ့သလို တနိုင်ငံလုံး အပစ်အခတ်ရပ်စဲရေး ဆိုင်ရာ ညှိနှိုင်းရေး အဖွဲ့(NCCT)၊ Pyi Duang Su Institute ၊ ရှမ်းအမျိုးသမီးရေးရာ လှုပ်ရှားဆောင်ရွက်ရေး အသင်း(SWAN) အဖွဲ့၊ ကချင် အမျိုးသမီး အစည်းအရုံး (KWAT) တို့နဲ့လည်း တွေ့ဆုံခဲ့ပြီး အမြင်တွေဖလှယ်ခဲ့ကြပါတယ်။ WLB ဟာ ၂၀၁၁ ခုနှစ်တုန်းကလည်း မြန်မာ စစ်အစိုးရခေါင်းဆောင် ဗိုလ်ချုပ်မှူးကြီး သန်းရွှေနဲ့ အပေါင်းအပါ စစ်ခေါင်းဆောင်တွေ ကျူးလွန်ထားတဲ့ လူ့အခွင့်အရေး ချိုးဖောက်မှုတွေအတွက် အပြည်ပြည်ဆိုင်ရာ ရာဇ၀တ်မှုခုံရုံးမှာ တရားစွဲဆိုနိုင်ရေးကို ဦးတည်ပြီး ကုလသမဂ္ဂ စုံစမ်းစစ်ဆေးရေး ကော်မရှင် (UN COI) ဖွဲ့စည်းဖို့ တောင်းဆိုခဲ့ဖူးပါတယ်။ ၂၀၁၀ ခုနှစ် အောက်တိုဘာလတုန်းက ကျင်းပတဲ့ ကုလသမဂ္ဂ အထွေထွေညီလာခံမှာ မစ္စတာ ကင်တာနာ က မြန်မာနိုင်ငံတွင်း လူ့ အခွင့်အရေး ချိုးဖောက်မှုတွေဟာ ကုလ သမဂ္ဂ စံနှုန်းတွေအရ စစ်ရာဇဝတ်မှု မြောက်ကြောင်း ပြောဆိုခဲ့ပြီး ကုလသမဂ္ဂ စုံစမ်း ရေး ကော်မရှင်တရပ် ဖွဲ့သင့်ကြောင်း အကြံပြုတောင်းဆို ခဲ့ဖူးပါတယ်။ ကုလသမဂ္ဂ ဦးဆောင်တဲ့ စုံစမ်းရေး ကော်မရှင်ဖွဲ့ဖို့ အမေရိကန်၊ ဗြိတိန်၊ သြစတြေးလျ၊ နယူးဇီလန်၊ ကနေဒါ အပါအဝင် ၁၃ နိုင်ငံက ထောက်ခံခဲ့ကြပါတယ်။ ကော်မရှင် ဖွဲ့စည်းရေး ထောက်ခံသူတွေက စစ်အစိုးရရဲ့ ကလေးစစ်သားကိစ္စ၊ တိုင်းရင်းသား ကျေးရွာ ထောင်ချီ ဖျက်ဆီးပစ် ခဲ့တဲ့ ကိစ္စတွေကို ထောက်ပြကြလို့ အကျိုးဆက်အဖြစ် ဒေသခံပြည်သူတွေ တောတောင်တွေနဲ့ အိမ်နီးချင်းနိုင်ငံတွေမှာ ထွက်ပြေးခိုလှုံနေကြရတယ်လို့ ထောက်ပြခဲ့ကြပါတယ်။ ဒါ့အပြင် စစ်တပ်က အမျိုးသမီးတွေအပေါ် အဓမ္မပြုကျင့်မှုကို လက်နက်သဖွယ်သုံးခြင်း၊ ဥပဒေမဲ့ သတ်ဖြတ်ခြင်း၊ စစ်တပ် စီမံကိန်း တွေအတွက် အဓမ္မလုပ်အားပေး ခိုင်းစေခြင်းတွေနဲ့ စစ်ဆင်ရေးမှာ လူသား မိုင်းရှင်း ကိရိယာအဖြစ် အသုံးပြုနေခြင်းတွေလည်း ရှိတယ်လို့ ဆိုထားပါတယ်။

အပြည့်အစုံသို့...

ပြန်ခေါက်ထားပါ...

KNU တပ်မဟာ(၇)တွင် (၆၅) နှစ်မြောက် KNLA နေ့ ကျင်းပခဲ့

ဇူလိုင် ၇ရက်၊ ၂၀၁၄ ခုနှစ်။ စဖန်းရှောင်း ဇူလိုင်လ ၅ရက်နေ့တွင် ကျရောက်သော (၆၅)နှစ်မြောက် ကရင့်အမျိုးသား လွတ်မြောက်ရေးတပ်မတော် (KNLA)နေ့ ဂုဏ်ပြု အခမ်းအနားကို ကရင်အမျိုးသားအစည်းအရုံး(KNU)၏ ဖားအံခရိုင် တပ်မဟာ(၇) ရှိ KNLA ဗဟိုစစ်ဦးစီးဌာနချုပ်တွင် ကျင်းပခဲ့ သည်။ အဆိုပါ အခမ်းအနားသို့ KNU အတွင်းရေးမှူး ပဒိုစောကွယ်ထူးဝင်း၊ ဗဟိုစည်းရုံးရေးနှင့် ပြန်ကြားရေးဌာနမှူး ပဒိုစောလှထွန်း၊ ဗဟိုစစ်ဦးစီးဌာနချုပ် ဆေးဌာနတာဝန်ခံ ဗိုလ်မှူးကြီး နော်စေးဒေးကဲ အပါအ၀င် ခရိုင်အရပ်ဖက် အုပ်ချုပ်ရေးအကြီးအကဲများ၊ စစ်ဖက်အရာရှိကြီးများ အပါအ၀င် လူဦးရေ ၁၅၀ ကျော်တက်ရောက်ခဲ့ကြသည်။ အခမ်းအနားတက်ရောက်ခဲ့သည့် KNU အထွေထွေအတွင်းရေးမှူး ပဒိုကွယ်ထူးဝင်းက လက်ရှိ မြန်မာအစိုးရနှင့် ဖော်ဆောင်နေ သော ငြိမ်းချမ်းရေးလုပ်ငန်းစဉ်များနှင့်အတူ အနာဂတ် ကရင်အမျိုးသား လွတ်မြောက်ရေး တပ်မတော်၏ အခန်းကဏ္ဍအပေါ် ယခုလို ပြောကြားခဲ့သည်။ “ကရင်လက်နက်ကိုင်တပ်တွေ ဖွဲ့စည်းရတာကတော့ ကိုယ်ပြည်သူလူထုနဲ့အမျိုးသားရေး၊ KNU ရဲ့နိုင်ငံရေး ရည်မှန်းချက်တွေကို ဖြည့်စွမ်းပြီး အကာအကွယ်ပေးဖို့ ဖွဲ့စည်းထားတာဖြစ်ပါတယ်။ တကယ်လို့နိုင်ငံရေး တွေ့ဆုံဆွေးနွေးမှုဖြစ်လာပြီး နိုင်ငံတော် ဖွဲ့စည်းပုံနှင့်အညီ လက်နက်ကိုင် တပ်ဖွဲ့တွေပြန်လည်ဖွဲ့စည်းရမှာ ဖြစ်ပါတယ်။ ဘယ်လိုပုံစံနဲ့ရပ်တည်မလဲဆိုတာ ဖွဲ့စည်းပုံပေါ်မှာ မူတည်ပြီးတော့ ကျနော်တို့ပြန်လုပ်ရမှာ ဖြစ်ပါတယ်”ဟု ပဒိုစောကွယ်ထူးဝင်းက ပြောသည်။ နံနက် ၁၀နာရီမှ မွန်းလွဲ ၁နာရီအထိကျင်းပခဲ့သည့် KNLA နေ့ အခမ်းအနားတွင် ကရင်အမျိုးသားအလံတော်နှင့် ကရင့်အမျိုး သားလွတ်မြောက်ရေးတပ်မတော်အလံကို အလေးပြုခြင်း၊ ကရင်အမျိုးသမီးအစည်းအရုံး (KWO)ပေးပို့သော သ၀ဏ်လွှာနှင့် KNU ဥက္ကဌ ဗိုလ်ချုပ်ကြီး စောမူတူးစေးဖိုးမှ ပေးပို့သော မိန့်ခွန်းလွှာ ဖတ်ကြားခြင်း အစီအစဉ်များ ပြုလုပ်ခဲ့သည်။ KNU ဥက္ကဌ ဗိုလ်ချုပ်ကြီးမူတူးစေးဖိုး၏ မိန့်ခွန်းတွင် “တနိုင်ငံလုံးအပစ်အခတ်ရပ်စဲရေးဆိုင်ရာ သဘောတူစာချုပ်များ ချုပ်ဆိုနိုင် ရန် ကြိုးပမ်းနေပြီဖြစ်သော်လည်း ကျော်ဖြတ်လာရသည့် အတွေ့အကြုံများအရ တိုင်းရင်းသားလူမျိုးစုများ လိမ္မာပါးနပ်စွာနှင့် သတိဝီရိယရှိရှိ လုပ်ဆောင်ရန် လိုအပ်ကြောင်း” ပြောဆိုထားသည်။ စစ်မှန်သည့် နိုင်ငံရေးစနစ် မရှိလျှင် နိုင်ငံရေးလည်း တည်ငြိမ်မည်မဟုတ်ကြောင်းနှင့် နိုင်ငံရေး မတည်ငြိမ်လျှင် ပြည်တွင်းငြိမ်း ချမ်းရေး ရှိလာမှာ မဟုတ်ဘဲ ငြိမ်းချမ်းမှု မရှိရင် နိုင်ငံဖွံ့ဖြိုးတိုးတက်မှု မည်သို့မျှ ဖြစ်လာနိုင်မည် မဟုတ်ကြောင်းလည်း ယင်းမိန့် ခွန်းလွှာတွင် ပါရှိသည်။ ၎င်းအပြင် အခမ်းအနားတွင် KNLA တပ်မတော်နေ့ကို ဂုဏ်ပြုသောအားဖြင့် တက်ရောက်လာသည့် KNU ခေါင်းဆောင်များ သည် ကရင်အမျိုးသားလွတ်မြောက်ရေးတပ်မတော်ဖြစ်ပေါ်လာပုံနှင့် ဖြစ်ပေါ်လာရသည့် အကြောင်းရင်းများ၊ လေးစားလိုက်နာ သင့်သည်များ၊ ထားရှိရမည့်သဘောထားများကို ဟောပြောခဲ့ကြသည်။ အလားတူ ကရင်အမျိုးသားလွတ်မြောက်ရေးတပ်မတော်နေ့ အခမ်းအနားကို KNU ၏ သက်ဆိုင်ခရိုင်အသီးသီးမှ တပ်မဟာအ လိုက် နှစ်စဉ်ကျင်းပလျှက်ရှိပြီး KNLA ကို ၁၉၄၉ခုနှစ်၌ ဖွဲ့စည်းခဲ့ပြီး ၁၉၅၆ခုနှစ်တွင် အတည်ပြုခဲ့ကြောင်း သိရသည်။

အပြည့်အစုံသို့...

ပြန်ခေါက်ထားပါ...